Ахада Даниель Ортега идиныҳәалеит Ареспублика Никарагуа Ахьыҧшымра амш

Цәыббрамза 15 рзы Аҧсны Аҳәынҭқарра Ахада Рауль Ҳаџьымба Ареспублика Никарагуа Ахада Хосе Даниель Ортега Сааведра идиныҳәалеит Никарагуа Ахьыҧшымра амш.

***

Шәаҳаракыра ҳаҭыр зқәу Ахада!

Аҧсны Аҳәынҭқарра иқәынхо ажәлар зегьы рыхьӡалеи сара хаҭалеи ишәыдысныҳәалоит шәмилаҭтә ныҳәа - Ареспублика Никарагуа Ахьыҧшымра амш.

190 шықәса инареиҳаны ҵуеит Никарагуа ажәлар рхақәиҭратә қәҧараҟны аиааира ргеижьҭеи, иззыҧшыз ахьыҧшымра роуижьҭеи. Ари шәмилаҭтә ныҳәа ҧшьа Ареспублика Никарагуа азы ахақәиҭреи, аизҳазыҕьареи, аҿиареи ирсимволуп.

Аҧсны жәлар ҳаҭыр дула иазыҟоуп ҳҳәынҭқарра азхаҵаразы иҟашәҵаз ашьаҿа. Шәара Латинтәи Америкаҟны раҧхьаӡа аиҩызара ҳабжьазҵаз ҳәынҭқарроуп. Агәыҕра сымоуп наҟ-наҟгьы урҭ аизыҟазаашьақәа бзиақәа рырҕәҕәаразы ҳаҩганкьы ҳамчи-ҳалшеи шрыдаҳҵало. Уи азы ҳажәларқәа агәаҳәара аадырҧшуеит.

Исоуз аҭагылазаашьа схы иархәаны, Шәара ҳаҭыр ду шшәықәысҵо агәра шәырго, Ареспублика Никарагуа ажәлар аҭынчреи аизҳазыҕьареи рзеиҕьасшьоит.


Возврат к списку