Аҧсны Аҳәынҭқарра Ахада

 

Урыстәылатәи Афедерациа Ахада иалхра аҽазыҟаҵараҟны ацхыраара аҟаҵара иазку аилацәажәара

12.01.2018

  Ажьырныҳәамза 12 рзы Аҧсны Аҳәынҭқарра Ахада Рауль Ҳаџьымба аилацәажәара мҩаҧигеит 2018 шықәса хәажәкырамзазы Урыстәылатәи Афедерациа Ахада иалхра Аҧсны аҽазыҟаҵараҟны ацхыраара аҟаҵара иазку аилацәажәара.

       Аҧсны иҟоу Аҷыдалкаатәии Азинмчзмоуи Урыстәыла ацҳаражәҳәаҩ  Семион Григориев иҳәеит 2018 шықәсазы ишыӡбоу Аҧсны иахьаҵанакуа алхырҭатә ҭыҧқәа  жәба инадыркны жәаф рҟынӡа раартразы.

     Рауль Ҳаџьымба иазгәеиҭеит Аҟәа ақалақь аҟны инхо  Урыстәылатәи Афедерациа атәылауаа хыҧхьаӡарала ишеиҳау, убри аҟнытә алхырҭатә ҭыҧқәа ишрыцҵатәу хымҧада.  

    «Ҳара иаҳҭахӡам абжьыҭира зҭаху ауаа агәаран иқәгыланы аҧшра рықәшәар», - иҳәеит Ахада.

Семион Григориев иазгәеиҭит аҭыҧқәа рмаҷра акомиссиақәа ирылахәу иааҧмырҟьаӡакәа Урыстәылатәи Афедерациаҟны инхо Урыстәылатәи Афедерациа атәылауаа рымацара ахьракәу  ишахҟьо, абри инамаданы алхырҭатә ҭыҧқәа рыцҵаразы ауадаҩрақәа цәырҵуеит. 

Аилацәажәараан аӡбара рыдыркылеит ареспубликаҟны алхырҭатә ҭыҧқәа рхыҧхьаӡара шыҟоу иааныжьны, Аҟәа ақалақь аҟны даҽа ҭыҧк ацҵазааит ҳәа. 

Алхрақәа разыҟаҵаразы аусура аиҿкаара инапы ианҵан Аҧыза-министр  Беслан Барцыц.

Беслан Барцыц иазгәеиҭеит Аиҳабыра Урыстәылатәи Афедерациа Ахада иалхра, уаанӡеиҧш, ҩаӡара ҳаракыла имҩаҧысырц азы иақәнагоу аусқәа зегьы шымҩаҧнаго.  

Ахада иара убас адҵа ҟаиҵеит алхрақәа рымш аҽны ауаажәларратә транспорт еиҧҟьарада аныҟәара хылаҧшра аҭазарц. 

Аҩныҵҟатәи аусқәа рминистрреи Аҧсны Аҳәынҭқарра Ашәарҭадара амаҵзуреи рнапы ианҵоуп алхрақәа раан ашәарҭадара хылаҧшра арҭарц. 

Аилацәажәара иалахәын  Аҧыза-министр  Беслан Барцыц, Ахада Иусбарҭа Анапхгаҩы Даур Аршба, Ахада Иусбарҭа Анапхгаҩы Актәи ихаҭыҧуаҩ  Дмитри Шамба, Алхратә еилахәыра хада Ахантәаҩы Ҭамаз Гогьиа, Аҧсны Аҳәынҭқарра Ашәарҭадара амаҵзура Ахантәаҩы  Зураб Маан, Аҩныҵҟатәи аусқәа рминистр Гарри Аршба, Аҧсны иҟоу Аҷыдалкаатәии Азинмчзмоуи Урыстәыла ацҳаражәҳәаҩ Семион Григориев.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT