Аҧсны Аҳәынҭқарра Ахада

 

Ахада Анатоли Бибилов Алада Уаԥстәыла Ареспублика Амш идиныҳәалеит

20.09.2017

Цәыббрамза 20 рзы Аԥсны Аҳәынҭқарра Ахада Рауль Ҳаџьымба Алада Уаԥстәыла Ареспублика Ахада Анатоли Бибилов Аҳәынҭқарра Амш идиныҳәалеит.

***

Ҳаҭыр зқәу Анатоли Илиа-иԥа!

Аԥсны жәлар рыхьӡалеи сара хаҭалеи Алада Уаԥстәыла аиашьаратә жәлар зегьы ирыдысныҳәалоит аныҳәа ду – Ареспублика Амш.

1990 шықәса цәыббрамза 20 амш Алада Уаԥстәыла амилаҭ ахақәиҭреи ахьыҧшымреи рзы рықәԥара аҭоурых аҿы крызҵазкуа хҭысны иҟалеит. Убри аҽноуп Амилаҭтә депутатцәа Рхеилак, Алада Уаԥстәыла ажәлар ргәаҳәара шьаҭас иҟаҵаны, ауаԥс жәлар рхы иақәиҭны ахатәҳәаақәҵарази ихьыҧшымкәа аҿиаразы иузырҟәымҭхо ирымаз азин ахьазхаҵаз Адекларациа анаднакылаз.

Ареспублика Амш – имариамыз ақәҧараҟны ахақиҭреи аҭынч ҧсҭазаареи рзы азин аиура зылшаз Алада Уаԥстәыла ажәлар ргәымшәареи рфырхаҵареи ирсимволу ныҳәоуп.

Алада Уаԥстәыла Урыстәыла ду ацхыраарала асоциал-економикатә ҿиареи, аҳәынҭқарратә институтқәа рыррӷәӷәареи, жәларбжьаратәи аимадарақәа рыррҭбаара амҩа иануп.

Аҵак ду амоуп аамҭеи ауадаҩрақәеи иԥыршәахьоу ҳҳәынҭқаррақәеи ҳажәларқәеи аиашьаратә еизыҟазаашьа бзиақәа ахьрыбжьоу. Агәра ганы сыҟоуп, ҳажәларқәа реизҳазыҕьара иазку аԥсны-аладауаԥстә усеицура аҧхьаҟагьы аҿиара шроуа, рыҽшдырҕәҕәо.

Ҳаҭыр зқәу Анатоли Илиа-иԥа! Абри амш шьахә аҽны Шәареи шәыжәлари ишәсеиӷьасшьоит аҭынчра, аизҳазыӷьара, ԥхьацара! 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT