Аҧсны Аҳәынҭқарра Ахада

 

Рауль Ҳаџьымбеи Вадим Красносельскии иеицыҟарҵаз аҳәамҭа

29.09.2017

Рауль Ҳаџьымбеи Вадим Красносельскии иеицыҟарҵаз аҳәамҭа

Цәыббрамза 29 рзы Аԥсны Аҳәынҭқарра Ахада Рауль Ҳаџьымбеи Приднестровиатәи Молдавиатәи Ареспублика Ахада Вадим Красносельскии реиҿцәажәарақәа рылҵшәақәа ирызкны аҳәамҭа еицыҟарҵеит.

***

Рауль Ҳаџьымба:

«Ҳаҭыр зқәу Вадим Николаи-иԥа! Ҳаҭыр зқәу ҳҩызцәа, ҳколлегацәа!

Ҳара ҳзы игәахәара дууп Приднестровиатәи Молдавиатәи ҳаиҩызаратә Республика аделегациа Ахада раԥхьа днаргыланы ҳтәылаҟны раара.

Ҳаиԥылара мҩаԥысит аҩызаратә, аизбзиатә ҟазшьа аманы. Цәыббрамза 28, 29 рзы имҩаԥысыз ҳаиҿцәажәарақәа раан инаҵшьны иазгәаҳҭеит ҳҳәынҭқаррақәа реизыҟазаашьақәа рҵакы шдуу, рырҭбаара шхымԥадатәиу.

Ҳаицәажәеит ҳаҩганкгьы иаҳзыфеидоу аекономикатәи, ахәаахәҭратәи, акультуратәи, аҵарадырратәи усхкқәа рҟны аимадарақәа ҩаԥхьа рырҭбаара ҳшазыхиоу.

Даҽазныкгьы иҳаршаҳаҭит ихадоу жәларбжьаратәи апроблемақәа рганахьала ҳазыҟазаашьақәа шеиқәшәо, Урыстәылатәи Афедерациеи ҳареи мҽхакы ҭбаала ҳусеицура арҿиареи арӷәӷәареи азҵаатәы наҟ-наҟгьы ишадгылатәу.

Аиҿцәажәарақәа раан изныкымкәа иазгәаҭан иахьазы иҟоу аполитикатәи, азинтәи, алогистикатәи, егьырҭ аԥықәсыларақәеи ҳусеицура еффективла амҩасра ԥырхага арҭар шрылмыршатәу.

Аԥсны Аҳәынҭқарреи Приднестровиатәи Молдавиатәи Ареспубликеи ирыбжьарҵаз ирҿыцу Аиҩызареи, аусеицуреи, апартниорреи рзы аиқәшаҳаҭра ҳтәылақәа рполитикатә еимадарақәа рырӷәӷәарази, ҳусеицура армариарази, ҳаҩҳәынҭқаррак ҳхьыԥшымрақәа азинтә шьаҭала еицазхаҳҵарази аҭагылазаашьа бзиақәа аԥнаҵоит».

Вадим Красносельски:

«Ҳаҭыр зқәу Рауль Џьумка-иԥа, ҳаҭыр зқәу ҳҩызцәа, ҳколлегацәа. Иҭабуп ҳәа шәасҳәар сҭахуп, Ахада шәхаҵкы, Аԥсны Аҳәынҭқарраҟа ааԥхьара ахьҳашәҭаз, аусеиуразы иеиҭарҿыцу аиқәшаҳаҭра анапаҵаҩра ахьалшәыршаз, иара убасгьы шәгәырӷьаратә усмҩаԥгатәқәа ҳрылахәразы аҭагылазаашьа ахьҳашәҭаз азы.

Агәра ганы сыҟоуп анапы зҵаҩыз аиқәшаҳаҭра Аԥсны Аҳәынҭқарреи Приднестровиатәи Молдавиатәи Ареспубликеи реизыҟазаашьақәа аҩаӡара ҿыц ахь ишнанаго. Аекономикеи, акультуреи, егьырҭ аухскқәеи рҟны уаанӡа иҳабжьаҳҵахьаз аиқәшаҳаҭрақәагьы иҵегьы иҳарҭбаауеит. Абарҭ зегьы ҳтәылақәеи ҳажәларқәеи реимадарақәа рзы акыр рыҵаркуеит.

Иахьа ҳхьыԥшымра ауасхыр ашьҭаҵара ҳаҿуп. Ахьыԥшымроуп ашәарҭадара шьаҭас иамоу. Иахьатәи иҭынчым адунеи аҿы уи аҵак ду амоуп. Убри азы, ҳәарада, Аԥснеиԥш узықәгәыӷуа аҩыза, агәыла бзиа имазаара акраҵанакуеит.

Аԥсни Приднестровиатәи Молдавиатәи Ареспубликеи реизыҟазаашьақәа наҟ-наҟгьы рырҭбаара алҳаршалоит.

Гәык-ԥсык ала ишәыдаҳныҳәалоит иааиуа шәныҳәа ду». 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT