Аҧсны Аҳәынҭқарра Ахада

 

Ахада Гәылрыҧшь араион активи ауаажәларреи дырҧылеит

23.01.2018

Ахада Гәылрыҧшь араион активи ауаажәларреи дырҧылеит

Ажьырныҳәамза 23 рзы Аҧсны Аҳәынгҭқарра Ахада  Рауль Ҳаџьымба Гал араион актив   дырҧылеит.

   

Араионтә еизара Ахантәаҩы Иури Кәакәасқьыр иқәгылараҿы иазгәеиҭеит  Гал араион 2017 шықәсазтәи арбагақәа шыбзиоу, ақыҭанхамҩатә культурақәа рзы иҧырхаганы ицәырҵыз амармалташьтә пты иадҳәалоу ауадаҩрақәа шыҟазгьы, абри апты аҿагыларазы  Ақыҭанхамҩа аминистрра 4 миллион мааҭк инареиҳаны ишазоунажьыз. Араион анапхгара ҩынтәны авиациа ахархәарала ахәшәқәҭәара мҩаҧнагеит, имҩаҧган егьырҭ ауснагӡатәқәагьы, аха изықәгәыҕуаз алҵшәақәа ыҟамызт иҳәеит Иури Кәакәасқьыр. 

Уи иара убас иаҵшьны иҳәеит, аҵыхәтәантәи ахышықәса рыҩныҵҟала ауаа рҕьычра ишаҟәыҵыз, араион аҟны еиҳа ишҭынчрахаз.   

  Барҕьаҧ ақыҭа ахада Важа Салаҟаиа иқәгылараҿы иҳәеит 2010 шықәса инаркны 2014  шықәсанӡа 21 –ҩык ауаа шымҵадырсхьаз, урҭ рыхә ыҵхразы ауаа ишрылҵыз х-миллион мааҭк рҟынӡа  аҧара.   

«Аҵыхәтәантәи хышықәса рыҩныҵҟа, Ахада ҿыц аусура далагеижьҭеи уи аҩыза ыҟаӡам. Араион анапхгареи амчратә еилазаарақәеи русеицура иабзоураны ҭынч анхаразы аҭагылазаашьа ҳзаҧҵоуп. Егьыс, ҳара иҳалшо ҟаҳҵоит, аусура ҳаҿуп»,- иазгәеиҭеит Важа Салаҟиа. 

Аҧыза-министр Беслан Барцыц иажәақәа рыла араион аплантә рбагақәа 93% дыртәеит.    48 миллион мааҭ ахьазҧхьагәаҭаз, аплан анагӡара иартәеит  45 миллион мааҭ.   Ареспубликатә дотациақәа ианаамҭоу араион абиуџьет ашҟа ииааган аҟнытә  араион анапхгара абиуџьеттә хыдҵақәа  рынагӡарагьы алшеит.  Беслан Барцыц иҳәеит Аинвестициатә программа аҳәаақәа ирҭагӡаны, Гал араион аҟны  аӡымҩангара аҟәшаҟны Гал ақалақь аҿы аӡымҩангага хадеи арыцқьагатә коллектори шыҧсаху, ишырҿыцу аҵеиџьқәа ҧшьба. Иеиҭашьақәыргылоуп иара убас Гал ақалақь аҟны аҕәраҵақәа фба. Зегь раасҭа зыхә ҳараку проектны иҟоуп  160 миллион зықәхарџьхаз ақыҭақәа Хьацҳеи Пичореи ирыбжьысуа амашьынамҩақәа. Гал араион араионтә хәышәтәырҭа иара убас иауит акоммуникациатә техника, техникалагьы иеиқәыршәоуп,  иҳәеит Аҧыза-министр  . 

Ахада иқәгылараҟны иазгәеиҭеит Гал араион аҟны азинтә леишәа аганахьала аҭагылазаашьа шҭышәныртәалахаз.  Гал араион ареспублика егьырҭ араионқәа ишраҧысуа афымцамч азы ашәатәи адгьылтә шәахтәи рызҵаарақәа рыҟны. 

Аҳәынҭқарра ахада иҳәеит ареспублика есааира ахатәы биуџьеттә лшарақәа рхархәарахьы аиасра ишалаго. Урҭ макьана идуумзаргьы, реизҳара аҭагылазаашьа аиҕьхара ишаҿу атәы рҳәоит.   

Рауль Ҳаџьымба иара убас аиҧылара иалахәыз ауааҧсыра тәанчахәыла аиқәыршәареи анхаразы аршаҳаҭгеи ирыдҳәалаз азҵаарақәа рҭакқәа ҟаиҵеит. 

Аиҧылара ахыркәшара анаҩс Ахада Гал араион ахәышәтәырҭа хада даҭааит, дахәаҧшит амагниттә-быжьныҩратә  уада аргыларазы иазгәаҭоу аҭыҧ. Ара хархәара зауа  амыруга аахәоуп, уи аусура ианаларгаха, аҳәаанырцә ргәабзиара агәаҭаразы ицо  ҳтәыла ауааҧсыра рхыҧхьаӡара акыр иеиҵахоит. 

 

 

 

 . 

 

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT