Аҧсны Аҳәынҭқарра Ахада

 

Ахада Аҩганктәи атәылауаҩра азҵаарақәа рҭышәныртәаларазы Аҧсны Аҳәынҭқарреи Урыстәылатәи Афедерациеи рыбжьара аиқәшаҳаҭра архиара иазкны аилатәара мҩаҧигеит

31.10.2017

Ахада Аҩганктәи атәылауаҩра азҵаарақәа рҭышәныртәаларазы Аҧсны Аҳәынҭқарреи Урыстәылатәи Афедерациеи рыбжьара аиқәшаҳаҭра архиара иазкны аилатәара мҩаҧигеит

Жьҭаарамза 31 рзы Аҧсны Аҳәынҭқарра Ахада Рауль Ҳаџьымба Аҩганктәи атәылауаҩра азҵаарақәа рҭышәныртәаларзы Аҧсны Аҳәынҭқарреи Урыстәылатәи Афедерациеи рыбжьара аиқәшаҳаҭра архиара иазкны аилатәара мҩаҧигеит.

Аилатәара аартуа, Ахада алахәцәа иргәалаиршәеит 2002 шықәса абҵарамзазы Аҧсны Аҳәынҭқарра Урыстәылатәи Афедерациеи иареи рыҩганктәи атәылауаҩра раиура азакәанҧҵаратә шьаҭа аҭаны Аҧсны ганкахьалатәи аҧҟарала ишышьақәнаргылахьаз. Уи уаанӡа амч змаз атәылауаҩразы азакәан ахь иашьашәалоу арҽеирақәа ралагаларала иаҧҵан. Анаҩс, 2005 шықәсазы атәылауаҩразы азакәан ҿыц анрыдыркыла, Урыстәылеи ҳареи ҳаицтәылауаҩра анормақәа еиқәырхан. Цәыббрамза 17 2008 шықәсазы анапы зҵаҩыз Аҧсны Аҳәынҭқарреи Урыстәылатәи Афедерациеи рыбжьара Аиҩызареи, аусеицуреи, аицхыраареи рзы Аиқәшаҳаҭра ахәҭаҷ 8 иазҧхьагәанаҭоит Аҧсни Урыстәылеи рыҩганктәи атәылауаҩра азҵаарақәа рҭышәныртәаларазы хазы игоу аиқәшаҳаҭра рнапы аҵаҩра.

Адәныҟатәи аусқәа рминистр Даур Ақаҩба аилатәара алахәцәа ирзеиҭеиҳәеит Аҩганктәи атәылауаҩра азҵаарақәа рҭышәныртәалара иазынархоу аиқәшаҳаҭра рминистрра аус аднаулоижьҭеи шықәсқәак шааҵуа. «Аиқәшаҳаҭра апроект рзынашьҭын уи зҿлымҳара азҭаша анагӡаратә мчра аусбарҭақәа рахь, дара ажәалагалақәеи азгәаҭақәеи ацҵаны иаҳзаарышьҭит», - иҳәеит Д.Ақаҩба.

Аҳәынҭқарра Ахада иазгәеиҭеит анагӡаратә мчра аусбарҭақәа рыдагьы, аиқәшаҳаҭра азырхиаразы Адәныҟатәи аусқәа рминистрра иеиуеиҧшым аекспертцәа аднаҧхьалар шакәу, инарҭбаау абжьгарақәа мҩаҧнагалар шахәҭоу.

«Ари Аиқәшаҳаҭра ахцәажәаразы Урыстәылатәи шәколлегацәа шәырҧылаанӡа, жәларбжьаратәии апарламентбжьаратәии еимадарақәа рзы апарламенттә еилакы алахәцәа идшәырба, урҭ ражәалагалақәа хшыҩзышьҭра рышәҭа», - иҳәеит Рауль Ҳаџьымба.

Ахада Иусбарҭа Анапхгаҩы актәи ихаҭыҧуаҩ Дмитри Шамба иажәақәа рыла, раҧхьа инаргыланы, аиқәшаҳаҭраҟны ишьақәырҕәҕәатәуп ҳмилаҭтә закәанҧҵарала ишьақәыргылоу аҭагылазаашьақәеи аҧҟарақәеи инрықәыршәаны атәылауаҩра шроуа. «Атәылауаҩразы ҳзакәан иагәылоуп ҳҳәынҭқарра аҭахрақәа зыхьчо амеханизмқәа, урҭ аиқәшаҳаҭра анапаҵаҩра иаҧсахыр ҟалом», - иҳәеит Д. Шамба.

Иара убасгьы, Ахада Иусбарҭа Анапхгаҩы актәи ихаҭыҧуаҩ игәаанагарала, Аиқәшаҳаҭра иалазароуп аҳәынҭқарратәи амуниципалтәи маҵураҭыҧқәа раанкыларазы урыстәылатәи азакәанҧҵара иазҧхьагәанаҭо ақәиҭымтәрақәа Аҧсны Аҳәынҭқарра атәылауаа рахь ишаҵанамкуа ала аҧҟара. Уи иажәақәа рыла, Урыстәылатәи Афедерациа арҭ азакәантә ақәиҭымтәрақәа аналанагала ашьҭахь, Аҧсны атәылауаа аӡәырҩы аҳәынҭқарратә маҵурахьы ианнеиуаз, Аҧсны атәылауаҩра мап ацәкра рықәшәон.

Аминистрцәа Реилазаара аппарат анапхгаҩы Давид Сангәлиа иазгәеиҭеит Урыстәылатәи Афедерациа Аҧсны Аҳәынҭқарра аназханаҵа ашьҭахь, Аҧсны атәылауаа урыстәылатәи атәылауаҩра рыҭара шаанкылаз иашьашәалоу аҳәынҭқаррабжьаратә еиқәшаҳаҭра анапаҵаҩра ҟалаанӡа. «Иахьатәи аамҭазы Аҧсны Аҳәынҭқарра атәылауаа аӡәырҩы урыстәылатәи атәылауаҩра рымаӡам, уи инамаданы, урҭ ирзеиқәыршәаӡом урыстәылатәи атәанчахәы, ироуӡом урыстәылатәи хымҧадатәи амедицинатә ҧгаҧсара аполис», - иҳәеит Д.Сангәлиа.

Аиустициа аминистр Марина Ҧлиаҧҳа излалҳәаз ала, Аҩганктәи атәылауаҩра азҵаарақәа рҭышәныртәаларазы аиқәшаҳаҭра анапаҵаҩра ашьҭахь аурыс тәылауаа зегьы мариала Аҧсны атәылауаҩра роур рылшоит ҳәа ҳтәылауаа рыбжьара иҟоу агәаанагара шиашам. Лара лажәақәа рыла, ҳзакәанҧҵара иахьагьы мап ацәнакӡом Урыстәыла атәылауаа Аҧсны атәылауаҩра роура. Зыӡбахә ҳәоу аиқәшаҳаҭра Аҧсны атәылауаа урыстәылатәи атәылауаҩра аиуразы ирымоу ауадаҩрақәа раҧыхроуп иззынархоу. Аҧсуа тәылауаҩра апроцедура шыҟац иаанхоит, Аҧсны Аҳәынҭқарра атәылауаҩразы азакәанҧҵара ишазҧхьагәанаҭо еиҧш.

Жәларбжьаратәии апарламентбжьаратәии еимадарақәа рзы апарламенттә еилакы ахантәаҩы Дмитри Арӡынба ирылеиҳәеит адепутатцәа Аҩганктәи атәылауаҩра азҵаарақәа рҭышәныртәаларазы аиқәшаҳаҭра апроект азы имаҷымкәа ажәалагалақәа шрымоу, иагьрыдигалеит хара имгакәа Жәлар Реизараҟны аилак алахәцәа рыдагьы, егьырҭ адепутатцәагьы ргәаанагара рҳәар ахьрылшо аиҧылара амҩаҧгара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT