Аҧсны Аҳәынҭқарра Ахада

 

Ахада Гәылрыҧшь араион ахь аусуратә ныҟәара иман

06.03.2018

Ахада Гәылрыҧшь араион ахь  аусуратә ныҟәара иман

Хәажәкырамза 6 рзы Аҧсны Аҳәынҭқарра Ахада Рауль Ҳаџьымба Гәылрыҧшь араион ахь иусуратә ныҟәараан аобиектқәа жәпакы дрыхәаҧшит.

Аҳәынҭқарра ахада аӡыршьҭрақәа ррыцқьаразы имҩаҧгаз аусурақәа рылҵшәақәа гәеиҭеит. Аӡиас Ҧшьаҧ арыцқьаразы имҩаҧгаз аусурақәа Ахада ирезервтә фонд аҟнытә ирзоужьын аа-миллион мааҭк. Ҧшьаҧ ақыҭуаа аҳәынҭқарра Ахада иҭабуп ҳәа иарҳәеит аӡы анхыҵуаз рқыҭанхамҩа ахьаӡәӡәоз азы иҟаиҵаз ацхырааразы. Аӡышьҭра анрыцқьаха ашьҭахь ари апроблема ӡбахеит. Ахада аусура мҩаҧызгоз аиҿкаара анапы ианиҵеит Ҧшьаҧ ацҳа аиҭашьақәыргаларазы мҩақәас иҟоу иахәаҧшырц.

Ахада иара убас арыцқьаратә усурақәа ахьымҩаҧгаз Кәыдры Маҷ аӡышьҭра иатәу аҭыҧқәа дырҭааит. Аусура мҩаҧызгоз ЗҲӘА «Вектор плиус» аиҿкаара аусзуҩы Дмитри Цымцба иажәақәа рыла, аӡыршьҭра напыла ирыцқьан амшын аҧшаҳәа иахьалало аҟынӡа.

«Аӡыршьҭра зегьы 3,5 километр рҟынӡа инаӡоит. Аӡыршьҭра ҳарҭбааит иагьҳарҵаулеит. Аусура амҩаҧгаразы ахарџьынҵа аабеи бжаки миллион мааҭ артәеит»,- иазгәеиҭеит Цымцба. 

Гулрыҧшь араион ахада Аслан Бараҭелиа иҳәеит араионтә еилахәыраҟнытә абиуџьет ахь инеиз ашәахтәқәа аҧхьаҟагьы аӡыршьҭрақәа ррыцқьаразы рхы ишадырхәо.

Рауль Ҳаџьымба иаҵшьны иҳәеит есышықәса аӡыршьҭрақәа шрыцқьалатәу, иҟаҵоу хылаҧшра шаҭалатәу.  

«Ихадароу, аӡхыҵра инамаданы иҟало аҭагылазаашьа хылаҧшра ауҭартә иҟалеит. Излауала ақыҭақәа амш бааҧс иҟанаҵо аҧхасҭа иацәыхьчалатәуп»,- иҳәеит Ахада. 

Аҳәынҭқарра ахада иазгәеиҭеит Кәыдры Маҷ аӡыршьҭраҿы имҩаҧгоу аусура иамоу астратегиатә ҵакы атәы, аӡиас В. Арӡынба ихьӡ зху аҧырра-тәарҭатә цәаҳәа аҵаҟа атоннель иҭысны ицоит азы.

Ахада иара убас Кәыдры аӡыршьҭра иҿықәжьу арыцқьаразы аусура шымҩаҧысуа гәеиҭеит. Арҭ аусурақәа ААР Аекологиа аинститут адиректор Роман Дбар ишазгәеиҭаз еиҧш, ааҧынтәи асыӡыҭрақәа ирылагаанӡа имҩаҧгатәуп. Ус анакәымха, ааигәа ишьҭоу ақыҭақәа аӡхыҵрақәа рҧырхагахоит. Кәыдры аӡиас аҟны аусурақәа мҩаҧысуеит аекологиатә ҷыдарақәа ҳасаб рзуны, аҧсабаратә обиектқәа рбиологиатә еиуеиҧшымра аиқәырхара хықәкыс иҟаҵаны.

Аҳәынҭқарра ахада иара убас Ҧарнаут аӡыршьҭра ахьрыцқьаз, иахьырҵаулаз Гәылрыҧшь аҳабла даҭааит. Аҳаблауаа изларҳәо ала, имҩаҧгаз аусурақәа ирыбзоураны аҩнқәа аӡы рыҩналаӡом.  

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT