Аҧсны Аҳәынҭқарра Ахада

 

Ахада Аҧсны жәлар Аконституциа Амш рыдиныҳәалеит

26.11.2017

Абҵарамза 26 рзы Аҧсны Аҳәынҭқарра Ахада Рауль Ҳаџьымба Аҧсны жәлар ирыдиныҳәалеит Аҧсны Аҳәынҭқарра Аконституциа Амш.

Адныҳәалараҿы, ҷыдала, иҳәоуп:

"Ҳаҭыр зқәу сыуаажәлар!

Гәык-ҧсык ала ишәыдысныҳәалоит Аҧсны Аҳәынҭқарра Аконституциа Амш!

Абҵарамза 26 1994 ш. ирыдыркылаз Аҧсны Аҳәынҭқарра Азакәан хада 1992-1993 шш. рзы Аҧсны жәлар амилаҭ-хақәиҭратә қәҧара иахәҭа хаданы иҟалаз аиааира шьақәнарӷәӷәеит.

Милаҭрацәала иеилоу Аҧсны жәлар ирхыргаз ауадаҩрақәеи арыцҳарақәеи шырацәазгьы, ҳара иҳалшеит ҳхала ҳҧеиҧш ачаҧаразы алшара ҳзаагара. Ҳ-Конституциаҟынгьы Аҧсны асуверентә, адемократиатә, азинтә ҳәынҭқаррак аҳасабала ишыҟоу шьақәҳарӷәӷәеит.

Азинтә система ҿыц аиҿкаареи иҭышәынтәалоу аполитикатә система аргылареи шьаҭас ирымоуп аконституциатә ҧҟарақәа неиҩымсрада рықәныҟәареи аконституциа ахаҭа ахьчареи.

Аконституциаҟны иаарҧшу аидеиақәеи апринципқәеи шьаҿа-шьаҿала аҧсҭазаара иалаҳарҵәалароуп, Азакәан хада ақәныҟәара алҳаршалароуп, дарбанзаалакгьы ҳҳәынҭқарра атәылауаҩ Аконституциаҟны иарбоу изинқәеи ихақәиҭрақәеи ажәала акәым, аус аҟны ииашаҵәҟьаны ишыхьчоу идырыртә.

Ҳаҭыр зқәу Аҧсны жәлар! Ишәыдысныҳәалоит Аныҳәа ду - Аконституциа амш!"


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT