Аҧсны Аҳәынҭқарра Ахада

 

Рауль Ҳаџьымба Вадим Красносельски дидикылеит

28.09.2017

Рауль Ҳаџьымба Вадим Красносельски дидикылеит

Цәыббрамза 28 рзы Аҧсны Аҳәынҭқарра Ахада Иусбарҭаҟны Аҧсны Аҳәынҭқарра Ахада Рауль Ҳаџьымбеи Приднестровиатәи Молдавиатәи Ареспублика Ахада Вадим Красносельскии реиҧылара мҩаҧысит.

«Ҳара ҳажәларқәа рҭоурых ахьеиҧшу ыҟоуп. Шәареи ҳареи имариамыз аиҭашьақәыргылара амҩа ҳанысит. Аиааиреи аҳәынҭқарра аргылареи рус рхы ақәырҵеит зықьҩыла ҳҵеицәа.

Ауадаҩрақәа усҟангьы иҟан, урҭ иахьагьы ишыҟоугьы, аҳәынҭқарра аргылара ҳаҿуп. Раҧхьаӡакәны Аҧсны Аҳәынҭқарреи Приднестровиатәи Молдавиатәи Ареспубликеи рҳәынҭқаррабжьаратә еизыҟазаашьақәа шьақәыргылан 1993 шықәса ажьырныҳәамзазы. Анаҩс, 2006 шықәсазы, Аҧсны, Приднестровие, Алада Уаҧстәыла иаҧырҵеит жәларбжьаратәи аидгылара «Адемократиазы аидгылеи ажәларқәа рзинқәеи».

Ҳажәларқәа рыбжьара аиҩызаратә еизыҟазаашьа бзиақәа аҧҵоуп. Еиуеиҧшым ахырхарҭақәа рыла аус еицаҳуеит. Аполитикатәи, аекономикатәи, алогикатәи ҟазшьа змоу арҭ аизыҟазаашьақәа есааира аҕәҕәахара иаҿуп.

Уаҵәы шәаргьы ҳаргьы аиҩызаразы, аусеицуразы, аиҩызаразы Аиқәшаҳаҭра ҿыц ҳнапы аҵаҳаҩуеит. Ари хаҭабзиарала иҿыцу аҩаӡарахь иханагалоит ҳаизыҟазаашьақәа.

Даҽазныкгьы бзиала шәаабеит ҳәа шәаҳҳәоит. Ҳара арҭ аизыҟазаашьақәа рырҿиара ҳалагоит, ҳара ҳаҧхьа ишыҟаз еиҧш. Ҳусеицуреи ҳаимадареи аҧхьаҟагьы аҿиара роуеит», - иҳәеит Рауль Ҳаџьымба.

«Ҳаҭыр зқәу Ахада, акыр иаҧсоу Рауль Џьумка-иҧа, раҧхьа инаргыланы, иҭабуп ҳәа шәасҳәарц сҭахуп Аҧсны Аҳәынҭқаррахь исышәҭаз ааҧхьаразы, шәҳәынҭқарра сахьзаааигәашәтәыз азы, шәыжәлар, шәытрадициа аилкааразы аҭагылазаашьа ахьсышәҭаз азы. Сара агәра ганы сыҟоуп шәхьыҧшымра шьаҭас ишамоу шәытрадициақәа, шәышықәсалатәи шәыжәлар рҧышәеи шәыжәлар рфырхаҵареи. Шәара ииашаны ишәҳәеит аҧсуа жәлари приднестровиатәи ажәлари ирзеиҧшны ирымоу шыҟоу. Асовет еидгыла анхыбгала анаҩс ҳара ҳхы аиқәырхара ҳалшеит.

Аҧсуа жәлар ахеиқәырхара амҩа ианылеит, адунеитә политикатә хсаала иаламӡҩарц азы. Аиааира агара шәылшеит, избанзар ажәлар ршәаны, ихҽны, рықәхра алымшаӡеит.

Иахьа шәара ихьыҧшым, иазхаҵоу ҳәынҭқарроуп. Ахьыҧшымреи ишәымоу азхаҵареи шәара шәшәарҭадара алнаршоит.

Ҳнапы зҵаҳаҩраны иҟоу аиқәшаҳаҭра аекономикеи, акультуреи рыҟәшаҟны ҳаизыҟазаашьақәәа мҩақәнаҵоит. Ари Приднестровиеи Аҧсни рыбжьара аизыҟазаашьақәа рырҿиара иацхраауеит. Сгәы иаанагоит, урҭ есааира иҕәҕәахалоит ҳәа», - иҳәеит Вадим Красносельски.

Приднестровиатәи Молдавиатәи Ареспублика Ахада Иусҧҟала Аҧсны Аҳәынҭқарра Ахада Рауль Ҳаџьымба ианашьоуп Аҳаҭыртә Орден.

Приднестровиатәи Молдавиатәи Ареспублика Ахада Вадим Красносельски Аҧсныҟа дааит 1992-1993 шш. Аҧсны Жәлар рџьынџьтәылатә еибашьра 24-шықәсахыҵра иазку аныҳәатә усмҩаҧгатәқәа рылахәхаразы.

Приднестровиатәи Молдавиатәи Ареспублика Ахада иофициальный визит мҩаҧысуеит цәыббрамза 28 инаркны жьҭаарамза 2 -нӡа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT