Аҧсны Аҳәынҭқарра Ахада

 

Ахада Аԥсны Аҳәынҭқарра Жәлар Реизара - Апарламент изаамҭанытәим аизара даҭааит

05.01.2018

Ажьырныҳәамза 5 рзы Аԥсны  Аҳәынҭқарра Ахада Рауль Ҳаџьымба   Г.Лукава Қырҭтәылатәи аган иаҭара инамаданы Жәлар Реизара  - Апарламент изаамҭанытәим аизара даҭааит.

Ахада адепутатцәа иреилиркааит Г.Лукава Қырҭтәылатәи аган иаҭара иадҳәалоу аҭагылазаашьеи уи иара дшазыҟоу атәи.

 «Г.Лукава ақырҭуа ган иаҭаразы Аусԥҟа акыр аамҭа имҩаԥысуаз ауснагӡатәқәа ирыдҳәалан. Уи алагеит 2015 шықәса цәыббрамзазы, Алада Уаԥстәыла Ахада Леонид Тибилов 25 шықәсеи рыԥсы ахьынӡаҭоуи аҭакра зқәыз ртәылауаа реиҭныԥсахларазы иҟаиҵаз аҳәарала. Уи инадҳәаланы аӡбамҭа сыдыскылеит. Аҳәынҭқарра Ахада, иаҳасабала, ари ашьаҿа политикатә актны исыԥхьаӡоит. Уи нагӡатәын 2008 шықәсазы иҟалаз аҭагылазаашьақәа ҳасаб рзуны. Усҟантәи аҭагылазаашьа шыуадаҩыз зегьы ибзианы иаҳгәалашәоит. Ақырҭуа архәҭақәа рымч зегьы Алада Уаԥстәыла иазынархан. Усҟан ирытҟәаз ауаԥс ҷкәынцәа хымԥада ирхынҳәтәын. Ҳаиашьаратә тәыла Ахада иҟаиҵаз аҳәара зыӡбахә ҳамоу аус шьаҭас иаиуит. Уи анагӡара уадаҩын. Ақырҭуа ган иҟаҳҵаз ажәалагала ахатә знеишьа азцәырнагеит. Дара иҳадыргалаз асиа ианын 20-ҩык инареиҳаны ауааԥсыра, аха ҳара ааҩык реиҭныԥсахлароуп ҳзықәшаҳаҭхаз. Иахьа изларҳәо ала, ас еиԥш иеиҟарам аиҭныԥсахлара амҩаԥгара иашам. Ҳара ҳтәыла аҭоурых аҟны иҟоуп еиҭныԥсахларада ҳаҷкәынцәа анҳарҭоз. Ари зегьы ибзианы ирдыруеит, уи ақырҭуа гани ҳареи ҳаизыҟазаашьақәа ирхылҵыз ҭагылазаашьоуп.

Убасҵәҟьа ҳара ҳганахьалагьы инаҳагӡон ҳаруаа рырхынҳәразы иаҭахыз аусмҩаԥгатәқәа. Уи ҳара ҳзы зегь реиҳа ихадоуп.

Аҿҳәара аиҵыхра аӡбахә ҳҳәозар, ақырҭуа ган Лукава хымԥада ирхынҳәра ишадгылаз атәы ҳәатәуп. Уи ихьӡ раԥхьа иаарышьҭыз асиа ианын. Аиашазы, уи ирхынҳәра излаҳалшоз ала иахҳарԥон, аха ақырҭуа ган иҟанаҵоз ақәыӷәӷәареи хыԥхьаӡара рацәала Қырҭтәыла иҟоу Аԥсны ацәгьоура ҟазҵаз ҳтәылауааи Лакаеви Аԥсны  наҟ-наҟ рырхынҳәра алыршареи ҳасаб рзуны, ас еиԥш иҟоу аӡбамҭа ҳадаҳкылеит.

Ақырҭуа ган есымша ари азҵаара аӡбара ахырҧо иаауан. Анаҩс, Алада Уаԥстәыла Ахада иалхрақәа мҩаԥысуан. Уи иаԥхьа ахадас иҟази ҳареи аиҿцәажәарақәа мҩаԥаҳгон, алхрақәа рыбжьара Ахада инапынҵақәа назыгӡоз иахьгьы иацҵаны ашәҟәқәа нашьҭын, уи ашьҭахь ҿыц иалырхыз Ахада ари аус иациҵеит. Абарҭқәа зегьы иҟалаз аҿҳәара ахырԥара мзызс иаман.

Убри ашьҭахь имҩаԥысуаз аусқәа зегьы ақырҭуа ҵакырадгьыл аҟны иҟоу ҳтәылауаа рырхынҳәра иадҳәалан. Уи Алада Уаԥстәыла атәылауаа рырхынҳәра апроцесс иамадан. Даҽа хықәкык ҳашьҭамызт.

Ас еиԥш иҟоу аӡбамҭа сыдыскылаанӡа Апарламент ԥасатәи ааԥхьараҟны иаартны ирылаҳҳәеит ари азҵаара аартны, иалацәажәеит. Адепутатцәа зегьы ақәшаҳаҭхеит ас еиԥш ашьаҿа адкылара. Ус иагьыҟаҳҵеит. Хәажәкырамзазы ари апроцесс хацыркын, шықәсык иназынаԥшуа имҩаԥысуан», - иҳәеит Ахада. 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT