Аҧсны Аҳәынҭқарра Ахада

 

Ахада Аҧсадгьыл архынҳәразы Аҳәынҭқарратә еилакы Ахантәаҩы Беслан Дбар дидикылеит

14.03.2018

Хәажәкырамза 16 рзы Аҧсны Аҳәынҭқарра Ахада Рауль Ҳаџьымба Аҧсадгьыл архынҳәразы Аҳәынҭқарратә еилакы Ахантәаҩы Беслан Дбар дидикылеит

Беслан Дбар аҳасабырба ҟаҵо, далацәажәеит Ҭырқәтәылаҟа имҩаҧгаз аусуратә ныҟәарақәа, иҳаҩсыз ашықәс азы Аҳәынҭеилакы имҩаҧнагаз аусура аихшьала хадақәеи 2018 шықәсазы иазҧхьагәаҭоуи ртәы.

Аныҟәарақәа раан Сакарие аиҧылара нарҭбааны имҩаҧысит аҧсуа диаспора ахаҭарнакцәа 500-ҩык рҟынӡа алархәны. Ара имҩаҧган Адаҧазар иаартхо Аҧсуа культура хан апроект апрезентациа.

«Аиҧылараҿы иҟаз аҭагылазаашьеи апрограммеи Аҧсны ҳаҟазар иаҩызан. Ажәалагала ҳзыҟарҵеит ансамбль “Шьараҭын” Ҭырқәтәыла аконцерттә тур ацхыраара аҭаразы, аконцерт иаиуа ахашәала ахәҭак аҧсуа центр ҿыц аргыларахь идәықәҵахоит. Ҳара ҳганахьала иҳалшо адгылара ҟаҳҵоит», - иазгәеиҭеит Беслан Дбар.

Беслан Дбар иара убас далацәажәеит Стамҧыл иҟоу аҧсуа культуратә центр аиубилеи азгәаҭара иазкыз аныҳәатә усмҩаҧгатә аҽалархәра иазкыз иусуратә ныҟәара. Аҧсны Аҳәынҭқарра Актәи Ахада игәалашаәара амш аҽны Сҭамҧылтәи ацентр аҟны ишымҩаҧысыз агәалашәаратә усмҩаҧгатәқәа.

Беслан Дбар Ахада адырра ииҭеит 2017 шықәсазы Аҧсны Аҳәынҭқарра ишатәылауаҩцәахаз Аҧсныҟа ихынҳәыз 382 –ҩык ахҵәацәа. Уи иара убас иазгәеиҭеит еиҳа гәацҧыҳәарала аиҿцаара шымҩаҧысуа Иорданиа иҟоу адиаспора аганахьала. Иорданиантәи 80 –ҩык инареиҳаны, 26-ҩык Ҭырқәтәылантәи Аҧсныҟа ахынҳәра ишазхиоу.

Аҳәынҭқарра Ахада иаҵшьны иҳәеит иаҭахны ишыҟоу, хара имгакәа адкыларагьы ишазырхиатәу аҧсадгьыл архынҳәразы апрограмма.

«Зҭоурыхтә ҧсадгьыл ахь ихынҳәуа ҳџьынџьуаа адгылара рымазароуп аҵараиура, амедицина, аусурҭа ҭыҧқәа риураҿы, нхарҭа ҭыҧла реиқәыршәараҿы. Арахь ианаа Аҧсны иатәылауааны ишыҟоу рдыруа иҟалароуп», - иазгәеиҭеит Ахада.

Аҳәынҭқарра Ахада иара убас иазгәеиҭеит аҳәаанырцә иҟоу ҳдиаспора ахаҭарнакцәа 2018 шықәсазтәи аусмҩаҧгатә дуқәа рылархәразы ааҧхьара шрыҭатәу.

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT