Аҧсны Аҳәынҭқарра Ахада

 

Ахада Урыстәылатәи Афедерациа Аиҳабыра Ахантәаҩы ихаҭыԥуаҩ Александр Хлопонин диԥылеит

08.12.2017

Ахада Урыстәылатәи Афедерациа Аиҳабыра Ахантәаҩы ихаҭыԥуаҩ Александр Хлопонин диԥылеит

Ԥхынҷкәынмза 8 рзы Аԥсны Аҳәынҭқарра Ахада Рауль Ҳаџьымба Урыстәылатәи Афедерациа Аиҳабыра Ахантәаҩы ихаҭыԥуаҩ Александр Хлопонин диԥылеит.

Аҳәынҭқарра Ахада Урыстәылатәи Афедерациа Аиҳабыра Ахантәаҩы ихаҭыԥуаҩ бзиала уаабеит ҳәа иаҳәо, иазгәеиҭеит иахьатәи амш азы азҵаарақәа рацәаны ирыхцәажәараны ишыҟоу.

«Шәбара сгәы иахәоит. Иахьа ҳрылацәажәараны ҳаҟоуп, раԥхьаӡа иргыланы, Аинвестициатә программа иадҳәалоу азҵаарақәа. Сынтәазы иазгәаҭаз аусмҩаԥгатәқәа рынагӡара активла иаҿуп, урҭ зегьы ашықәс нҵәаанӡа ихыркәшахап ҳәа агәыӷра сымоуп», - иҳәеит Рауль Ҳаџьымба.

Александр Хлопонин инаҵшьны иазгәеиҭеит Аԥсны Аҳәынҭқарра Аиҳабыреи дареи русеицура ҩаӡара ҳаракыла ишымҩаԥысуа.

«Ҳҳәоу ахьеиқәымшәо ҳәа акгьы ыҟам. Шәкы инареиҳаны аусмҩаԥгатәқәа рынагӡара азгәаҭоуп, 85 обиект аексплуатациахь ирырҭахьеит. Иахьа лҵшәақәак еихаҳшьалап ҳәа сгәы иаанагоит», - иҳәеит иара.

Урыстәылатәи Афедерациа Аиҳабыра Ахантәаҩы ихаҭыԥуаҩ Александр Хлопонин иазгәеиҭеит Рауль Ҳаџьымбеи Владимир Путини реиԥылара ашьҭахь иқәыргылаз адҵақәеи урҭ ирыдҳәалоу азҵаарақәеи ахылаԥшра шрымоу.

«Иахьа ҳалацәажәоит урҭ инҭкааны рынагӡара иадҳәалоу азҵаарақәа. Арахь амҩа ҳанықәыз иаҳбеит ҷыдала ирццактәу, хырԥашьа змам ауснагӡатәқәа рымҩаԥысра ишаҿыз. Урҭ адгьылҳәазара иахҟьаз ҭагылазаашьақәоуп. Уажәы иаҳбоит уи зегьы ахыркәшарахь ишнеиз», - иҳәеит иажәа иацҵо Александр Хлопонин.

Ахада иажәаҟны ииасуа ашықәс азы аҭыԥ змаз аԥсабаратә цәырҵрақәа, Приморск ақыҭан иҟалаз аԥжәара, аҳәынҭқарратә мҩаду аҟны адгьылҳәазара иахҟьаны аҭагылазаашьа уадаҩ ҳтәыла афинанстә лшарақәа анырра ӷәӷәа шрырҭаз дазааҭгылеит.

«Ус егьа иҟазаргьы, ари амҩаду Аԥсни Урыстәылеи еимаздо мҩа заҵәыкны иҟоуп. Урыстәылатәи Афедерациа иҟанаҵо ацхыраара иабзоураны аусурақәа реиҳарак ахыркәшарахь инеит. Аха ҳаԥхьа макьана ишьҭоуп зымҽхак ҭбаау анагӡатәқәа, ҳара урҭ апроблемақәа раԥыхразы алшарақәа ҳаԥшаароуп», - иҳәеит Рауль Ҳаџьымба.

Аҳәынҭқарра Ахада инаҵшьны иазгәеиҭеит ари аҳәынҭқарратә мҩаду акурортқәа ринфраструктуреи атуристцәа рцара-аареи зыдҳәалоу мҩа заҵәык шакәу, уи инамаданы иҟоу апроблемақәа рыӡбара хымԥада ишаҭаху.

1958C074-8121-4023-8A2D-55B3A0766E04.jpeg

95645513-B709-4629-B169-DD79D4EE47B4.jpeg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT