Аҧсны Аҳәынҭқарра Ахада

 

Рауль Ҳаџьымбеи Мураҭ Кумпилови 1992-1993 шш. Аҧсны Жәлар рџьынџьтәылатә еибашьраҟны иҭахаз Аедыгтәыла аибашьцәа рбаҟа амҵан ашәҭқәа шьҭарҵеит.

09.09.2017

Рауль Ҳаџьымбеи Мураҭ Кумпилови 1992-1993 шш. Аҧсны Жәлар рџьынџьтәылатә еибашьраҟны иҭахаз Аедыгтәыла аибашьцәа рбаҟа амҵан ашәҭқәа шьҭарҵеит.

Цәыббрамза 9 рзы Аҧсны Аҳәынҭқарра Ахада Рауль Ҳаџьымба Аедыг Республика Ахада аин Мурат Кумпилов дицны, 1992-1993 шш. Аҧсны Жәлар рџьынџьтәылатә еибашьраҟны иҭахаз аибашьцәа рбаҟа амҵан ашәҭқәа шьҭеиҵеит.

Ашәҭшьҭаҵара аусмҩаҧгатә иара убас иалахәын Аедыг Республикаҟынтәи Аҧсны Жәлар рџьынџьтәылатә еибашьра иалахәызи Маиҟәаҧ аҵара зҵо Аҧснытәи астудентцәа рхаҭарнакцәеи.

Рауль Ҳаџьымба хатәгәаҧхарала Аҧсны иеибашьуаз аҧсшәа ҳәо, иҭабуп ҳәа реиҳәеит:

"Аибашьра - хҭыс бааҧсуп, аха иара наҟ-ааҟ аибадырразы, аидгыларазы алшара ҳнаҭеит, Аҧсны аиқәырхаразы аҭагылазаашьақәа аҧнахеит.

Адыгеиа анапхгара иҭабуп ҳәа расҳәарц сҭахуп. Аедыгтәыла, Ҟабарда-Балкариа, Ҟарачы-Черқьесиа анапхгараҟны иҟаз зегьы Аҧсны ахьчаразы игылаз зегьы хашҭра рықәымкәа иҟазароуп рҳәон.

Иахьа сара иеилыскаауеит ари аус еиҳа ирццакны аӡбара ишалаго сҩыза Аедыгтәыла иахьатәи анапхгаҩы ибзоурала. Агәра згоит арҭ аизыҟазаашьақәа ҳажәларқәа изларзеиҕьу ала аҧхьаҟагьы аҿиара шыҟало”, - иҳәеит Аҧсны Ахада.

Аедыг Республика Ахада аин Мурат Кумпилов Аҧсны Ахада Адыгатәылаҟа иааразы иҭабуп ҳәа иеиҳәеит.

"Рауль Џьумка-иҧа, иҭабуп. Аҧсны Ахада дшааз еиҧшҵәҟьа ари абаҟа ашҟа ааира иҭаххеит, хатәгәаҧхаралатәи аибашьцәа дырҧылеит. Ҳара аиҧыларақәа мҩаҧаҳгахьан, ҳаицәажәахьан. Џьара акы агҳархақәазаргьы ҟалоит, уи аартны иҳәатәуп. Ҳара ҳаҩныҵҟагьы аҭагылазаашьақәа еиҭакхоит, ҳхазы ишышьақәҳаргылаз еиҧш, заа иазҧхьагәаҭаны аиҧыларақәа мҩаҧаҳгалоит, апроблемақәа ҳрылацәажәалоит. Ҳара шәара шәызхысыз еилаҳкаауеит, ҳаҭырлагьы ҳазыҟоуп. Рауль Џьумка-иҧа иажәа иалаҵаны "сара сҩыза" иҳәеит, ари аҭакҧхықәра ҳаднаҵоит, ҳара ҳганахьалагьы иҳалшо зегьы ҟаҳҵоит.

Даҽазныкгьы иҭабуп ҳәа шәаҳҳәоит ҳауаажәлар зегьы рыҟнытә. Адыгеиа ажәлар зегьы Аҧсны жәлар гәыкала ирзыҟоуп. Ҳара зегьы иаҳҭахуп иҳаиашьароу Аҧсны ҿиаларц, еизҳазыҕьаларц. Шәара ҳҳәынҭқарра Ахада шәаниҧылоз зҿлымҳара ду аҭаны ҳшәыхәаҧшуан, аҩ-ганктәи аиҧылара алҵшәақәа ҳгәы шьҭырхуан, ҳаигәырҕьон. Аихьӡарақәа шәзеиҕьасшьоит", - иҳәеит Мурат Кумпилов.

Хатәгәаҧхаралатәи аибашьҩы Каплан Куижев иазгәеиҭеит хатәгәаҧхаралатәи аибашьцәа реидгыла есқьынгьы Аҧсны адгылара ишазхиоу.

"Владислав Григори-иҧа Арӡынба иаҳҭаз аҭоуба ҳацәхьаҵраны ҳаҟаӡам. Ҳара есқьынгьы адгылара шәыҭара ҳазхиоуп” - азгәеиҭеит иара.

Рауль Ҳаџьымба иазгәеиҭеит Аҧсназы ашықәс хьанҭақәа раан иҳадгылаз рыхьӡ кашәара шақәым.

"Арҭ аҿырҧштәқәа рыла иахьа игыло абиҧарақәа рааӡара аҭахуп. Ари даара акраҵанакуеит. Ҳара ҳаззыгәдуу ҳамоуп. Абри адгьыл хәыҷ рхы ақәырҵеит хыҧхьаӡара рацәала ауаа", - иҳәеит Аҧсны Аҳәынҭқарра Ахада.

Рауль Ҳаџьымба Адыгеиа аҵара зҵо астудентцәеи иареи еицәажәеит, ирзеиҕьеишьеит рҵараҿы аихьӡарақәа иазгәеиҭеит рҵара аныхдыркәшалак рыҧсадгьыл аҟны ишырзыҧшу.

Цәыббрамза 9 инаркны цәыббрамза 10-нӡа Рауль Ҳаџьымба Аедыг Республика дыҟоуп ареспублика Ахада аин Мурат Кумпилов ииҭаз ааҧхьарала Аҳәынҭқарра Ахада имаҵура аанкылара иазкыз аусмҩаҧгатә алахәхаразы. Аҧсны Ахада ивизит аан дицын Аҧсны аҳәынҭқарра Адәныҟатәи аусқәа рминистр Даур Ақаҩба.

GNN_7988.JPG

GNN_8115.JPG

GNN_8150.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT