Аҧсны Аҳәынҭқарра Ахада

 

Валери Кәарҷиа Аҧсны Ахада Имшира идиныҳәалеит

21.03.2018

Хәажәкырамза 21 азы Аҧсны Аҳәынҭқарра Ахада Рауль Ҳаџьымба ииубилеи идиныҳәалеит Аҧсны Жәлар Реизара – Апарламент Аиҳабы Валери Кәарҷиа. 

Адныҳәалараҟны, ҷыдала, иҳәоуп:

 

   "Ҳаҭыр зқәу Рауль Џьумка-иҧа!

 

Аҧсны Жәлар Реизара – Апарламент ахьӡала гәык-ҧсыкала ишәыдысныҳәалоит Шәымшира!

Шәара шәыҧсҭазаара зегьы, шәусура ҳаҧсадгьыл Аҧсны иузаҟәымҭхо иадҳәалоуп. Аррамаҵура, 1992 – 1993 шш. Аҧсны Аџьынџьтәылатә еибашьра шәалахәра, шәызнысыз аџьа мҩа – аусуҩы инаиркны аҳәынҭқарратә маҵзурақәа рҟынӡа – Аҧсны Аҳәынҭқарратә шәарҭадара амаҵзура ахантәаҩы, атәылахьчара аминистр, Аҧсны Аҳәынҭқарра Аҧыза-министр, Аҧсны Жәлар Реизара – Апарламент адепутатс шәалхра – ари аҧышәа ду Шәара ишәылнаршеит Аҧсны Аҳәынҭқарра аҧхьаҟатәи аҿиаразы ишәымоу азнеишьақәа ҳуаажәларра рҟынӡа рнагара, Аҧсны Аҳәынҭқарра Ахада иаҳасабалагьы напхгара аҭара.

Шәара есқьынгьы ҳтәыла аполитикатәи ауаажәларратә ҧсҭазаара агәҭа шәгылан. Шәара шәыҧсҭазааратә ҧышәеи шәыуаҩреи, шәыҧсадгьыли шәыуаажәлари рганахьала ишәымоу абзиабареи ҳазҭагылоу аамҭазы ахә ашьара уадаҩуп. Ҭакҧхықәра дула шәрызнеиуеит ҳтәыла аҩныҵҟатәи, адәныҟатәи аполитика ашьақәгылара иадҳәалоу ауснагӡатәқәа, хаҭала шәлагаламҭа дууп Аҧсны Аҳәынҭқарреи Урыстәылатәи Афедерациеи ирыбжьоу астратегиатә усеицура аус аҿы. Урыстәыла Шәара шәырдыруеит ҳҳәынҭқаррақәа ирыбжьоу ганрацәалатәи аиҩызаратә еизыҟазаашьақәа рырҕәҕәара зҿлымҳара ду азҭо напхгаҩык иаҳасабала.

Аҧсны Жәлар Реизара – Апарламент агәра агоит Шәара Аҧсны Аҳәынҭқарра Ахада имаҵураҿы имҩаҧыжәго аусура аҧхьаҟагьы азакәанҧҵаратә усура аҿиара, адунеи аҿы егьырҭ аҳәынҭқаррақәа аус рыцура амҽхак арҭбаара, арҵаулара ишацхраауа».

 

Ҳаҭыр зқәу Рауль Џьумка-иҧа, 60-шықәса Шәхыҵра шәыдныҳәало, ишәзеиҕьасшьоит агәабзиара, агәамч, шәҭаацәараҿы анасыҧ, Аҧсны жәлар реизҳазыҕьара иазку шәусураҿы аихьӡарақәа!"


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT