Аҧсны Аҳәынҭқарра Ахада

 

Ахада аспектакль «Қьелешьбеи» авторцәеи актиорцәеи идикылеит

06.03.2018

Ахада аспектакль «Қьелешьбеи» авторцәеи актиорцәеи идикылеит

Хәажәкырамза 6 рзы Аҧсны Аҳәынҭқарра Ахада  Рауль Ҳаџьымба аспектакль «Қьелешьбеи» арежиссиор, Аҧсны Жәлар рартист Шьалуа Гыцба, ашәҟәыҩҩы, адраматург Анзор Мықәба, Аҧсны Жәлар рартист Софа Агәмааҧҳа, Аҧсны Аҳәынҭқарратә аҿартә театр актиорцәа  Аслан Анқәаби Аслан Еныкьи идикылеит.

Аҳәынҭқарра ахада иазгәеиҭиет аҧсуа театр аҿиара ишаҿу, ахаҿы аҽшаҧсахуа. 

«Сара аспектакль даара исгәаҧхеит. Аҧсуа театр аҿиара иаҿуп, ахаҿра аҽаҧсахуеит. Ари аспектакль ианыҧшит аҧсуа жәлар ирхыргаз ауадаҩрақәа, уи атрадициақәа, ажәлар аӡәыкны иҟазар шакәу узырбо аҭоурых. Ари аспектакль хымҧада ҳахәаҧшцәа ирбароуп», -  иҳәеит Ахада.

Аҧсны Аҳәынҭқарратә аҿартә театр асахьаркыратә напхгаҩы Аҧсны Жәлар рартист Софа Агәмааҧҳа илҳәеит аспектакль арежиссиори лареи рхықәкы апиеса автор иҟынӡа анагара шрылаз. Уи ишеиликааз анырба аусура ишалагаз. 

«Аспектакльқәа аантәы аншлаг рыман – ҳара ҳзы ари иеиҳау насыҧ ыҟаӡам», - лҳәеит Софа Агәмааҧҳа.

Аҧсны Жәлар рартист Шьалуа Гыцба иҳәеит атеатртә қәыргыламҭазы зҵакы ҵаулоу аматериал дшашьҭаз.  

«Абри аус аҿы Анзор Мықәба адгылара сиҭеит. Зегьы ишраҳауа иҭабуп ҳәа иасҳәарц сҭахуп. Уи исҭахыз еиликааит», - иазгәеиҭеит Шьалуа Гыцба.

Анзор Мықәба ицәажәараҿы иҳәеит аспектакль авторцәеи анагӡаҩцәеи аусура иалҵыз алҵшәа ишеигәырҕьо.

«Ҳара ҳтоурых аҟны абас идуу ауаа ҳамоуп. Қьелешьбеи – убарҭ дыруаӡәкуп. Актиорцәа азыҟаҵан. Урҭ рыҳаҭыреиқәҵареи реицхыраареи роуп ақәҿиара ирымоу зыбзоуроу», - иҳәеит Анзор Мықәба.

Актиорцәа ҿарацәа аҳәынҭқарра Ахада иҭабуп ҳәа иарҳәеит, иагьазгәарҭеит Москватәи Аҧсуа Диаспора ааҧхьарала Москваҟа рцара инамаданы ацхыраара шырҭаху.  

«Шәара шәыцхыраарала ҳара ҳгәамч арҿиара иазаҳкуеит, аихьӡара ҿыцқәа рахь ҳнеилоит», - иазгәеиҭеит  Аслан Еныкь.

Акультуреи аҭоурых-культуратә ҭынха ахьчаразы Ельвира Арсалиа иара убас иазгәалҭеит Аҧсуа театр аиҭашьақәгылара ишалагаз.  Аспектакль «Қьелешьбеи» аҿарацәа аҟазареи алитературеи иаднаҧхьалоит, - лҳәеит лара. 

Аиҧылараҿы иара убас иазгәаҭан Аҿартә театр адгылара шаҭахо аҳәынҭқарра аганахьала.   

 

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT