Аҧсны Аҳәынҭқарра Ахада

 

Аедыг Республика Ахада аамҭала инапынҵақәа назыгӡо Мураҭ Кумпилови еиԥылеит

09.09.2017

Аедыг Республика Ахада аамҭала инапынҵақәа назыгӡо Мураҭ Кумпилови еиԥылеит

Цәыббрамза 9 рзы Маикоп ақалақь аҟны Аԥсны Аҳәынҭқарра Ахада Рауль Ҳаџьымбеи Аедыг Республика Ахада аамҭала инапынҵақәа назыгӡо Мураҭ Кумпилови еиԥылеит

Мураҭ Кумпилов Аԥсны Ахада аԥсшәа иаҳәо, ицәажәара хациркит:

«Рауль Џьумка-иԥа ҳтәыла дахьаҭааз гәахәара дула иҳадаҳкылоит, иҭабуп ҳәагьы иаҳҳәоит. Раԥхьа ажәа аиҳабы ирҭоит азы, Рауль Џьумка-иԥа, ҳаиԥылара Шәара ихацшәыркыр сҭахуп», - иҳәеит Аедыг Республика Ахада аамҭала инапынҵақәа назыгӡо.

Рауль Ҳаџьымба Мураҭ Кумпилов иҭабуп ҳәа иеиҳәеит дахьидикылаз:

«Агәра ганы сыҟоуп атәыла напхгара уаанӡа иазызуаз ахадацәа злагаз аусқәа нагӡара шроуа. Аедыгтәыла аҿиаразы иахьа алшара бзиақәа амоуп, аамҭа шәаҩшәмыжьроуп. Аҿаргьы активла ауаажәларра-политикатә ԥсҭазаара рҽагәылархалароуп. Уи, хымԥада, алҵшәақәа бзиақәа аанарԥшуеит.

Сара сыхәҭаахьала иҭабуп ҳәа шәасҳәар сҭахуп Аԥсны шәазыҟазаашьазы. Ҳаимадарақәа рырҿиаразы иҟаҵоу маҷӡам. Иахьа даҽазныкгьы агәра згеит ҳацхраара инеиз хатәгәаԥхарала иеибашьуаз афырхацәа хылаԥшрада ишаанымхаз. Иҵегь иҟаҵатәу ыҟоуп, урҭ аибашьцәеи ҳареи ҳаимадарақәа рырӷәӷәаразы. Дара роуп еиҳараӡакгьы Аедыгтәыла аҿиареи ԥхьацареи рҿы хадара зуа мчны иҟало», - иҳәеит Аԥсны Аҳәынҭқарра Ахада.

Аедыг Республика Ахада аамҭала инапынҵақәа назыгӡо даҽазныкгьы Аԥсны Ахада иҭабуп ҳәа иеиҳәеит:

«Даҽазныкгьы иҭабуп идуӡӡаны ҳәа шәасҳәар сҭахуп, Рауль Џьумка-иԥа, ҳтәыла шәахьаҭааз. Агәра ганы сыҟоуп, Аедыгтәыла иқәынхо ауааԥсыра зегьы, шамахамзар, ара шәыҟазаара ишеигәырӷьо. Ҳтәыла иахагылаз зегьы еснагьгьы Аԥсны Аҳәынҭқарреи ҳареи ҳаиашьаратә еимадарақәа дырҭбаауан. Ҳаргьы, хымԥада, уи аганахьала аусқәа ирыцаҳҵалоит, ҳаизыҟазаашьақәа ҳарӷәӷәалоит. Аԥсны иамоу аихьӡарақәа ҳдыргәырӷьоит. Урыстәылатәи Афедерациа Ахада Владимир Путини Шәареи шәеиԥыларақәа зҿлымҳара дула ҳрыхәаԥшуеит. Уажәааигәа имҩаԥысыз шәеиҿцәажәара аԥхарра аҵаны имҩаԥысит. Ҳара ҳахәҭаахьала аекономикатәи акультуратәи еимадарақәа иҵегьы иҳарӷәӷәалоит. Ҳәарада, хатәгәаԥхарала Аԥсны ахьчаразы иеибашьуаз рганахьала аусура ҳарҭбаалароуп. Ҳтәыла аиҳабыра акәзар, агәра шәҳаргоит, урҭ гәыкала, ишрықәнагоу еиԥш ҳшырзыҟазаауа. Даҽазныкгьы иҭабуп ҳәа шәасҳәоит, Рауль Џьумка-иԥа. Ҳаиҩызара, ҳаизыҟазаашьақәа еснагь ҳаҭыр ду рықәаҳҵалоит», - иҳәеит Мураҭ Кумпилов.

Цәыббрамза 9-10 рзы Аԥсны Аҳәынҭқарра Ахада Рауль Ҳаџьымба Аедыг Республика даҭаан дыҟан аамҭала ареспублика ахада инапынҵақәа назыгӡо Мураҭ Кумпилов иааԥхьарала, Аедыг Республика Ахада иинаугурациа ацеремониа иҽалаирхәразы. Аҳәынҭқарра Ахада дицуп Адәныҟатәи аусқәа рминистр Даур Ақаҩба.

АИХ рзы Ахада Ипресс-маӡаныҟәгаҩ лдырраҭара


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT