Аҧсны Аҳәынҭқарра Ахада

 

Ахада Нури Ҭаниа Аҧсны Аҳәынҭқарра Аконституциатә ӡбарҭа Ахантәаҩы имаҵурахьы иалхра идиныҳәалеит

02.03.2018

Хәажәкырамза 1 азы Аҧсны Аҳәынҭқарра Ахада Рауль Ҳаџьымба Нури Ҭаниа идиныҳәалеит Аҧсны Аҳәынҭқарра Аконституциатә ӡбарҭа Ахантәаҩы имаҵурахьы иалхра.


Адныҳәалараҿы, ҷыдала, иҳәоуп:


"Гәык-ҧсыкала ишәыдысныҳәалоит Аҧсны Аҳәынҭқарра Аконституциатә ӡбарҭа Ахантәаҩы имаҵурахьы шәалхра.

2016 шықәсазы "Аӡбаратә мчхаразы" Аҧсны Аҳәынҭқарра аконституциатә закәан ала Аҧсны Аҳәынҭқарра Аконституциатә ӡбарҭа аҧҵан. Уи аҧҵара атәыла анапхгара имҩаҧнагоз Аконституциатә реформақәа рзы акрызҵазкуа акы акәны иҟалеит. Ҳара агәыҕра дуқәа адаҳҳәалоит иреиҳаӡоу ари аӡбаратә мчхара, ихадароу уснагӡатәны аҿаҧхьа иқәгылоуп ҳәа иҳаҧхьаӡоит Аконституциа ҧыжәара аҭареи азинтә ҳәынҭқарра ашьаҭақәа реиқәырхареи.  

Ҳтәыла иахьа идемократиатәу азинтә ҳәынҭқарра аҿиара амҩа иануп, убри аҟнытә уажәы иаҧҵоу Аконституциатә ӡбарҭа аҭакҧхықәра ду адуп азин аҧыжәара апринцип анагӡараҿы, атәыла азакәанҧҵара аиҕьтәраҿы, ауааҧсыра зегьы рзинқәа рыхьчара алыршараҿы. 

Сгәы иаанагоит, Шәара шәнапхгарала, Аконституциатә ӡбарҭа ҳреспублика азакәан хада ахьчара иазкхоит ҳәа, аконституциатә ҧҟарақәа, ауаҩы изинқәеи ихақәиҭрақәеи рыхьчараҿы, ауаажәларраҿы аҳәоуеиқәшәара ашьақәыргылараҿы – зегь раасҭа ихадароу – аҳәынҭқарра ахьыҧшымра ашьақәырҕәҕәараҿы иара алагаламҭа духоит ҳәа.   

 Нури Арзадин-иҧа, Шәаргьы шәколлегацәагьы нашәыдкыланы, ишәзеиҕьасшьоит ҳҳәынҭқарра аконституциатә ҵасқәа рыхьчара иазку имариам аус аҿы аихьӡарақәа". 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT