Аҧсны Аҳәынҭқарра Ахада

 

Ахада Аҩныҵҟатәи аусқәа рминистрра аколлегиа аилатәара далахәын

03.11.2017

Ахада Аҩныҵҟатәи аусқәа рминистрра аколлегиа аилатәара далахәын

Абҵарамза 3 рзы Аԥсны Аҳәынҭқарра Ахада Рауль Ҳаџьымба Аҩныҵҟатәи аусқәа рминистрра 2017 шықәса 9-мз рызтәи аусура аихшьаларазы аколлегиа аилатәара далахәын.

Аколлегиа аусура ахыркәшара ашьҭахь Ахада аилатәара аихшьала ҟаиҵеит.

«Сара еилыскаауеит иҟоу агхақәа зегьы рыриашара алацәажәара шыуадаҩу, аҳәынҭқарра атехникатә еиқәыршәареи асоциалтә зҵаарақәеи иақәнагоу хылаԥшра анзанамҭо аҭагылазаашьа злаҟоу ала. Аха иҳамоу алшарақәа ҳасаб рзуны аус ҳуроуп.

Аҵыхәтәантәи жәашықәса рзы ҳтәыла еиҳа-еиҳа шьҭахьҟа ицон ацәгьоуратә еизыҟазаашьақәеи аимакқәеи рганахьала. Егьырҭ аҳәынҭқаррақәа рҟны ацәгьоуцәа рыбжьара ахыҧша змоу ирҿагыланы ақәҧаразы рырҕәҕәара ианалагаз аамҭазы, ҳара ҳҟны уи аус арҧсыҽра иалагеит. Аамҭа кьаҿк иалагӡаны рхыҧхьаӡара иазҳаит «авторитет змоу», «ахылаҧшцәа» ҳәа ззырҳәо ауаа. Иҟалалоит амчратә усбарҭақәа рхаҭарнакцәақәакгьы цәгьоурақәак рышьҭахь урҭ ацхырааразы ианрыдҵаалало. Уи алагьы азинхьчаратә маҵзурақәа рымч шкәадоу дыршаҳаҭуеит. Абри инамаданы, акриминал ахаҭарнакцәа ахыҧша шрымоу баны, аекономикатәи аполитикатәи процессқәа анырра рырҭарц рҽазыршәоит. Амчратә усбарҭақәа убри аан рҭагылазаашьа ҧсыҽны иаагылоит.

АҩАР аҟны ацәгьоурақәа ирҿагыланы иҕәҕәоу ақәҧаразы акзаара, азхиазаара ыҟам. Ари аҩыза аҭагылазаашьа шьақәгылеит еиҳаракгьы афинанстә дгылареи, атехникатә еиқәыршәареи, акадртә политикеи ахьҧсыҽу азы.

Аҩныҵҟатәи аусқәа рминистрра акыр шықәса инеиҧынкыланы изықәгәыҕуаз асовет аамҭазы аҵара зауз акадрқәа роуп. Иахьатәи аамҭазы хшыҩзышьҭра рыҭатәуп аминистрра ахатә еилазаара маха-шьахалатәи азыҟаҵареи аморалтә-психологиатә ҭагылазаашьеи. Иаарласны уи ҳаналамга, ихьшәахоит. Аоперативтә усурагьы шыҕәҕәам узгәамҭар залшом. Иҟоу атехникатә лшара ҧсыҽқәеи урҭ рыла имҩаҧырго ауснагӡатәқәеи АҩАР аҧхьа иқәгылоу азҵаарақәа рзыӡбом. Иҟоу ахархәагақәа ирзалыршом ашьаус ахыркәшарахь ианаамҭоу, ишахәҭоу анагара, аӡбарҭахь зхаҭабзиара ҳараку аматериалқәа неины, ахара зду иқәнагоу ашьауҕа дақәыршәазарц азы.

Агентура иазынархоу аусурагьы мҩаҧысӡом. АҩАР-и егьырҭ иҷыдоу амаҵзурақәеи русура зегьы уи ауп изықәныҟәо.

Даҽазныкгьы исҳәар сҭахын анаркотикқәа рыларҵәара иаҿагыланы ақәҧара аминистрра аилазаара зегьы хықәкыс иамазар шахәҭоу.

Аҳәынҭқарратә автоинспекциа аганахьалагьы аусурақәа ҧсыҽуп. Атәылауаа рганахьалагьы, азинмчра аусзуҩцәа рганахьалагьы аилагарақәа рацәоуп.

Шәусбарҭа аусура ахырхарҭақәа зегь рыла аинформациа-рккаратә уснагӡатәқәа мҩаҧгалатәуп, афактқәа реихшьалара мацара акәымкәа.

Ауаажәларреи аҿари шәусура иадҧхьалатәуп. Аҿартә политиказы аилак иеиуеиҧшым акциақәа мҩаҧнагон, урҭ уажәы иаанкылоуп. Уи аус еиҭарҿыцтәуп. Ари азҵаара хьаас измоу зегьы рҽеимаданы, аус еицыруроуп. 2018 шықәса анаркотикқәа ирҿагыланы ақәҧара иашықәсны ирылахәаны, иақәнагоу аусмҩаҧгатәқәа рынагӡарагьы алыршазар ауеит. Уи бзианы иазхәыцтәуп.

Акадртә шьақәгылашьагьы еиҭахәаҧштәуп ҳәа сгәы иаанагоит. Ишақәнагоу еиҧш ианеихшахалак ауп, аусура аҭагылазаашьагьы анеиҕьхо.

Аҳәынҭқарра аиҳабыра иаҧшаароуп атехникатә еиқәыршәара аиҕьтәреи ауалафахәқәа рышьҭыхреи рзы алшарақәа. Раҧхьатәи ашьаҿақәа рыҟаҵара ҳаҿуп, аха ишәымоу ала шәусура иҵегь инарҭбааны имҩаҧыжәгалароуп.

Иҭарыҩуа ацәгьоурақәа рхыҧхьаӡара иацлеит, аха урҭ реилыргара аус еицәахеит.

Ашықәс анҵәамҭазы Аҩныҵҟатәи аусқәа рминистрра аусура алҵшәақәа еиҕьхеит ҳәа ҳҳәаратәы иҟаларц азы аҭагылазаашьақәа аҧҵатәуп. Аусура зҭахым, излымшо, имаҵура дамхтәуп», - иҳәеит Ахада.

3.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT