Аҧсны Аҳәынҭқарра Ахада

 

Жәабранмза 26 рзы Аҧсны Ахада Рауль Ҳаџьымба аҧснытәии Аҧсны Аҳәынҭқарра иаду аҳәаанырцәтәи АИХ анапхгаҩцәеи ахаҭарнакцәеи дырҧылеит

28.02.2018

Жәабранмза 26 рзы Аҧсны Ахада Рауль Ҳаџьымба аҧснытәии Аҧсны Аҳәынҭқарра иаду аҳәаанырцәтәи  АИХ анапхгаҩцәеи ахаҭарнакцәеи дырҧылеит

Жәабранмза 26 рзы Аҧсны Ахада Рауль Ҳаџьымба аҧснытәии Аҧсны Аҳәынҭқарра иаду аҳәаанырцәтәи  АИХ анапхгаҩцәеи ахаҭарнакцәеи дырҧылеит.

  Ахада аиҧылара иалахәызи АИХ аусзуҩцәа зегьи Амилаҭтә кьыҧхьи Аҧсны Аҳәынҭқарра АИХ-и рымш рыдиныҳәалеит.

«Аҧсны ажурналистика аҭоурых ду амоуп. 1919 шықәса рзы раҧхьатәи агазеҭ анҭыҵ инаркны ари аусхк аҿиара иаҿуп. Сара ихасҵоит ҳаҧхьаҟа аихьӡара дуқәа шаҳзыҧшу, ҳҳәынҭқарра ашьақәгылараҿы, ҳәарада, ҳжурналистикаҿы. Макьана иҟаҵоу рацәамзаргьы, иҳауит жәларбжьаратәи аҧышәа, атехникатә лшарақәа ианаамҭоу зхаҭабзиара ҳараку аинформациа ауаа рызнагаразы. Шәусура мариаӡам. Аиаша аҳәара уадаҩуп зны-зынла, аха ус адагьы ҧсыхәа ыҟаӡам. 

Сынтәа  25 шықәса ҵуеит Аҧсны Аџьынџьтәылатә еибашьраҟны Аиааира ҳгеижьҭеи. Аибашьра ашықәсқәа раангьы ҳжурналистцәа рзанааҭ ирыднаҵоз иацәхьамҵӡакәа, гәымшәарада аибашьра адәаҿы ррепортажқәа ҟарҵон, хәызмаӡам ахроника аҧҵо», - иазгәеиҭит Ахада.

Ажурналистцәа Реидгыла Ахантәаҩы,  Ателеилахәыра «Абаза-ТВ» Адиректор хада Руслан Ҳашыг аиҧылара иалахәыз иргәалаиршәеит 2001шықәсазы Аҧсны Аҳәынҭқарра Актәи Ахада Владислав Арӡынба инапы шаҵаиҩыз аҧсуа газеҭ “Аҧсны” актәи аҭыжьымҭа ацәырҵра арыцхә инақәыршәаны ”Аҧсны Амилаҭтә кьыҧхьи АИХ-и рымш аҧҵаразы Аусҧҟа.

Руслан Ҳашыг Ахада иҭабуп иеиҳәеит Аҧсны Амилаҭтә кьыҧхьи АИХ-и рымш азгәаҭараҿы иҟаиҵаз адгыларазы. Уи иара убас АИХ аганахьала иҟарҵо ацхырааразы иҭабуп ҳәа реиҳәеит Ахада, Апарламент. Иазгәеиҭеит ареспубликаҟны ишыҟоу амедиатә ҭыҧқәа иеиуеиҧшым  аполитикатә позициақәа раарҧшразы, дрылацәажәеит Ажурналистцәа реидгыла Аҧсны ажурналисттә усхк аҿиаразы, азанааҭдырра ашьҭыхразы, ажурналисттә усумҭақәа ирызку аицлабра ҿыцқәа рылаҳәаразы аҧхьаҟатәи апланқәа.

Руслан Ҳашыг иара убас иҳәеит Апарламенти Ажурналистцәа реидгылеи АИХ аусзуҩцәа рыбжьара азакәанҧҵаратә мчхара аусура еиҳа иреиҕьны аарҧшра иазку аицлабра амҩаҧгара иазку Аҧҟара ишаҵарҩыз.   

  Агазеҭ «Республика Абхазиа» аредактор хада Иури Ҟәурасқәуа иазгәеиҭит ари АИХ ахаҭарнакцәа злахәу аибашьрашьҭахьтәи еиҧылараны ишыҟоу ачаижәра аформат ала имҩаҧгоу. 

«Абри аформат ала имҩаҧысуа аиҧылараҿы угәаанагарагьы уҳәоит, акрызҵазкуа азҵаарақәагьы урылацәажәоит. Иформалтәым аҭагылазаашьа атәыла анапхгара ҳусура, ҳапроблемақәа ишрызҿлымҳау атәы ҳанаҳәоит, АИХ зегьы ирыцхраар шырҭаху атәы.  Иазгәасҭарц сҭхауп,  Руслан Ҳашыг  дааизар, Ажурналистцәа реидгыла аусура шҿыхаз. Сынтәа аицлабрақәа мҩаҧган. Хжурналистцәа сырҽхәар сҭхауп. Дасу ирықәнагоу ала рыхә шьан. Урҭ ҳреспубликазы ихәарҭаз атемақәа аадырҧшуан», - иҳәеит, ҷыдала, Иури Ҟәурасқәуа.

  Аинформациатә усбарҭа «Абхазиа Информ» аредактор хада Манана Гәргәлиа лколлегацәа рзнааҭтә ныҳәа рыдылныҳәалеит.

«Зегьы ирзеиҕьасшьоит аихьӡарақәа, аҧхьаҩцәеи, ахәаҧшцәеи ззыҧшу еиҳа ҵакы змоу ажәабжьқәа. Ҷыдала иазгәасҭарц сҭахуп ажурналистцәа ҿарацәа ацәырҵра ишалагаз, зҟыбаҩ бзиоу,  зҿлымҳара зуҭаша аматериалқәа аззырхио. Зегьы абзиарақәа шәзеиҕьасшьоит», - лҳәеит Манана Гәргәлиа.

ААТЕ Адиректор хада ихаҭыҧуаҩ Рада Аргәын иазгәалҭеит Ажурналистцәа реидгыла имҩаҧнагаз аицлабра ажурналистцәа русура ргәы азҭазҵо акы акәны ишыҟалаз, аматериалқәа рганахьала арҿиаратә знеишьақәа рыҧшаара ишазнархәыцуа. Уи иара убас иаҵшьны илҳәеит ажурналистика аҿиара ишаҿу Аҧсны араионқәа рҟынгьы. 

 Агазеҭ «Ехо Абхазии» аредактор хада Витали Шариа гәахәарыла иазгәеиҭит  Аҧсны Амилаҭтә кьыҧхьи АИХ-и рымш нарҭбааны азгәаҭара. 

«Аҵыхәтәантәи аамҭазы ари амш нарҭбааны азгәаҭара иалагеит. Сгәы иаанагоит аҧхьаҟагьы иацҵахап ҳәа», - иҳәеит иара.

Аиҧылараан Ахадеи АИХ ахаҭарнакцәеи Аҧсны Аҳәынҭқарраҟны ажурналистика иеиуеиҧшым ахырхарҭақәеи апланқәеи ирылацәажәеит.

   

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT