Аҧсны Аҳәынҭқарра Ахада

 

Ахада Гәдоуҭа араион ауааажәларра дырҧылеит

18.01.2018

 Ахада Гәдоуҭа араион ауааажәларра дырҧылеит

Ажьырныҳәамза 18 рзы Аҧсны Аҳәынҭқарра Ахада Рауль Ҳаџьымба Гәдоуҭа араион ауааажәларра дырҧылеит.

Гәдоуҭатәи абжьаратә школ № 1 адиректор Валико Ҭаниа иқәгылараҟны аизара иалахәыз иргәалаиршәеит 1967 ш. инаркны 1989 шықәсанӡа имҩаҧысуаз амилаҭ-хақәиҭратә қәҧара ахҭысқәа. Усҟан аинтеллигенциа ажәлар ракра иаҿырҧшыганы иқәгылеит, аимак-аиҿак амҩаҧгашьаҟны, аиашамра, ақәнамга аҿагылараҟны, - азгәеиҭеит иара. 

«Усҟан уи ҳҳәынҭқарреи ҳажәлари реиқәырхара иацхрааит. Аҿар идҳарбо иарбан ҿырҧшу?  Аӡәы диашамзар, унеины ҭынч иҳәа, аҳәатәы умазар. Ауаа рус иазыҟәугои Аҟәа шәеизароуп ҳәа? Ҳара иаҳҭаху амал ауп. Уи цәгьаӡам, аха уи арҳашьа аформақәа ыҟоуп. Ҳхымҩаҧгашьақәа ҳмырҽеир, ҳҳәынҭқарра аҿиара аиураны иҟаӡам.  

Уаҳа ҩныҵҟала аиҿагыларақәа ҳзырцәымцеит. Уи ҳаҟәымҵыр, ҧеиҧш ҳамамкәа ҳаанхоит», - иҳәеит Валико Ҭаниа.

Абжьаратә школ № 1 адиректор Валико Ҭаниа иқәгылара ахшыҩҵак хадақәа ирыдгылеит  иара убас Абыргцәа рхеилак иалахәу Шота Қапбеи Жәындрыҧшь абжьаратә школ адиректор Џьума Габуниа.

Аиҧылара далахәын иара убас Аҧсны Жәлар рпоет  Рушьбеи Смыр.

Аҧыза-министр Беслан Барцыц иазгәеиҭит ауадаҩрақәа шыҟоугьы, 2017шықәсазы Приморское ақытаҟны иҟаз ахҭысқәа инарымаданы, анапхгара аҿаҧхьа иқәгылаз аҳасабтәқәа шаӡбаз.  Аҧыза - министр иҳәеит асоциалтә-економикатә ҿиара иазку Аинвестициатә программа аҳәаақәа ирҭагӡаны Гәдоуҭа араион аҿиара иазку инагӡоуи иазҧхьагәаҭоуи аусмҩаҧгатәқәа  ртәы -ишымҩаҧгаз алифтқәа рыҧсахра, ауадарацәа змоу аҩынқәа реиҭашьақәыргылара, ақыҭақәа жәпакы рыҟны аӡымҩангагақәа рыҧсахреи реибыҭареи, Афон ҿыц ишдыргылаз ахәыҷбаҳча, Лыхны ақыҭан ишеиҭашьақәыргылаз ашкол ахыбра.  

Аҳәынҭқарра ахада иқәгылараҿы асоциалтә-економикатә ҿиара, аполитикатә ҭагылазаашьа ахәшьара аиҭеит  иара убас аиҧылара иалахәыз рызҵаарақәа рҭак ҟаиҵеит.   

Аусмҩаҧгатә иалагаанӡа Ахада дахәаҧшны ибеит  зыргылара иаҿу Сергеи Дбар ихьӡ зху Аџьынџьтәылатә еибашьра амузеи ахыбра. 

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT