Аҧсны Аҳәынҭқарра Ахада

 

Ахада Аԥснытәи Аҳәынҭтелерадиоеилахәыра азы иҟаиҵаз адныҳәалара

06.11.2017

Ахада Аԥснытәи Аҳәынҭтелерадиоеилахәыра азы иҟаиҵаз адныҳәалара

Абҵарамза 6 рзы Аԥсны Аҳәынҭқарра Ахада Рауль Ҳаџьымба Аԥснытәи Аҳәынҭқарратә Телерадиоеилахәыра аԥҵара амш рыдиныҳәалеит.

Адныҳәалараҿы, ҷыдала, иҳәоуп:

«Абҵарамза 6 1978 шықәса – ҭоурыхтә рыцхәуп Аԥсназы. Уи ҳмилаҭтә-хақәиҭратә қәԥара иалнаршаз ахҭыс дуқәа ируакуп. Ари амш аҽны ҳҳәынҭқарра иаиуит Аԥсны жәлар рҭоурыхи, ркультуреи, ԥхьаҟа иалырхуа ахырхарҭақәеи ирызку адырра иашақәа инарҭбаау аудиториа азнагаразы алшара. Ателехәаԥшреи арадиои иахьагьы иеиҵагыло аҿар рааӡараҿы, акультуреи аҵарадырреи рыҿиареи, иааизакны, аҳәынҭқарра аргылареи аус аҿы аҵак дуӡӡа амоуп.

Арадиои ателехәаԥшреи рҿы аусуразы иаҭахуп агәацԥыҳәареи, аҭакԥхықәра ду аарԥшреи, аус азҟазареи. Есҽны, ԥсшьареи ныҳәамши еилымхкәа, Аԥсны Аҳәынҭқарратә Телерадиоеилахәыра аусзуҩцәа ҳтәылеи адунеи зегь аҟни имҩаԥысуа ахҭысқәа гәцаракны, ауаа рызнагашьа иаша рҽақәдыршәоит, аинформациатәи, аналитикатәи, арлахҿыхратә дырраҭарақәа ауаа еиҳа азҿлымҳара рызцәырыргарц азы аҿыц аԥшьгарақәа аус рыдырулоит.

Аԥсуа телехәаԥшра ажәабжьқәеи егьырҭ адырраҭарақәеи ҳҳәынҭқарраҟны мацара акәымкәа, аҳәаанырцә иҟоу ҳдиаспора ахаҭарнакцәа рыбжьареи, Аԥсны иазҿлымҳау, уи аҭоурыхи, иахьатәи аҭагылазаашьеи, проблемақәас аԥхьа иқәгылои ртәы здырыр зҭаху аудиториа ҭбаа гәахәарала иахәаԥшуеит.

Иахьа адунеи аҟны имҩаԥысуа аинформациатә процесс дуқәа раан имариам ахәаԥшцәеи азыӡырҩцәеи рызҿлымҳара аанкылара. Уи азы ари аусхкаҟны алшарақәа реихаҳара, ҳаамҭа иақәшәо ахырхарҭақәа рықәныҟәара, адырраҭарақәа рформат есааира аиӷьтәра, ахарҭәаара хымԥада иаҭахуп.

Аԥснытәи Аҳәынҭқарратә Телерадиоеилахәыра аусзуҩцәа зегьы ишәзеиӷьасшьоит агәамчи, аманшәалареи, шәнапы злаку аус аҟны аихьӡара ҿыцқәеи!»


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT