Ахада Ақыҭанхамҩа аминистрра аихшьалатә еилатәара даҭааит

Ԥхынҷкәынмза 26 рзы Аԥсны Аҳәынҭқарра Ахада Рауль Ҳаџьымба Ақыҭанхамҩа аминистрра аихшьалатә еилатәара далахәын.

Аҳәынҭқарра Ахада инаҵшьны иазгәеиҭеит ақыҭанхамҩа аусхкы ҳтәыла аекономиказы имҩақәҵаганы иахьыҟаз аҵак ду шамоу. Уи дазааҭгылеит атуризм аҿиареи аҳәынҭқарратә биуџьет ашьақәыргылареи рҿы ари ахырхарҭа акыр шаҵанакуа.

«Иахьа аҭыԥ змоу аԥшьгамҭақәа угәы шьҭырымхыр рылшом, аха имаҷымкәа аиԥҟьарақәагьы ыҟоуп. Ааԥынтәи ацәаӷәарақәа рыӡбахә шьҭышәхит иахьа. Ишәылшаз ыҟоуп, агхақәагьы ыҟоуп, аха иҟаҳҵаз аҟны ҳаангылар ҟалом. Шықәсқәак раԥхьа иаахәаз атехника ажәит. Урыстәылатәи Афедерациа ацхыраарала ҿыц иааҳхәеит 200 млн мааҭ рыхә ақыҭанхамҩатә техника. Иҳамоу амыругақәа ҳреиҷаҳалароуп, урҭ ԥырхага рымҭакәа рхархәара алҳаршароуп. Абри атехника ҿыц ҳхы иархәаны ааԥынтәи ацәаӷәарақәа ҳрылагароуп. Ари аус знапы алакхо зегьы рхатәы техника ишазныҟәарыз еиԥш иазныҟәар бзиан. Даҽакы ҳара иҳамаӡам», - иҳәеит Ахада.

Аҳәынҭқарра Ахада инаҵшьны иазгәеиҭеит иҟоу ацитрустәи ачаитәи плантациақәа реиқәырхареи реихаҳареи аԥсыӡтә нхамҩа арҿиареи ҳамч рыдаҳҵар шакәу. «Аԥснаалыҵекспорт» захьӡу аҳәынҭқарратә експорттә еилазаара Аԥсны анҭыҵ иалганы иагахьеит 500 тонна иреиҳаны ацитрустә шәырқәа, анхаҩцәа ирықәнагоу аҟәрышь реиҳараӡакгьы ирызшәоуп. Ахада агәрагара ааирԥшит ас еиԥш иҟоу раԥхьатәи иҵоуроу ашьаҿақәа наҟ-наҟгьы ишрыцҵалатәу.

Аҳәынҭқарра Ахада аҵыхәтәаны иҳәеит абиуџьет иамоу алшарақәеи иааиуа ашықәсазы иазгәаҭоу аусмҩаԥгатәқәеи ақыҭа аиқәырхареи арҿиареи, иара убасгьы аԥсуа нхаҩы дшыхьчоу агәра иргареи ишырзынархоу.


Возврат к списку