Аҧсны Ахада Аџьынџьтәылатә еибашьра дуӡӡа аветеранцәа (иҭахаз) рҭаацәа рнапаҿы ириҭеит “Аҧсны Афырхаҵа”амедальқәа

Ҧхынҷкәынмза 25 рзы Аҧсны Ахада 1941-1945 Аџьынџьтәылатә еибашьра дуӡӡа аветеранцәа (иҭахаз) рҭаацәа рнапаҿы ириҭеит “Аҧсны Афырхаҵа”амедальқәа.

Аҳәынҭқарра Ахада иазгәеиҭеит зықьҩыла арҧарцәеи аҭыҧҳацәеи афашизм иаҿагыланы ишықәгылаз атәылеиҧш, ауааатәыҩса зегьы ринтересқәа рыхьчаразы.

«Рыцҳараз иҟалаз, иахьа ҳаҭырла ара зыхьӡ азгәаҳҭо ауаа рлахьынҵа ус акәхеит, рыҧсы шҭаз ирыҭатәыз аҳамҭақәа, арс акәу анс акәу, изыхҟьазаалак, иранашьахартә изыҟамлеит», - иҳәеит Рауль Ҳаџьымба.

Ахада даҧхьеит Урыстәылатәи Афедерациа архив аҟнытә иаашьҭыз СССР аиҳабыратә ҳамҭа ҳаракқәа анашьаразы, асовет Еидгыла Афырхаҵа ҳәа ахьӡ ахҵаразы аҳамҭатә бҕьыцқәа ирныз алкаақәа.

«Сара сзы гәадуроуп ас еиҧш аҭагылазаашьа ахьсоуз, ҳара иахьа иҳалшоз зегьы ҟаҳҵеит аҭоурых қәнага ашьақәыргыларазы. Аӡәгьы хашҭра иқәымзароуп, абас еиҧш иҟоу ауаа ргәалашәара абиҧарақәа инеимда-ааимдо иеиқәдырхароуп. Агәра ганы сыҟоуп абарҭ аҿырҧштәқәа рылоуп аҿар рааӡара шаҭахугьы ҳәа», - иҳәеит Рауль Ҳаџьымба.

«Аҧсны Афырхаҵа ҳәа ахьӡ ахҵаразы» Аҧсны Аҳәынҭқарра Ахада Иусҧҟала 1941-1945 Аџьынџьтәылатә еибашьра дуӡӡаан Аҧсны афырхаҵа ҳәа ахьӡ рыхҵоуп рыҧсҭазаара ианалҵ ашьҭахь Агрба Қьазым Хәаҭхәаҭ-иҧа, Басариа Ушьанги Ҟараман-иҧа, Кәарҷиа Ҷыка Баклан-иҧа, Кәакәасқьыр Григори Бас-иҧа.


Возврат к списку