Аҧсны Аҳәынҭқарра Ахада

 

Ахада ИАР еснагьтәи аиҿкааҩ, ИАРАА еснагьтәи ахаҭарнак Нильс Скотт диԥылеит

01.12.2017

Ахада ИАР еснагьтәи аиҿкааҩ, ИАРАА еснагьтәи ахаҭарнак Нильс Скотт диԥылеит

Ԥхынҷкәынмза 1 азы Аԥсны Аҳәынҭқарра Ахада Рауль Ҳаџьымба Иеиду Амилаҭқәа Реиҿкаара еснагьтәи аиҿкааҩ, Иеиду Амилаҭқәа Реиҿкаара Аҿиара Апрограмма еснагьтәи ахаҭарнак Нильс Скотт диԥылеит.

Нильс Скотт Аҳәынҭқарра ахада иҭабуп ҳәа иеиҳәеит аиԥыларази, иара убасгьы Аԥсны шықәсык иҭагӡаны ИАРАА инанагӡаз аусура аҳасабырба адгалара алыршарази.

«Ишәыдаагало аҳасабырба иагәылоуп Аԥсны иҟоу жәларбжьаратәи аиҿкаарақәа русуразы аинформациа. Агәыӷра ҳамоуп ҳусура шәҳәынҭқарра атәылауаа ишрыхәо», - иҳәеит Нильс Скотт.

Иара иазгәеиҭеит жәларбжьаратәи аиҿкаарақәа русура иахырхарҭа хадақәаны ишыҟоу ақыҭанхамҩа, аекологиа, агәабзиарахьчара. 2017 шықәсазы урҭ ирыцлеит амармалташьтә ԥты ақәхразгьы аусура.

Ахада инаҵшьны иазгәеиҭеит жәларбжьаратәи аиҿкаарақәа аус рыцуразы алшара Аԥсны Аҳәынҭқарразы аҵак ду шамоу. Аԥсабара ԥырхага азҭо ахәаҷа-маҷақәагьы ақыҭанхамҩа ааха ду шанаҭаз дазааҭгылеит.

«Раԥхьа ашьхаҩ, нас амармалташьтә ԥты ааха ӷәӷәа ҳарҭеит. Арҭ аԥхасҭа ҟазҵо ахәаҷа-маҷақәа рықәхразы жәларбжьаратәи аиҿкаарақәагьы инарыгӡо аусмҩаԥгатәқәа ицәгьам алҵшәа ҳарҭеит, аха урҭ азхом. Аҭагылазаашьа шьаҭанкыла аҽаԥсахит ҳәа ҳҳәартә ҳаҟам. Ҳаицхыраар ауп алҵшәа бзиа анҳауа», - иҳәеит Аҳәынҭқарра ахада.

Рауль Ҳаџьымба иажәақәа ирыцҵо, иҳәеит жәларбжьаратәи аиҿкаарақәеи Аԥсни егьырҭ ахырхарҭақәа рҟны русеицура шыманшәалоу, ҷыдала иааугозар, имаҷуи абжьаратәи абизнесқәа рылахәразы ауааԥсыра алшара рыҭараҟны. Иара инаҵшьны иазгәеиҭеит жәларбжьаратәи аилазаара хаз иҟоу ҳәынҭқарраны иҳахәаԥшуазҭгьы, аусқәа еиҳа аҿиара бзиа роур шрылшоз.

7F5A6421.JPG 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT