Аҧсны Аҳәынҭқарра Ахада

 

Ахада Уасил Царгәыш дидикылеит

01.02.2018

Ахада Уасил Царгәыш дидикылеит

Жәабранмза 1 азы Аҧсны Аҳәынҭқарра Ахада Аҧсны Жәлар рартист, Аҧсны аҳәынҭқарратә жәлар рашәаҳәареи рыкәашареи зҽаҧсазтәыз ансамбль асахьаркыратә напхгаҩы, адирижиор хада, адиректор Уасил Царгәыш дидныҳәалеит 80 шықәса ихыҵра инамаданы.  

Ахада Уасил Царгәыш ииубилеи идиныҳәалеит, акультура аусхк аҟны Аҧсны Аҳәынҭқарра ахьӡ-аҧша аҭыгараҿы имоу аихьӡарақәа азгәеиҭеит.  

«Аҧсуа жәлар рҟазараҿы Шәара шәызнысыз амҩа ҳтәылаҿы зегьы ибзианы ирдыруеит.  Шәара напхгара зышәҭо аҳәынҭқарратә ансамбль аӡбахә раҳахьеит Аҧсны анҭыҵгьы. Сара агәра згоит иҵегьы акыр шықәса иахьа шәнапы злаку аус аҿы аихьӡара ҿыцқәа раарҧшра шшәылшоазы. Ишәзеиҕьасшьоит агәабзиара, арҿиаратә лшарақәа», - иҳәеит Ахада.

Уасил Царгәыш Ахада иҭабуп ҳәа иеиҳәеит ииубилеи инадҳәаланы иҟаиҵо адгылареи азеиҕьашьарақәеи рзы.    

Аҭҵаарадырреи, акультуреи, аҵараиуреи рзы Ахада иабжьгаҩ  Владимир Занҭариа иазгәеҭеит Уасил Царгәыш Аҧсны Жәлар рартист, Аҧсны аҳәынҭқарратә Аҧсны жәлар рашәаҳәареи рыкәашареи зҽаҧсазтәыз ансамбль анапхгаҩы идагьы, ашәақәа шәки егьырҭ амузыкатә аҧҵамҭақәеи равтор иаҳасабала илшамҭақәа.

Акультуреи аҭоурых-культуратә ҭынхеи рыхьчаразы аминистр ихаҭыҧуаҩ  Беслан Гурџьуа  зиубилеи азгәарҭо аҟаза ихьӡала адныҳәаларақәа ирыцҵаны, изеиҕьеишьеит агәамчи арҿиаратә еихьӡара ҿыцқәеи. 

Аиҧылара ахыркәшамҭаз Ахада Уасил Царгәыш агәалашәаратә ҳамҭақәа ианеишьеит.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT