Аҧсны Аҳәынҭқарра Ахада

 

Рауль Ҳаџьымба Адунеизегьтәи аҿари астудентцәеи рфестиваль аҟны Аҧсны Аҳәынҭқарра аҟнытә аделегатцәа дырҧылеит

11.10.2017

Рауль Ҳаџьымба Адунеизегьтәи аҿари астудентцәеи рфестиваль аҟны Аҧсны Аҳәынҭқарра аҟнытә аделегатцәа дырҧылеит

Жьҭаарамза 11 рзы Аҧсны Аҳәынҭқарра Ахада Рауль Ҳаџьымба Шәача ақалақь аҟны Адунеизегьтәи аҿари астудентцәеи рфестиваль иалахәхо Аҧсны Аҳәынҭқарра аделегатцәа дырҧылеит.

Ахада афорум иалахәыз аҧсшәа реиҳәеит.

«Шәара шәнапы ианырҵеит жәларбжьаратәи афорум аҟны Аҧсны ахаҭарнакра. Сгәы иаанагоит ҳҳәынҭқарра ишақәнагоу ала иаашәырҧшып ҳәа», - абас иҳәеит аҳәынҭқарра Ахада афорум иалахәу рахь ихы рханы.

Рауль Ҳаџьымба иаҵшьны иҳәеит ари аҧснытәи аҿар злахәу раҧхьатәи жәларбжьаратәи усмҩаҧгатәны ишыҟам, аҿар есқьынгьы иҿырҧшыгангьы рхы шаадырҧшуаз.

Аҳәынҭқарра ахада иазгәеиҭеит ҳҳәынҭқарра уаҵәы ҧеиҧшс иамоу аҿар шракәу.

«Уаҵәы шәара ҳҳәынҭқарра аҿаҧхьа иқәгылоу акрызҵазкуа ауснагӡатәқәа рыӡбара шәалагоит. Ҳара аҭакҧхықәра зцу амаҵзурақәа рахь аҿар рнагара ҳаҿуп», - иҳәеит Ахада.

Аделегациа анапхгаҩы Инар Ладариа аҳәынҭқарра Ахадеи Аиҳабыреи иҭабуп ҳәа реиҳәеит иҟарҵо адгыларазы, иҳәеит афорум аҽазыҟаҵара шымҩаҧысуаз атәгьы.

«Ҳара ҳҿар афорум аҟны ахырхарҭақәа реиҳарак ирылахәхоит. Раҧхьаӡакәны зхы иақәиҭу ихьыҧшым а ахаҭарнакцәа раҳасабала ҳцәырҵуеит. Ари ҳара ҳзы иааира дууп», - иҳәеит Инар Ладариа.

Аделегатцәа руаӡәк Валери Берзениа алахәцәа зегьы рыхьӡала аиҧыларазы Ахада иҭабуп ҳәа иеиҳәеит.

«Раҧхьаӡакәны афорум ахь 40-ҩык инареиҳаны излоу абас еиҧш аделегациа ду цоит. Ҳара афорум ибзианы ҳҽазыҟаҳҵеит, ҭакҧхықәралагьы ҳазнеит», - иҳәеит иара.

Рауль Ҳаџьымба ҳҳәынҭқарра аделегатцәа ирзеиҕьеишьеит ақәҿиарақәа.

«Сгәы иаанагоит ибзианы шәҽазыҟашәҵеит ҳәа, ишәызцәырҵуа азҵаарақәа зегьы рҭакқәа азырхианы ишәымоуп ҳәа», - иҳәеит Ахада.


IMG_7464_1.jpg  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT