Аҧсны Аҳәынҭқарра Ахада

 

Рауль Ҳаџьымбеи Анатоли Бибилови реиԥылара

26.11.2017

Рауль Ҳаџьымбеи Анатоли Бибилови реиԥылара

Абҵарамза 26 рзы Аԥсны Аҳәынҭқарра Ахада Рауль Ҳаџьымба Алада Уаԥстәылаҟа иофициалтә визит аҳәаақәа ирҭагӡаны Алада Уаԥстәылатәи Ареспублика Ахада Анатоли Бибилов диԥылеит.

Анатоли Бибилов: Ҳаҭыр зқәу Рауль Ҳаџьымба, иашьак иеиԥш сышәзыҟоуп. Алада Уаԥстәыла шәбара агәахәара ду ҳнаҭоит. Ишәыдысныҳәалоит Аԥсны Аконституциа амш, ишәзеиӷьасшьоит аҭынчра, аизҳазыӷьара, аԥеиԥш лаша.

Аԥсуаа аусура бзиа избо, зыԥсадгьыл аизҳазыӷьара иашьҭоу уаауп. Ҳтәылақәа рыбжьара аимадарақәа аҿиарамҩа бзиа иануп. Уи шьақәнарӷәӷәоит Алада Уаԥстәыла Ахада Аԥсныҟа иофициалтә визити Аԥсны Аҳәынҭқарра Ахада Алада Уаԥстәылаҟа иофициалтә визити. Ҳара ҳацҳаражәҳәарҭақәа аус бзианы ируеит. Аекономика аганахьалагьы аимадарақәа рыҽдырҭбаалоит. Иахьа анапы аҵаҩхоит ақыҭанхамҩа иадҳәалоу аиқәшаҳаҭра. Агәра згоит аҩганктәи аизыҟазаашьақәа аҩаӡара ҳарак ахь ишкылсуа, ҳажәларқәа ирхырҳаганы ишыҟало. Бзиала шәаабеит Алада Уаԥстәылаҟа.

Рауль Ҳаџьымба: Ҳаҭыр зқәу Анатоли Илиа-иԥа, ҳаҭыр зқәу ҳҩызцәа, ҳашьцәа. Ҳара ҳзы игәахәара дууп Алада Уаԥстәыла аҭаара. Иахьа хынтәуп арахь саауеижьҭеи, аҳәынҭқарра ахада иаҳасабала – раԥхьатәиуп. Сара сгәы шьҭнахуеит ҳтәылақәа рыбжьара иҟоу аизыҟазаашьақәа иаҳа-иаҳа рҽахьдырҭбаауа. Уи шьаҭас иамоуп шәышықәсала ҳажәларқәа еимаздо аҭоурых ҵаула.

Ҳара изныкымкәа иазгәаҳҭахьеит ҳҳәынҭқаррақәа знысхьоу амҩа шымариамыз. Ҳәарада, аибашьраҟны аиааира шаҳгаз еиԥш, аҭынч ԥсҭазаараҟынгьы аиааира гатәуп. Иахьатәи аамҭазы ицәгьоуп ҳаԥсҭазаара еиӷьхаразы аекономикатә ҭагылазаашьа ашьҭыхра. Урыстәыла иҟанаҵо ацхыраара иабзоураны ҳаҩҳәынҭқаррак ашьақәгылара иаҿуп. Ҳара Урыстәыла ҳазханаҵеит, уажәшьҭа ҳнапы иануп хаз ҳәынҭқарра ӷәӷәақәаны ҳаҟалара.

Иахьа анапы зҵарыҩраны иҟоу аиқәшаҳаҭрақәа адҵа ҿыцқәа ҳҿаԥхьа иқәдыргылоит. Урҭ аекономикатә, агуманитартә, акультуратә усхкқәа ирзынархоуп. Арҭ аимадарақәа хымԥада ишаҭаху зегьы агәра ганы ҳаҟоуп.

8279C0B5-0D52-439B-A9E7-5E502C9C299E.jpeg 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT