Ахада аҧсуа диаспора ахаҭарнакцәа, ауаажәларра дрыдышшылеит Уалид Маршьан Абаза иҧсҭазаара иалҵра инамаданы

Жьҭаарамза 14 рзы Аҧсны Аҳәынҭқарра Ахада Рауль Ҳаџьымба Шьамтәылатәи Арабтә Республика аҧсуа диаспора, ауаажәларра дрыдышшылеит Уалид Маршьан Абаза иҧсҭазаара иалҵра инамаданы.

***

Аҧсны гәалсра дула ирыдыркылеит иналукааша Шьамтәылатәи Арабтә Республика арратә, ауаажәларратә усзуҩы, аинрал Уалид Маршьан Абаза иҧсҭазаара иалҵра иазку ажәабжь. Иара Шьамтәыла ҳаҭыр ду зқәыз, уи амилаҭтә интересқәа рыхьчараҿы злагаламҭа акраҵанакуаз патриот иашан. Акыршықәсқәа Шьамтәылатәи Арабтә Республика Ашәарҭадара амаҵзура аполитнапхгара аиҳабы ихаҭыҧуаҩыс дыҟан. Издыруа маҷым иара илшамҭақәа атеррористтәи аиҳабыра ирҿагылази амчқәа ирҿагыланы ақәҧараҿы. Аҭоурыхтә ҧсадгьыли аҧсуа-черқьес диаспореи реимадара арҕәҕәара аус аҿы урҭ рыҩныҵҟа еицырдыруаз, ҳаҭыр ду зқәырҵоз ҧхьагылаҩны дыҟан.

Арратә напхгаҩ ду, аҳәынҭқарратә, ауаажәларратә усзуҩы, аҧсуа жәлар рҵеи иаша игәалашара ахааназ ҳагәқәа рҿы инхоит. Гәалсра дула срыдышшылоит иуацәеи иҭынхацәеи, изааигәаз зегьы, аҧсуа диаспора ахаҭарнакцәа, фырхаҵарала зхьыҧшымра иазықәҧо аиҩызаратә еизыҟазаашьақәа ахьҳабжьоу Шьамтәыла ауаажәларра.  


Возврат к списку