Аҧсны Аҳәынҭқарра Ахада

 

Аҧсадгьыл ахь архынҳәразы Аҳәынҭқарратә еилакы 25 шықәса ахыҵра иазкыз агәырӷьаратә еилатәараҟны ақәгылара

23.03.2018

 Аҧсадгьыл ахь архынҳәразы Аҳәынҭқарратә еилакы 25 шықәса ахыҵра иазкыз агәырӷьаратә еилатәараҟны ақәгылара

***
Акыр иаҧсоу ҳауаажәлар! Акыр иаҧсоу ҳџьынџьуаа!
Ишыжәдыруеиҧш, ҳазҭоу ашықәс– ҳажәлар ршьала иаагоу ҳхьыҧшымреи ҳиааира дуи ҩажәихәба шықәса рхыҵра иашықәсуп. Телехәаҧшрала лассы-лассы иаабало аибашьра ахроника даҽазныкгьы агәра ҳнаргоит шаҟа иуадаҩыз, шаҟа ихьанҭаз ахьыҧшымреи ахақәиҭреи рышҟа инагаз ҳамҩа.
Абри аамҭа уадаҩ иалиааз, ишьақәгылаз аҳәынҭқарратә еиҿкаарақәа ируакыуп иахьа зуалҧшьа дуқәа назыгӡо ҳџьынџьуаа рҭоурыхтә ҧсадгьылахь рырхынҳәразын Аилак. 25 шықәса аҭоурых азын рацәак зҵазкуа ҿҳәарам, аха ари аамҭала, зиубилеи азгәаҳҭо аҳәынҭқарратә еилакы иалшаз даара ирацәоуп. Гәык-ҧсыкала ишәыдысныҳәалоит ари ахҭыс ду! Ишәзеиҕьасшьоит агәамч ҕәҕәа, агәалаҟара бзиа, шәареи ҳареи ҳзеиҧш усқәа рҿы аманшәалара, аихьӡара дуқәа!
Аибашьра аилашымҭаз асеиҧш аструктурақәа аҧызҵоз Аҧсны Аҳәынҭқарра раҧхьатәи Ахада Владислав Арӡынба дацәымҩашьо идыруан инапы зҵаиҩуаз аусҧҟақәа ҵакыс, ныррас, насгьы перспективас ирымаз. Уи зеиҕьаҭам ала еиликаауан ҳадиаспореи ҳареи ҳаимадара ҳмырҕәҕәар, ҳџьынџьуаа рҭоурыхтә ҧсадгьылахь рырхынҳәра программак аҳасабала анагӡара ҳҽазаҳамкыр – ихьыҧшым аҳәынҭқарра аргылара шымариамхо, акырӡа ишыуашәшәырахо ҳгенофонд, ҳамч-ҳалша.
25 шықәса рыҩныҵҟа Аилак акырӡа иарҭбааит ҳџьынџьуааи ҳареи ҳаимадарақәа рымҽхак. Имаҷҩым Аҧсныҟа ихынҳәны ҳаҧсадгьыл асоциалтә-економикатә ҧсҭазаара аҕьараҳәа зҽалазырхәыз, аҭаацәарақәа аҧызҵо, адгьылаҿ иаарыхуа, абизнес маҷ знапы алакыу, аҵареи акультуреи , агәабзиарахьчареи, аспорти рыҿиара, реизҳара иацхраауа ҳашьцәа ҳаҳәшьцәа. Ари аамҭала араҟа, рхатә ҧсадгьылаҿ иит, ирызҳаит, ршьапы иқәгылеит шәҩыла ахәыҷқәа, аҿар!
Хашҭра рықәым Аҧсны жәлар Рџьынџьтәылатә еибашьраан Ҭырқәтәылантә, Сириантә, Иорданиатә уҳәа арахь иааны, абџьар аанкыланы аҕа иҿагылаз, агәымшәара аазырҧшыз, зыҧсадгьыл зхы ақәызҵаз. Уи иаҳнарбоит аҧсуаа ахьыҟазаалакь, адунеиаҿ иахьынхозаалакь- зегь раҧхьаӡагьы изызхәыцуа, хьаас ирымоу рыҧсадгьыл алахьынҵа, аҧеиҧш шракәу. Урҭ, иаҳҿагылоз амчрақәа зегьы иддырбеит аҧсуа жәлар, аҧсуа етнос ракзаара, раӡәкра ҳмилаҭ рзын еиҳаӡоу идеологианы ишыҟоу.
Ҳажәлар пату ақәырҵоит ҳџьынџьуаа рырхынҳәразы Аҳәынҭқарратә еилакы тәамҩахә ҟамҵа имҩаҧнаго аусура: атәылауаҩра азҵаарақәа рыӡбараҿы, зџьынџь ашҟа ихынҳәыз усурҭала, нхарҭа ҭыҧла реиқәыршәараҿы, ҳадиаспореи ҳареи ҳауаажәларратә-культуратә еигәныҩрақәа рымҽхак арҭбаараҿы. Аҧсны анапхгара ҧхьаҟагьы гәцаракра ҷыдала иазнеилоит асеиҧш иҟоу аус дуқәа реиҿкаара.
Иҵегь ирыҕәҕәалатәуп Аилаки Аҧсуа-абаза жәлар Адунеизегьтәи рконгресси еиуеиҧшым априоритеттә ахырхарҭақәа рыла русеицура.
Акырынтә исҳәахьеит, еиҭасҳәоит ҳџьынџьуаа рыҧсадгьылахь рырхынҳәра апроблема Аилак ҷыда иаус мацараны иҟам, ари азҵаара рылаҧш ҷыда ахызароуп егьырҭ аминистррақәа зегьы, ақалақьқәеи араионқәеи рнапхгаҩцәа зегьы. Урҭ зегьы еицҿакны русеицура ауп иаазышьҭуа иреалтәу алыҵшәа.
Сара сықәгыларақәа рҿы изныкымкәа иазгәасҭахьеит, еиҭазгәасҭоит иахьагьы: наунагӡа ҳәа Аҧсныҟа иааз, зыҧсадгьыл аҿы зыҵәҩаншьап нарсны, анхара иалагаз дарбанзаалакь – уи аамҭала дышрепатриантыз ихаиршҭроуп, уи арахь даныхынҳә амш инаркны – ҳазегь зинла иҳаҟароу тәылауаҩуп, аҳәынҭқарра аргылара иалахәу уаҩытәыҩсоуп.
Уи атәы бзианы ирдыруазароуп ҳауаажәлар зегьы. Ҳџьынџьуаа ахьыхынҳәуа– лахьынҵала, трагедиатә хҭысла ахҵәара-ахыҧсаара, агәаҟра иақәшәаз рабдуцәа, урҭ рабдуцәа ршьам-дгьылахь ауп. Иахьа ҳҳәынҭқарра имҩаҧнаго арепатриациа апроцессгьы– азеиҧш милаҭтә демографиатә политика иахәҭакыуп. Ари зыда ҧсыхәа ҳамам, уаҵәтәи ҳҧеиҧш зхьыҧшу ҳәынҭқарратә уалҧшьоуп. Издыруеит макьана ишыҟоу ауадаҩрақәа, аҧынгылақәа маҷымкәа, аха урҭ ҳамч шрықәхогьы агәра згоит. Ҳамч рықәхоит ианыҟала аилибакаара, аизыразра, аҳәоуеиқәшәара!
Ҳара лассы-лассы аӡбахә ҳҳәалоит амилаҭтә идеиа. Досу иара итәала дахцәажәоит ари аус. Сара сгәаанагарала, аҭоурыхтә рыцҳара бааҧсы еиҩнашаз ҳажәлар реидкылара, рыҧсадгьыл ду разхьарҧшра, ҳажәлар, ҳхатәы бызшәа, ҳкультуратә хаҿра реиқәырхара еиҳау милаҭтә идеиа ҟалашьа амаӡам.
Даҽазныкгьы шәара шәышҟа исырхоит иреиҕьӡоу сзеиҕьашьарақәа! Иазҳалааит ҳакзаара амч –алша, еизҳазыҕьалааит ихьыҧшым ҳаҧсадгьыл Аҧсынтәыла! Лашареи гәыҕреи агымхааит ҳмилаҭ раҧхьагылаҩ ду Владислав Арӡынба ҳазқәиҵаз амҩа!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT