Аҧсны Аҳәынҭқарра Ахада

 

Ахада зхы иақәиҭу ақәҧаразы адунеи Ачемпион Инар Кетиа дидикылеит

20.10.2017

Жьҭаарамза 20 рзы Аҧсны Аҳәынҭқарра Ахада Рауль Ҳаџьымба ақәыҧшцәа рыбжьара зхы иақәиҭу ақәҧаразы адунеи Ачемпион Инар Кетиеи уи ирҵаҩы Дзыкә Бениеи идикылеит.

Рауль Ҳаџьымба Инар Кетиа идиныҳәалеит ақәыҧшцәа рыбжьара цәыббрамза 6 инаркны цәыббрамза 10-нӡа Еллинтәыла имҩаҧысуаз зхы иақәиҭу ақәҧаразы адунеи ачемпионт аҟны. Уи аспортсмен ирҵаҩы Дзыкә Бениа иҭабуп ҳәа иеиҳәеит акымкәа абиҧарақәа рааӡареи разыҟаҵареи рус аҿы илшамҭақәа рзы.

«Аҧсны дызусҭзаалак ари еиҧш иҟоу аиааирақәа дреигәырҕьоит. Урҭ абаҩхатәра змоу аҿарацәа ҧхьаҟа ацараҿы ирывагылоу, ирыцхраауа рыла иалыршахоит. Шәара ишәааӡаз аҿар рыхьӡқәа иахьа атәыла анҭыҵгьы еицырдыруеит. Инар, уара агәамч, агәалаҟара бзиа, аманшәалара узеиҕьасшьоит. Сгәы иаанагоит аҧхьаҟа иҵегьы аиааира дуқәа узыҧшуп ҳәа», - абас иҳәеит Ахада.

Рауль Ҳаџьымба иазгәеиҭеит, аҳәынҭқарра ганрацәала ацхыраара шыҟанаҵо абарҭ азҵаарақәа рыҟны.

Инар Кетиа Ахада изеиҭеиҳәеит дызлахәыз аицлабрақәа шымҩаҧысуаз, аиааира шигаз атәы.

Дзыкә Бениа Рауль Ҳаџьымба иҭабуп ҳәа иеиҳәеит иҟаиҵаз адкыларазы.

Ахада Инар Кетиа агәалашаәратә ҳамҭа ииҭеит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT