Аҧсны Ахада Александр Чачба (Шервашиӡе) иҭаацәа идикылеит

Аҧсны Ахада Александр Чачба (Шервашиӡе) иҭаацәа идикылеит

Ҧхынҷкәынмза 12 рзы Аҧсны Аҳәынҭқарра Ахада Рауль Ҳаџьымба раҧхьатәи аҧсуа профессионалтә сахьаҭыхҩы Александр Чачба (Шервашиӡе) иҭаацәа идикылеит.

Ахада Александр Чачба (Шервашиӡе) иҭаацәа аҧсшәа реиҳәеит.

«Аҧсны, шәҭоурыхтә ҧсадгьыл аҟны, шәабду дуӡӡа иҧсадгьыл аҟны шәбара сара сзы гәахәароуп. Ҳара иҳабжьоу аимадара аиқәырхара акраҵанакуеит аҧхьаҟатәи абиҧарақәа Аҧсны акультураҟны злагаламҭа дуӡӡоу аҟаза ду дырдырразы. Иара дызнысыз имариам амҩа аҧсуа жәлар рзы иаҵанакуа рацәоуп.

Иҭабуп ҳәа шәасҳәарц сҭахуп шәара, уи игәалашәара мырӡкәа аиқәырхара иацхраауа зегьы, Боча Аџьынџьал, Аҧсны анҭыҵгьы зҭоурых адунеи ахырҵәаразы аусура ду мҩаҧызго. Аҟаза, Урыстәылеи мраҭашәаратәи адунеии иадҳәалаз, еиҟәыҭхашьа имамкәа иҧсадгьыл Аҧсынгьы дадҳәалан. Ҳәарада, ҳара иахьа иҳалшо зегьы ҟаҳҵалароуп иааиуа абиҧарақәагьы дырдыруазарц, ҳжәытә ҭоурых ҳхамыршҭкәуа ҳҳәынҭқарра аргыларазы. Иҭабуп шәахьҳадгылоу азы. Сгәы иаанагоит ҳаимадарақәа аҧхьаҟа иҵегьы иҕәҕәахалоит ҳәа», - иҳәеит Ахада.

Александр Чачба (Шервашиӡе) имоҭа Демосфен Заицев аҳәынҭқарра Ахада иҭабуп ҳәа иеиҳәеит ааҧхьаразы.

«Ҳара шьҭа ҳазу амҩа ҳацәхьаҵраны ҳаҟаӡам. Иҭабуп ҳәа шәаҳҳәоит ҳабду игәалашаәара мырӡкәа иахьаажәго, ара иара ҩышықәса заҵәык шракәызгьы дахьыҟаз. Ус иҟалеит, иара Урыстәыла ҩынҩажәижәаба шықәса дынхон, ҩынҩажәижәаба – аҳәаанырцә. Дыхьыҟазаалакгьы, Аҧсны дазхәыцуан, иҩымҭақәа зегьы иара иазкуп. Иҭахын Аҧсны анышә дамардарц. Сан даара лгәы лнархьит иҧсы шҭаз дахьихьымӡаз. Инижьыз иҩырақәа дрыҧхьо лҿанаалха, џьашьахәыс илоуит шаҟа ирацәаз Аҧсны иазку анҵамҭақәа. Иахьа иҧсадгьыл аҟны ибаҟа шьахә гылоуп», - иазгеиҭеит ицәажәараҿы Демосфен Заицев.

Александр Чачба (Шервашиӡе) ишәҟәқәа равтор, ажурналист, аҟазараҭҵааҩ Боча Аџьынџьал иҳәеит асахьаҭыхҩы иҟазара иазку амузеи еиҿкаатәуп ҳәа игәы ишаанаго.

Акәультуреи аҭоурых-культуратә ҭынха ахьчареи рзы аминистр Ельвира Арсалиа илҳәеит иазгәаҭоу асахьаҭыхҩы иусумҭақәа рцәыргақәҵа нарҭбааны ишымҩаҧгахо.

«Саргьы иҭабуп ҳәа сҳәарц сҭахуп Шервашиӡе иналукааша аҧсуа ҟаза дуӡӡаны дшыҟаз даҽазныкгьы иаҳгәалазыршәо аусмҩаҧгатәқәа реиҿкааразы алшара ахьҳамоу. Ари ахьӡ адунеи аҿы еицырдыруа, Бенуа, Головин, Бакст рыхьыӡқәа инарываргыланы зыӡбахә уҳәаша, аҭоурых аҟны иҭыҧ иҵегьы иналкааны иазгәаҭазароуп. Ихадароу хҭысны иҟалоит – ацәыргақәҵа. Арҭ аусмҩаҧгатәқәа 100 инареиҳаны усумҭа реиқәыршәаразы алшара ҳарҭеит. Ас еиҧш зымҽхак ҭбаау ацәыргақәҵа ҳара ҳзы иҟамлаӡац аҵыхәтәантәи ҩажәижәаба шықәса рыҩныҵҟа. Иахьа иҭабуп ҳәа расҳәарц сҭахуп Боча Мџьыҭ-иҧагьы, асасцәа, Александр Шервашиӡе иҭаацәа. Биана Александр-иҧҳа илылшаз рацәоуп аҟаза ду иусумҭақәа иҧсадгьыл ахь рырхынҳәразы», - лҳәеит Ельвира Арсалиа.

Акультуреи, аҭҵаарадырреи, аҵареи рзы Ахада Иабжьгаҩ В. Занҭариа иаҵшьны иҳәеит Александр Чачба (Шервашиӡе) Аҧсны акультура аҿиаразы ихәыцрақәа ирыҵоу актуалра атәы.

«Сара лассы-лассы Александр Константин-иҧа иҩырақәа сырзыхынҳәлоит. Урҭ Аҧсны акультура аҿиара аконцепциа аҧҵара рылшоит. Иахьа ҳара ҳазлацәажәо ҳкультура апроблемақәа зегьы иара инҵамҭақәагьы ирныҧшуеит. Хра злоу акы ауп ҳәа сгәы иаанагоит иахьа ихьӡ иадҳәаланы имҩаҧысуа ахҭыс дуқәа. Избан акәзар арҭ адыррақәа аҿар ирымадатәуп», - иҳәеит Владимир Занҭариа.


Возврат к списку