Аҧсны Аҳәынҭқарра Ахада

 

Ахада Женеватәи аиҿцәажәарақәа Рацхантәаҩы Анти Турунен диԥылеит

22.11.2017

Ахада Женеватәи аиҿцәажәарақәа Рацхантәаҩы Анти Турунен диԥылеит

Абҵарамза 22 рзы Аԥсны Аҳәынҭқарра Ахада Рауль Ҳаџьымба дидикылеит Аахыҵ Кавказ ашәарҭадареи аҭышәынтәалареи рзы ЕАР аҟынтәи Женеватәи аиҿцәажәарақәа Рацхантәаҩы Анти Турунен.

Ахада Анти Турунен Аԥсныҟа бзиала уаабеит ҳәа иеиҳәеит. Рауль Ҳаџьымба иазгәеиҭеит Женеватәи аиҿцәажәарақәа раан ихадоу азҵаарақәа рацәаны ишрылацәажәо, урҭ рахьтә ирыӡбахьоу шыҟоугьы, аԥхьаҟа ишьҭоу аусура шмаҷым.

«Зынагӡара иаҿу аусқәа алҵшәа бзиақәа аадырԥшып ҳәа агәыӷра сымоуп. Урҭ ирыдырҵо аџьабаа амҽхак дууп», - иҳәеит Ахада.

Аҳәынҭқарра Ахада инаҵшьны иҳәеит ақырҭуа ган ҳара ҳзы акрызҵазкуа азҵаарақәа рыӡбара аҿагылара ӷәӷәа шарҭац ишарҭо.

«Макьана имҩаԥгатәу аусқәа рацәоуп, ҳазқәу амҩа хароуп», - иациҵеит Ахада.

Анти Турунен Рауль Ҳаџьымба иҭабуп ҳәа иеиҳәеит дахьидикылаз азы.

«Иҭабуп Шәареи сареи ҳаиԥылара ахьалыршахаз азы. ЕАР аҟынтәи Женеватәи аиҿцәажәарақәа Рацхантәаҩы иаҳасабала иахьа ара сыҟазаара аҵыхәтәантәиуп. Иҭабуп ҳәа шәасҳәар сҭахуп иҟашәҵо адгыларазы», - иҳәеит иара.

Анти Турунен иазгәеиҭеит Женеватәи аиҿцәажәарақәа имарианы ишымҩаԥымсуа. Уа ирылацәажәоит акрызҵазкуа азҵаарақәа рацәаны, иаҳҳәап, акультуратә ҭынха ахьчара, архивқәа рымдара, аекологиатә зҵаарақәа, аха зегь реиҳа ихадоу зҵаараны иқәгылоуп амч ахамырхәара азҵаара.

Уи иажәақәа рыла, иахьатәи аамҭазы ԥхьацара шыҟоугьы, иааҳакәыршаны иҟоу аԥсабара ахьчараҟны, адокументқәа реиҭныԥсахлараҟны, аҭоурых-культуратә ҭынха ахьчараҟны иззааиз шырацәоугьы, ауадаҩрақәа маҷымкәа ирыцуп.

Анти Турунен инаҵшьны иазгәеиҭеит, ас еиԥш иҟоу адиалогқәа рҟны ихадароу аҭыԥ шааныркыло Кавказтәи арегион зегь аҟны аҭынчра аиқәырхареи, иара убасгьы Аԥсны асоциал-економикатә ҿиареи азҵаарақәа.

«Сара Женеватәи аиҿцәажәарақәа срыцхантәаҩуижьҭеи быжь-шықәса ҵуеит. Избоит ари аамҭа иалагӡаны Аԥсны иҵоуроу аҿиарамҩа ишану, ҷыдала иааугозар, асоциалтә хырхарҭаҟны, аекономикеи аинфраструктуреи русхкаҟны аҭагылазаашьа шеиӷьхаз», - иҳәеит иара.

Анти Турунен иара убасгьы иацҵо иҳәеит ЕАР аструктурақәа иеиуеиԥшым азҵаарақәа, ҷыдала иааугозар – аҵареи, адокументациеи уб.егь., наҟ-наҟгьы ацхыраара арҭарц ргәы ишҭоу.

«Иҭабуп сара хаҭалеи, снапы иану адҵақәа рҟни, аус сыцызуа зегьи ирзыҟашәҵо адгыларазы. Сара сышьҭахь иааиуа ацхантәаҩгьы абас еиԥш адгылара ишәҭап ҳәа агәыӷра сымоуп», - иҳәеит Анти Турунен, Ахада иҭабуп ҳәа иаҳәо.

Рауль Ҳаџьымба иганахьалагьы Анти Турунен иҭабуп ҳәа иеиҳәеит уи инаигӡоз аусмҩаԥгатәқәа рзы. Аха иажәақәа ирыцҵо иҳәеит зҵаарақәак рганахьала ауадаҩрақәа шыҟоу, урҭ рыӡбара ахыгара ишаҿу.

«Шьҭахьҟа амҩа ыҟаӡам. Адунеи зегьы аҽаԥсахит. Ҳаизыҟазаашьақәагьы ахырхарҭа ҿыц ала иҳарҿиалароуп», - иҳәеит инаҵшьны Аԥсны Ахада.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT