Аҧсны Аҳәынҭқарра Ахада

 

Ахада «Ахьӡ-аҧша» аорден занашьоу ауаажәларратә усзуҩцәа аҳәынҭқарратә ҳамҭақәа ранеишьеит

19.12.2017

Ахада «Ахьӡ-аҧша» аорден занашьоу ауаажәларратә усзуҩцәа аҳәынҭқарратә ҳамҭақәа ранеишьеит

Ҧхынҷкәынмза 19 рзы Аҧсны Аҳәынҭқарра Ахада Рауль Ҳаџьымба «Ахьӡ-аҧша» аорден занашьоу еиуеиҧшым аусхкқәа рыҟны иналукааша аусзуҩцәа аҳәынҭқарратә ҳамҭақәа ранеишьеит.

***

Ҳаҭыр зқәу ҳауаажәлар! Акыр иаҧсоу аҩызцәа!

Иахьатәи ҳаиҧылара мҩаҧысуеит Ашықәс ҿыц аламҭалаз. Гәык-ҧсыкала ишәыдысныҳәалоит иааиуа аныҳәамшқәа. Ишәзеиҕьасшьоит агәалаҟара бзиа, агәамч, анасыҧ, досу шәнапы злаку аус аҿы ақәҿиара дуқәа!

Традициала ишаҧу еиҧш, ҳҳәынҭқарра аргылараҿы зҽалызкааз, намысла зуалҧшьақәа ирызныҟәо ауаа иранаҳшьоит аҳәынҭқарратә ҳамҭақәа. Шәара шәеихьӡарақәа, шәылшамҭақәа дыруп, пату рықәуп.

Иахьа ҳаҭыр дула ҳрыхцәажәартә аҭагылазаашьа ҳамоуп аҭҵаарадырратә, ауаажәларра-политикатә, асоциалтә-економикатә, ақыҭанхамҩатә, акультуратә-ҟазаратә, аспорттә, аекологиатә уҳәа ахырхарҭақәа рҿы иналукааша ахаҭарнакцәа.

Шәара шәџьабаа ауаажәларратә ҵак ду амоуп. Шәзанааҭ дырра, хаҭала шәнапы злаку аус азнеишьа, шәыҧсадгьыл ашҟа иаашәырҧшуа агәыбылра – зегь рыла иҿырҧшыгоуп.

Сгәанала, зегь реиҳа ихадароу, – еиҵагыло абиҧара ҿыцқәа рзы иҿырҧшыгоуп шәара шәыҧсҭазааратә мҩа, шәара шәҧышәа. Иарбанзаалак аҳамҭа – ари баша символтә дыргам. Ари досу иҧсадгьыли ижәлари рҿаҧхьа иааирҧшыз алшамҭақәа разгәаҭара иазку хәшьароуп, гәрагароуп. Убри аҟнытә, сара агәахәара ду снаҭоит, аҳамҭақәа шәанашьо, сшәыдныҳәалартә алшара ахьсымоу.

Иҭабуп ҳәа шәасҳәарц сҭахуп иахьагьы, ааҧсарак ҟамҵакәа, қәҿиара дула имҩаҧыжәго аусуразы. Даҽазныкгьы ишәзеиҕьасшьоит агәабзиара, аманшәалара, аихьӡара ҿыцқәа! 

img_2192.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT