Аҧсны Аҳәынҭқарра Ахада

 

Ахада Семион Григориев дидикылеит идипломатиатә миссиа ахыркәшара инамаданы

20.03.2018

Ахада Семион Григориев дидикылеит идипломатиатә миссиа ахыркәшара инамаданы


Хәажәкырамза 20 рзы Аҧсны Аҳәынҭқарра Ахада Рауль Ҳаџьымба Аҧсны Аҳәынҭқарраҿы иҟоу Аҷыдалкаатәии Азинмчзмоуи Урыстәылатәи Афедерациа Ацҳаражәҳәаҩ Семион Григориев дидикылеит идипломатиатә миссиа ахыркәшара инамаданы.

Семен Григориев Ахада адырра ииҭеит Урыстәылатәи Афедерациа анапхгара аӡбамҭа шаднакылаз Аҷыдалкаатәии Азинмчзмоуи Ацҳаражәҳәаҩ иаҳасабала Аҧсны идипломатиатә миссиа ахырхкәшаразы.

«Иахьа Аҧсны Аҳәынҭқарра Адәныҟатәи аусқәа рминистррахь анота дәықәысҵоит Аҧсны ацҳаражәҳәаҩ ҿыц изы аҧснытәи аган азыразхарц азы азыҳәара ацҵаны», - иҳәеит Семион Григориев.

Семион Григориев иаҵшьны иҳәеит иара ари амаҵураҟны иаҭара 10 шықәса раҧхьа ишыҟалаз, Урыстәылатәи Афедерациа Аҧсны Аҳәынҭқарра ахьыҧшымра аназханаҵа ашьҭахь иаразнак.

Уи аҳәынҭқарра Ахада, иара убас ҧасатәи ахадацәа рганахьалагьы иҭабуп ҳәа иеиҳәеит Аҧсны Аҳәынҭқарраҟны Урыстәылатәи Афедерациа раҧхьатәи адипломатиатә миссиа ашьақәгылареи аҳәынҭқаррақәа реизыҟазаашьақәа рырҕәҕәареи рыҟны иҟаҵаз ацхырааразы, иара убас «Урыстәыла ацҳаражәҳәара гәаартыла издызкылаз» Аҧсны ажәлар рзы.

«Аҧсны ахааназы сгәы аҟәырҷахак ахьаансыжьуа ҭыҧхоит сара сзы», - иҳәеит иара имӡакәа.

Рауль Ҳаџьымба Семион Григориев иҭабуп ҳәа иеиҳәеит имҩаҧигаз аусуразы.

«Аҧсны Урыстәыла аганахьала иҟанаҵаз азхаҵара акрызҵазкуа ҭоурыхтә шьаҿоуп, акрызҵазкуа хҭысуп. Шәара Урыстәыла раҧхьаӡакәны хаҭарнакра азызуаз, ҳаизыҟазаашьақәа даҽа ҩаӡарак ахь ашьҭыхра зылшаз аӡә шәоуп», - иҳәеит Ахада.

Аҳәынҭқарра Ахада иазгәеиҭеит Аҧсны жәлар аҧсны-урыстәылатәи аизыҟазаашьақәа рышьақәгылара аҧхьатәи аетап аан Урыстәыла хаҭарнакра азызуаз ауаҩы ибзиара шырхамышҭуа.

Аиҧылара ахыркәшамҭаз, Аҧсны Аҳәынҭқарреи Урыстәылатәи Афедерациеи рыбжьара «аҳәынҭқаррабжьаратә еизыҟазаашьақәа рырҿиараҿы, аҭынчреи аҭышәынтәалареи рырҕәҕәараҿы хаҭалатәи алагаламҭа ду азы аҳамҭа анашьара иазку Аусҧҟа инақәыршәаны», Ахада  Аҷыдалкаатәии Азинмчзмоуи Урыстәылатәи Афедерациа Ацҳаражәҳәаҩ Семион Григориев ианеишьеит «Ахьӡ-Аҧша» аорден I аҩаӡара.

 3.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT