Аҧсны Аҳәынҭқарра Ахада

 

Аспортсменцәа ҿарацәа рҧылара

23.04.2018

Аспортсменцәа ҿарацәа рҧылара


Мшаҧымза 23 рзы Аҧсны Аҳәынҭқарра Ахада Рауль Ҳаџьымба идикылеит зхы иақәиҭу ақәҧаразы Урыстәыла Аицлабраҿы аиааира згаз Асланбек Гәарамиа, иара убас ақәыҧшцәа рыбжьара Урыстәыла Аицлабраҿы зхы иақәиҭу аицлабраҟны араӡны иааирагаҩцәа  Асҭамыр Гәынбеи Гьаргь Адлеибеи.

Ахада аспортсменцәа ҿарацәа бзиала шәаабеит ҳәа раҳәо, иргаз аиааирақәа рыдиныҳәалеит. 

«Ҳара гәахәара дула иҳадаҳкылоит шәара шәиааирақәа.  Шәара, аиашазы, ишәылшаз маҷӡам. Сгәы иаанагоит, аҧхьаҟатәи аицлабрақәа рҟынгьы аиааирақәа шәзыҧшуп ҳәа. Асланбек Гәарамиа адунеитә  еицлабра аҽалархәразы алшара иоуит, шәара – Европа Ачемпионат. Ари ҳара ҳаспорт аҟны хҭыс дуны иҟалеит. Ишәзеиҕьасшьоит, агәабзиара, агәамч, аманшәалара. Егьыс, шәара ибзианы ижәдыруеит иҟаҵатәу, аҽазыҟаҵара шаҭаху, ааҧсарак ҟамҵакәа шәхы аус адыжәулоит», - иҳәеит Ахада.

Аспортсменцәа ҿарацәа аҳәынҭқарра Ахада иҭабуп ҳәа иарҳәеит ириҭо адгыларазы. 

Абаҩрҵәыреи аспорти рзы Аҧсны аҳәынҭқарратә еилакы Ахантәаҩы Баграт Хәытаба иҳәеит  аспортсменцәа рзы шгәадуроу аҳәынҭқарра Ахада иҟны аҟазаара.  

«Ҳара ҳтәыла аспорт аҟны ажәытәӡатәи атрадициақәа амоуп зхы иақәиҭу ақәҧараҟны мацара акәымкәа, егьырҭ ахкқәа рыҿгьы. Даара ахә ҳаракны иаҳшьоит иҳашәҭо адгылара. Аспортсменцәагьы саргьы ҳзы гәахәароуп аҳәынҭқарра Ахада иахь иҳамоу ааҧхьара», -азгәеиҭеит иара.

 5.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT