Аҧсны Аҳәынҭқарра Ахада

 

Ахада Аԥсны Аҳәынҭқарра анапхгареи Урыстәылатәи Афедерациа иреиҳаӡоу арратә ҵараиурҭақәа рафицарцәа-аушьҭымҭацәеи реиԥылара далахәын

22.09.2017

Ахада Аԥсны Аҳәынҭқарра анапхгареи Урыстәылатәи Афедерациа иреиҳаӡоу арратә ҵараиурҭақәа рафицарцәа-аушьҭымҭацәеи реиԥылара далахәын

Цәыббрамза 22 рзы Аԥсны Аҳәынҭқарра Ахада Рауль Ҳаџьымба далахәын Аԥсны Аҳәынҭқарра иҟоу Урыстәыла Афедералтә Шәарҭадаратә Маҵзура Аҳәаахьчаратә усбарҭахь иааз Урыстәылатәи Афедерациа арратә ҵараиурҭақәа рафицарцәа-аушьҭымҭацәеи, Аԥсны Аҳәынҭқарра Анапхгареи, аветерантәи ауаажәларратәи еиҿкаарақәеи Ахьӡ-аԥша Амузеи аҟны реиԥылара.

Рауль Ҳаџьымба Аԥсны Аҳәынҭқарра иҟоу Урыстәыла Афедералтә Шәарҭадаратә Маҵзура Аҳәаахьчаратә усбарҭахь иааз Урыстәылатәи Афедерациа иреиҳаӡоу арратә ҵараиурҭақәа роушьҭымҭацәа ирыдиныҳәалеит рҵара иахьалгаз, ирзеиӷьеишьеит рыррамаҵураҿы ақәҿиарақәа.

«Афицарцәа ҿарацәа, ишәыдысныҳәалоит Аԥсны Аҳәынҭқарра Аҳәаахьчаратә архәҭақәа рҟны аусура шәахьалагаз. Шәара ишәоуз ҳаамҭа иақәшәо, зхаҭабзиара ҳараку аҵара уажәшьҭа аус аҟны шәхы иашәырхәар шәылшоит. Ҳҳәынҭқарра ҿыц азы акраҵанакуеит Урыстәылатәи Афедерациеи ҳареи ҳаизыҟазаашьақәа еиҳа-еиҳа рырҭбаара. Урҭ иахьатәи аамҭазы рыҩаӡара ҳаракуп. Аԥсны иара убасгьы иҟоуп 7-тәи арратә база, аҳәаахьчаратә еиҵашарақәа. Шәаԥхьа арра змаҵура зхызгоз ишьҭарҵаз ауасхыр аихаҳара шәнапы иануп.

Ишәзеиӷьасшьоит шәыррамаҵура маншәаланы ишәхыжәгарц, агәабзиареи ақәҿиарақәеи шәыгмыз», - иҳәеит Ахада.

Афицарцәа ҿарацәа Ахада иҭабуп ҳәа иарҳәеит иԥханы иахьидикылаз, иара убасгьы агәра идыргеит рҵараҟны ироуз адыррақәа зегьы Аԥсны Аҳәынҭқарра аҳәаақәа рыхьчара амаҵураҿы қәнагала рхы ишадырхәо.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT