Аҧсны Аҳәынҭқарра Ахада

 

Ахада амармалташьтә пты ацәырҵра апроблема инадҳәаланы аилацәажәара мҩаҧигеит

01.03.2018

Ахада амармалташьтә пты ацәырҵра апроблема инадҳәаланы аилацәажәара мҩаҧигеит


Хәажәкырамза 2 рзы Аҧсны Аҳәынҭқарра Ахада Рауль Ҳаџьымба амармалташьтә пты ацәырҵреи уи аҿагыларазы аметодқәеи ирызку аилацәажәара мҩаҧигеит.

 

Аиҧылара иалахәын Аҧыза-министр Беслан Барцыц, изықәнагоу аусбарҭақәа рнапхгаҩцәа, Ақыҭанхамҩа аминистрра, Аекологиеи аҧсабара ахьчареи рзы Аҳәынҭқарратә еилакы, ААР аекологиа аинститут, Аҵиаа акарантин рзуразы аҳәынҭқарратә инспекциа, ақалақьқәеи араионқәеи Рхадацәа убрахь иналаҵны.

Ақыҭанхамҩа аминистр Даур Ҭарба иажәақәа рыла 2018 шықәсазы амармалташьтә пты анырҵәаразы иазҧхьагәаҭоуп 10 миллион мааҭк. Ҳазҭагылоу аамҭазы 3 миллион мааҭк рыхә ахәшә аахәан. Апестицидқәа раионцыҧхьаӡа ирызшахоит. Аминистр иҳәеит аусбарҭа апестицидқәа рхархәара иазку аброшиура аҭыжьразы акьыҧхь ишазнархиз.

Ахада иаҵшьны иҳәеит ҭыҧк мацара алкааны аҧхасҭа ҟазҵо ахәаҷа аҿагылара лыҵшәа аиуӡом, уи Аҧсны ахьынӡанааӡо хылаҧшра аҭаны иеиҿкаазароуп ҳәа.

Аҧсны Аҳәынҭқарра Аҭҵаарадыррақәа ракадемиа Аекологиа аинститут Адиректор Роман Дбар иазгәеиҭеит аӡын шыцәгьамызгьы, инҵәаз ахәаҷа шмаҷым.   Уи аӡын аҳауа аиҭасрақәа ирыбзоурахеит. Иҳәеит ааҧын уи ахыҧхьаӡара шмаҷхо, уи анырҵәаразы аусура еиҳа инарҭбааны ианымҩаҧгахо ҧхынгәымзазы шакәу. Роман Дбар далацәажәеит иара убас амармалташьтә пты иҟанаҵо аҧхасҭа аҿагыларазы италиатәи аҵарауаа рхы иадырхәо аметод атәы.

«Ари акыр зтехнологиа ҳараку методуп. Аплантациақәа рхи-рҵыхәеи гәаҭаны аферомонтә цәҟьақәа шьақәыргыланы, ааигәа иҟоу аҵлақәа рыхәышәтәра мҩаҧгахоит. Ари аметод хықәкыс иамоу ахәаҷа-маҷа хыҧхьаӡара рацәала рнырҵәара акәӡамкәа, иахьынӡауа уи иҟанаҵо аекономикатә ҧхасҭа аиҵатәра ауп. Ари аметод Аҧсны ианаалоит ҳара ҳанхамҩақәа рацәак иахьдуум иабзоураны», - иҳәеит Роман Дбар.

Аҧхасҭа ҟазҵо иеиуеиҧшым ахәаҷа-маҷақәа рҿагыларазы аҳәынҭқарраҟны аҵиаа зегьы рыхьчара асистема рҿыцтәуп, - иазгәеиҭеит Роман Дбар. Зыквалифицикациа ҳараку акадрқәа азыҟаҵатәуп, агрономцәа, аентомологцәа, ҷыдала ара аус иазку иажәыз атехника рҿыцтәуп.

Аилацәажәара ашьҭахь Ахада Аҧыза-министр инапы ианиҵеит аҧхасҭа ҟазҵо апты аҿагыларазы иақәнагогу аусбарҭақәа рхаҭарнакцәа алаҵаны ареспубликатә штаб аҧҵара. Аштаб иалахәу русура еимадазароуп. Араионқәа рхадацәа аҭыҧантәи аштабқәа аҧырҵароуп. Аҵиаазы акарантин иазку аҳәынҭқарратә инспекциа рнапы ианҵоуп раионцыҧхьаӡа аинспекторцәа рыдҵара. Аштаб алахәцәа ианаамҭоу ауааҧсыра адырра рырҭароуп ахәаҷа аҿагыларазы имҩаҧгахо аусура насгьы ианымҩаҧгахо атәы.  

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT