Аҧсны Аҳәынҭқарра Ахада

 

Ахада Агәабзиарахьчара аминистр дидикылеит

02.11.2017

Ахада Агәабзиарахьчара аминистр дидикылеит

Абҵарамза 2 рзы Аԥсны Аҳәынҭқарра Ахада Рауль Ҳаџьымба дидикылеит Агәабзиарахьчара аминистр Ҭамаз Ҵахнакьиа

Агәабзиарахьчара аминистр Аҳәынҭқарра Ахада изеиҭеиҳәеит Аԥсны иааиԥмырҟьаӡакәа иқәынхо Урыстәыла атәылауаа хымԥадатәи рмедицинатә ԥгаԥсара аиҿкаара аус аҟны русеицуразы Аԥсны Аҳәынҭқарреи Урыстәылатәи Афедерациеи рыбжьара Аиқәшаҳаҭра иадҳәаланы инагӡоу аусура атәы.

Урыстәылатәи аган ари адокумент аратификациа аназнаулак ашьҭахь мызкы иҭагӡаны ҳҳәынҭқарра аҵакырадгьыл аҟны аполисқәа рыҭара аҭыԥқәа аадыртуеит. Аус адулара иаҿуп аҩбатәи адокумент – Хымԥадатәи амедицинатә ԥгаԥсаразы Краснодартәи аҵакырадгьылтә фонди Аҧсни рыбжьара аиқәшаҳаҭра хада. Ари адокумент аилкаара хадақәа инарымаданы Урыстәылатәи Афедерациа Агәабзиарахьчара аминистрреи Хымԥадатәи амедицинатә ԥгаԥсаразы Афедералтә фонди рхаҭарнакцәа реиԥылара мҩаԥысхьеит. Ари апрограмма анагӡаразы иаҭаху амеханизмқәа рышьақәыргыларазы Урыстәылатәи аколлегацәеи Аҧсни реиԥыларагьы азгәаҭаны иҟоуп.

«Аполис азоужьра аҭыԥқәа рхыԥхьаӡареи урҭ зеиԥшрахои, истационартәу иеиҭаҵуа ракәхоу атәы ҳалацәажәароуп. Урҭ аполисқәа рыҭара аҿҳәарақәа шьақәҳаргылароуп. Агәабзиарахьчара аминистрра ари Аиқәшаҳаҭра анагӡаразы 2018 шықәсазтәи хықәкылатәи аусбарҭатә программа аплан иалаҳҵеит, абиуџьет ахьгьы ицәыраҳгеит. Уи иагәылалоит аҭаратә ҭыԥқәа раԥҵаразы, иаҭаху аштаттә акқәа рхыԥхьаӡара ашьақәыргыларазы иақәнагоу аиҿкааратә усмҩаԥгатәқәа. Уи зымҽхак дуу усуп. Агәаранқәа ҟамларазы, иахьынӡалшо ала аполисқәа рыҭара апроцедура ҳармариарц азы аҭагылазаашьа маншәалақәа аԥаҳҵар ҳҭахуп. Урҭ апунктқәа аусура ианалагалак фымз рышьҭахь заҵәык анҵлак ауп ари апрограмма аус ауеит ҳәа азаҳҳәар анҳалшо. Аҳәынҭқарратә хәышәтәырҭа ашьаҭала иеиҿкаахо иҷыдоу акомиссиа аӡбарала, ҳтәылауаа ироулоит иҷыдоу ацхыраара, амедицинатә цхыраара ласгьы убрахь иналаҵаны, иахьатәи амш азы ҳара иаҳзыҟамҵо ацхыраара ахкқәагьы», - иҳәеит Агәабзиарахьчара аминистр.

Аҳәынҭқарра Ахада альготатә категориахь иаҵанакуа Урыстәылатәи Афедерациа атәылауаа ахәшәқәа рыла реиқәыршәаразы Аиқәшаҳаҭразы аусура ахьынӡанеихьо атәы дазҵааит.

Аиқәшаҳаҭра аҳәаақәа ирҭагӡаны аԥсуа ган еиқәнаршәеит аинвалидцәа рсиа, ахәшәқәеи аныхратә материалқәеи реиқәыԥхьаӡа. Урҭ Урыстәылатәи Афедерациа Агәабзиарахьчара аминистррахь инарышьҭхьеит.

Ахада инаҵшьны иазгәеиҭеит ари аусура хаҭабзиара ҳаракыла инагӡазар шахәҭоу.

«Арҭ ахәшәқәа иаагоу асиа иану ауаа ркатегориа иақәшәароуп», - иҳәеит Рауль Ҳаџьымба.

Аҳәынҭқарра Ахада адиспансеризациазы аусура еиҭарҿыцзар шахәҭоу дазааҭгылеит. Уи иҳәеит иаарҧшыз алҵшәақәа рыла ақалақьқәеи араионқәеи рҟынтәи иаку адыррақәа рбаза шеиқәыршәатәу, иара убасгьы аналитикатә лкаақәа шыҟаҵатәу.

Агәабзиарахьчара аминистр 2016 шықәсазтәи адиспансеризациа алҵшәақәа дырзааҭгылеит.

«41 нызқь рҟынӡа ауааҧсыра ргәабзиара аҭагылазаашьа ҭҵаан Аҧсны мрагыларатәи ахәҭеи, Аҟәеи Гәылрыҧшьи араионқәеи рҟны. Ари апрограмма аҳәаақәа ирҭагӡаны игәаҭан 11 нызқьҩык ахәыҷқәа. Адиспансеризациа мҩаҧымсижьҭеи акыр шықәса ахьҵуа иахырҟьаны, иҳадҵаалаз зегьы аконсультациатә, адиагностикатә цхыраара рыҭан. Еиҳараӡак иуҧыло ачымазарақәа иреиуоуп агәы-адатә чымазарақәа. Ахылаҧшреи иеиҧмырҟьаӡакәа ахәшәтәреи, иҳараку атехнологиақәа рыла убрахь иналаҵаны, зҭахыз 10 нызқьҩык инарзынаҧшуа ачымазцәа аарҧшын. Иара убасгьы иаарҧшын акьыба чымазара змаз аӡәырҩы. Ашьақар чымазарагьы зымҽхак ҕәҕәоу рахь ишаҵанакуаз ааҳарҧшит, уи атәылауаа ринвалидизациа ахәҭак мзызс иамоуп», - иҳәеит Аминистр.

Иаарҧшу адыррақәа зегьы Агәабзиарахьчара аминистрра ахықәкытә программақәа рыпланҟаҵараан ҳасаб рызун.

Иахьатәи аамҭазы Афон ҿыц адиспансеризациа амҩаҧгара иалагахьеит, ашықәс нҵәаанӡа Агәабзиарахьчара аминистрра Гәдоуҭа араион иқәынхо хазы иазгәаҭоу атәылауаа ркатегориа ргәабзиара аҭҵаара хнаркәшоит, иааиуа ашықәс азы – Гагра араион аҟны, иара убас азеиҧш лҵшәақәа еихыршьалоит.

«Ари аус анхҳаркәшалак, алҵшәақәа еихаҳшьалоит. Пациентцәақәак ахылаҧшра раҳҭалоит, изықәнагоу – аҧҟаратә хәышәтәрахьы иҳашьҭуеит. Хазы иалкаау атәылауаа, иаҳҳәап аррамаҵуацәа уб.егь., рыпрофилактикатә гәаҭарақәа мҩаҧаҳгалоит. Ари аҩыза ауснагӡатә знык акәым, есааира имҩаҧыслартә иҟаҵатәуп», - иҳәеит Ҭамаз Ҵахнакьиа.

Ахада иара убасгьы иазгәеиҭеит арҧҳа чымазареи ВИЧ-и иреиуоу аҿкы чымазарақәа рзы ҳтәылауаа аус шрыдулатәу.

Ҭамаз Ҵахнакьиа излеиҳәаз ала, арҧҳа ҿкы чымазара мчыла ахәшәтәразы азакәан апроект аус адулара рминистрраҿы хара имгакәа иалагоит. Иара убасгьы, 2017 шықәса нҵәаанӡа арҧҳа чымазара ахәшәтәразы адиспансер аҟны 140 ҭыҧ ахьыҟало аргылара ацҵара ргәы ишҭоу. Уа иҟалоит ахәыҷтәы иарақәеи аҧҟарҭеи.

Ахада инаҵшьны иазгәеиҭеит Агәабзиарахьчара аминистрра ари аусураҿы еиҳарак хшыҩзышьҭра апрофилактика ианаҭар шакәу.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT