Аҧсны Аҳәынҭқарра Ахада

 

Жәларбжьаратәи аҳәса рымш азы адныҳәалара

08.03.2018

Хәажәкырамза 8 рзы Аҧсны Аҳәынҭқарра Ахада Рауль Ҳаџьымба атәыла иқәынхо аҳәса ирыдиныҳәалеит Жәларбжьаратәи аҳәса рымш.

Адныҳәалараҿы, ҷыдала, иҳәоуп:

«Акыр иаҧсоу аҳәса!

Гәык-ҧсыкала ишәыдысныҳәалоит ааҧын ныҳәа ссир – Март 8!

Жәытәнатә аахыс шәара ахәышҭаара еиқәырханы иаажәгоит, ааӡара аус шәнапы алакуп, қәҿиарала аус жәуеит, убри аан есқьынгьы шәара ишәыцуп аҿареи аҧшӡареи. Аҧснытәи аҳәса аҭоурых аҿы иеиуеиҧшым аамҭақәа раан ҳуаажәларра шьаҟа ҕәҕәаны ирыҵагылан. 1992-1993 шш. Аҧсны Аџьынџьтәылатә еибашьраҿы шәара ачҳареи агәаҕьреи аашәырҧшит. Сынтәа ҳара Аиааира Амши Аҧсны Ахьыҧшымреи 25 шықәсахыҵра азгәаҳҭоит. Аҵеицәа гәымшәақәа зааӡаз Аҧсны анацәа ирыбзоураны ҳара ҳтәыла аҧеиҧш бзиа агәра го ари арыцхә ду азгәаҳҭоит.

Иҭабуп ҳәа расҳәарц сҭахуп ҳанацәеи ҳаҳәшьцәеи аибашьреи уи ашьҭахьтәи ашықәсқәеи раан иаадырҧшыз ргәымшәаразы, рҟәыҕаразы, рычҳаразы . Рҿаҧхьа схырхәоит аибашьцәа-афырхацәа, Аҧсадгьыл апатриотцәа иашақәа зааӡаз анацәа.

Акыр иаҳзаҧсоу ҳанацәа, ҳаҳәшьцәа, ҳҭыҧҳацәа. Шәара шәахьҳадгылоу, ҳааигәа шәахьыҟоу ҳара ҳзы гәадуроуп, ҳажәлар рыхьӡала аус бзиақәа ҳгәы рызҭашәҵоит.

Шәыгәҭакы бзиақәа шәрыхьӡааит, насыҧла иҭәызааит шәымшқәа зегьы.

Гәык-ҧсыкала ишәзеиҕьасшьоит агәабзиара, аҿара, аҧшӡара, ҩнаҭацыҧхьаӡа иагымзааит аҧхарра, аҳәоуеиқәшәара, анасыҧ».

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT