Аҧсны Аҳәынҭқарра Ахада

 

Ахада Аҟәа араион актив дырҧылеит

31.01.2018

Ахада Аҟәа араион актив дырҧылеит

Ажьырныҳәамза 31 рзы Аҧсны Аҳәынҭқарра Ахада  Рауль Ҳаџьымба Аҟәа араион актив дырҧылеит.

Аҟәа араион анапхгара ахада ихаҭыҧуаҩ  Алхас Ҷыҭанаа араион 2017асоциалтә-економикатә усура арбагақәа рылеиҳәеит. Абиуџьеттә рбагақәа 134,4% нагӡоуп,  урҭ 801 миллион мааҭ дыртәоит, иазҧхьагәаҭаз аицҵалыҵ 56, 390 миллион мааҭ иаҿырҧшны. 

"Аплан ахыхь инагӡаз иалнаршеит араион аҟны асоциалтә уснагӡатәқәа рыӡбаразы иазгәаҭаз ахархәагақәа ирыцҵаны рзоужьра. Ирҿыцын ақыҭақәа рҿы аӡымҩангагақәа  4,6 миллион мааҭ рыхә, ақыҭамҩақәа реиҭашьақәыргылара мҩаҧган 5,8 миллион мааҭ рыхә. Ақыҭанхамҩа аҿиара иазоужьын 3,1 миллион мааҭ. Ирҿыцын афымцацәаҳәа, Шыцкәара ашкол аспортзал аҧенџьырқәа",- иҳәеит Алхас Ҷыҭанаа. 

2017 шықәсазы аҧсабаратә машәыр аҧыхра иазкын Ахада ирезервтә фонд аҟнытә иазоужьыз 12,7 миллион мааҭ, аматериалтә ҧхасҭа зауыз ацкы ахәҭак рызшәара, ақәыршҩы црыҵцарҭақәеи ақыҭамҩақәа жәпаки ррыцқьара убрахь иналаҵаны.  Иара убас аиҭашьақәыргылара иалагеит  Иашҭхәатәи абжьаратәи ашкол №2 ахыбра. 

Аҧсны Аҳәынҭқарра асоциалтә-економикатә ҿиара ацхырааразы Аинвестициатә программа аҳәаақәа ирҭагӡаны араион аҟны имҩаҧысуеит Ӡиӡариа имҩеи Каман ақыҭа мҩеи реиҭашьақәыргылара.

Абыргцәа рхеилак араионтә ҟәша ахантәаҩы  Антип Мархолиа иқәгылараҟны иаҵшьны иҳәеит аҳәынҭқарратә усбарҭақәа ишақәнагоу аус руларц азы ауаажәларра-политикатә ҭагылазаашьа аҭышәынтәалара иамоу аҵакы атәы.  Уи иара убас  ареспублика ауааҧсыра зегьы рышҟа ихы рханы ааҧхьара ҟаиҵеит арҩышьыгатә маҭәашьарқәа рыларҵәара иаҿагыланы ақәҧараҿы аусеицуразы, агәҽанызаара амазааразы.   

Аҳәынҭқарра ахада дықәгылеит асоциалтә-аекономикатәи аполитикатәи ҭагылазаашьеи аҵыхәтәантәи аамҭазы аполитикатә хҭысқәеи ахәшьара рыҭо.   

 Ахада иажәахә аҟны иазгәеиҭеит Аҟәа араион – абиуџьеттә рбагақәа рынагӡараҟны аихьӡарақәа змоу ишыруаку. Ешыратәи афронт ацәаҳәаҟны иҭахаз аибашьцәа абаҟа рзыргалара далацәажәо, Ахада иазгәеиҭеит амонументалтә ҟазаразы аҳәынҭқарратә комиссиа ишьақәнарҕәҕәараны иҟоу апроект азырхиара шаҭаху.   

 Ешыратәи ашкол арҿыцра атәы далацәажәо, аҳәынҭқарра Ахада ирылеиҳәеит ари аусмҩаҧгатә аҧхьаҟатәи Аинвестпрограмма иаларҵараны ишыҟоу.  

«Ешыратәи ашкол еиҭашьақәыргылатәуп. Ари ҭоурыхтә школуп, уи еиҭа араион азы ихәарҭаны иҟалароуп», - иҳәеит Ахада.

Аҳәынҭқарра Ахада иара убас иазгәеиҭит ареспублика аҩныҵҟа шықәсқәак рыҩныҵҟала иҟалаз аҩныҵҟаполитикатә еиҭакрақәа ртәы. 

«Аӡбаратә уснагӡаҩцәа русуразы алшарақәа аҧҵоуп. Иааҳартит аҳәынҭқарратә усбарҭақәа рныхтәқәа ҕәҕәала рхылаҧшра алзыршо аҧараеизакырҭа. Ирыдаҳгало аиҭакрақәа рынагӡара ишазхиамгьы ҳбалоит. Аамҭақәак раҧхьа Аиҳабыреи ҳареи ҳалацәажәеит апрограмма  «Аекономикатә ҿиаразы 25 шьаҿа». Апарламент аҟны абри азы иақәнагоу аусура мҩаҧгамкәа апрограмма анагӡара алшаӡом. Избан акәзар ари аконституциатә реформаақәа ирыдҳәалоуп. Ара аусеицура аҭахуп апрограмма алагалара ҳазхиазар», - иҳәеит ҷыдала Ахада.

Ахада Апрокурор хада  Зураб Ачба Аҧсны аҳәынҭқарра Аҵәахырҭатә банк аҟны акредит иргаз змырхынҳәыз рсиа акьыҧхьразы идиҵаз дахцәажәеит.  Иаҧҵоуп аусуратә гәыҧ Амилаҭтә банк Ахантәаҩы, апрокурор хада, Аҩныҵҟатәи аусқәа рминистр, Аӡбаратә уснагӡаҩ хада злахәу. Уи аусура алҵшәақәа рыла акьыҧхьра зыхәҭоу аматериалқәа зегьы АИХ ирыҭахоит.   

Аиҧылара иалахәыз ҷыдала, аӡымҩангагақәа, амҩатә инфраструктура, афымцамч азҵаараҟны иҟоу ауадаҩрақәа рыӡбара ирыдҳәалаз азҵаарақәа жәпакы рҭиит. Арҭ азҵаарақәа рзы аҳәынҭқарра Ахада Аҟәа араион анапхгара Ахада иақәнагоу анапынҵақәа ииҭеит.   

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT