Аҧсны Аҳәынҭқарра Ахада

 

Ахада жәларбжьаратәи аицлабрақәа рыҟны аиааира згаз дырҧылеит

22.12.2017

Аҳәынҭқарра Ахада аспортсменцәеи урҭ разыҟаҵаҩцәеи аҧсшәа реиҳәеит.

«Ҳаҭыр зқәу аҩызцәа! Акыр иаҧсоу ҳаспортсменцәа!

Гәахәара дула бзиала шәаабеит ҳәа шәасҳәоит! Сынтәатәи ашықәс мариамызт шәара шәзы. Аҽазыҟаҵарақәа сааҭла, уахгьы-ҽынгьы ааҧсарада. Аха баша аџьа шәымбеит. Иахьа мацара акәӡам, абас ҳтәыла ахьӡ ҭыганы, хьӡи-ҧшеи змоу аиааирақәа шәыманы шәаҳзаалоижьҭеи. Ари гәышьҭыхгоуп ҳажәлар рзы, ҳҳәынҭқарразы.

Аицлабраҟны иаҧсаны ақәгылара, иақәнагоу аҭыҧ аанкылара мариаӡам. Аха жәларбжьаратәи аиҧыларақәа рҿы аҳәынҭқарратә бираҟ кны ацәырҵра - ари ҷыдала аҭакҧхықәра дуӡӡа ацуп. Усҟан ҳара ҳрызгәдууп ижәго аиааирақәа.

Ҳәарада, лымкаала иазгәаҭатәуп зҧышәеи зҟазареи шәымаздо азыҟаҵаҩцәа рроль. Дара роуп ишәҧыло ауадаҩрақәагьы, ишәымоу ақәҿиарақәагьы шәыцеиҩызшәо.

Аҳәынҭқарра аргылараҟны аҭыҧ ҷыда аанныркылоит аспорти абаҩрҵәыреи. Уи амилаҭ ргәабзиара уасхырс иазышьҭоуп. Шәара шәықәҿиарақәеи шәеихьӡарақәеи ҿыц игыло аспортсменцәа рзы иҿырҧшыгоуп, ҷыдала аҵакы ду амоуп аҿар аспорт ала агәабзиара азхьарҧшра ахьшәылшо.

Шәара, ҳаҧсадгьыл аҵеира иаҧсоу, хьӡы-ҧшала аҳәаанырцә шәықәгыларақәа Аҧсны жәлар уаҵәтәи амш, аҧеиҧш бзиа агәра ддыргоит.

Гәык-ҧсыкала ишәзеиҕьасшьоит ақәҿиарақәа, аиааира ҿыцқәа!», - иҳәеит Рауль Ҳаџьымба.

Абаҩрҵәыреи аспорти рзы Аҧсны Аҳәынҭқарратә еилакы Ахантәаҩы Баграт Хәытаба иҭабуп ҳәа реиҳәеит азыҟаҵаҩцәа, иара убас урҭ иазыҟарҵо аспортсменцәа.

«Ҳара ҳзы гәадуроуп жәларбжьаратәи аицлабрақәа раан аҧсуа бираҟ ашьҭыхра. Иҭабуп ҳәа шәаҳҳәоит иҳашәҭо адгыларазы. Иҭабуп ҳәа расҳәоит азыҟаҵаҩцәа, аспорт знапы алаку аҿар, урҭ рҭаацәа, Апарламент, иҳадгылоу зегьы. Ауадаҩрақәа иҟаз ҳашьҭахьҟа иныжьны ҧхьаҟа ҳцоит аихьӡара дуқәа рышҟа», - иҳәеит иара.

Амилаҭтә Олимпиатә еилакы Ахантәаҩы Валери Аршба иазгәеиҭит Аҧсны аҿар аихьӡарақәа ахьрымоу аспорт мацараҟны шакәым.

«Акраҵанакуеит ҳтәылаҟны абас еиҧш аҿар ахьҳамоу. Аицлабрақәа ирылахәу аҿар есқьынгьы аиааирақәа рыманы иаауеит. Насыҧуп аспорт аҟны иаҧсоу аҿар агылара иахьаҿу. Иҭабуп ҳәа шәасҳәоит, аманшәалара шәзеиҕьасшьоит», - иҳәеит иара.

Аҧсны аспорт ахаҭарнакцәа иара убас дрыдныҳәалеит 2012 шықәсазтәи Олимпиатәи ахәмаррақәа рыҟны аџьазтә ҧхьахә занашьаз, хынтәтәи Адунеи ачемпион Денис Царгуш. Уи ирзеиҕьеишьеит агәабзиареи аихьӡара ҿыцқәеи.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT