Аҧсны Аҳәынҭқарра Ахада

 

Ахада Ҟабарда-Балкариатәи Ареспублика Ахада Иури Коков диҧылеит

08.09.2017

Ахада Ҟабарда-Балкариатәи Ареспублика Ахада Иури Коков диҧылеит

Цәыббрамза 8 рзы Аҧсны Аҳәынҭқарра Ахада Рауль Ҳаџьымба Нальчик Ҟабарда-Балкариатәи Ареспублика Ахада Иури Коков диҧылеит.

Иури Коков Рауль Ҳаџьымба Ареспублика дахьаҭаази иҟаиҵо адгылареи рзы иҭабуп ҳәа иеиҳәеит.

«Ҳажәларқәа ирыбжьоу аизыҟазаашьақәеи рзеиҧш ҭоурыхи ҳасаб рзуны даҽакала ҟалашьа амаӡамызт», - иазгәеиҭеит Иури Коков.

Аҧсны Аҳәынҭқарра Ахада иазгәеиҭеит 1992-1993 шш. рзы Аҧсны Жәлар рџьынџьтәылатә еибашьраан Аҧсны ахақәиҭтәразы ақәҧараан Ҟабарда-Балкариатәи хатәгәаҧхарала еибашьра иааз рроль.

«Сара ара шәбара сеигәырҕьоит. Ҳажәларқәа ирыбжьоу аиҩызаратә еизыҟазаашьақәа шьақәырҕәҕәахеит Аҧсны ахьчаразы игылаз, аҧсуа жәлар ирыдгылаз Ҟабарда-Балкариантәи хатәгәаҧхарала инеиз аибашьцәа рыла. Ҳара ҳаизыҟазаашьақәа аҧхьаҟагьы инагӡахароуп», - иҳәеит Рауль Ҳаџьымба.

Аҧсны Аҳәынҭқарра Ахада Рауль Ҳаџьымбеи Ҟабарда-Балкариатәи Ареспублика Ахада Иури Кокови иазгәарҭеит жәытәнатә аахыс Аҧсни Ҟабарда-Балкариеи ирыбжьоу акультуратәи адоуҳатә еимадарақәеи, ирылацәажәеит аҧхьаҟатәи ҩ-ганктәи русеицура иадҳәалоу азҵаарақәа.

Цәыббрамза 7 инаркны цәыббрамза 9-нӡа Рауль Ҳаџьымба Ҟабарда-Балкариатәи Ареспублика Ахада Иури Коков иааҧхьарала визит ҳасабла Ҟабарда-Балкариатәи Ареспубликаҟны дыҟоуп Аҳәынҭқарра амши Ҟабарда-Балкариеи Урыстәылеи рыжәларқәа ракра 460 шықәса ахыҵреи разгәаҭара иазку аныҳәатә усмҩаҧгатәқәа рылахәхаразы.

АХИ рзы Ахада Ипресс-маӡаныҟәгаҩ лыҟнытә ацҳамҭа.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT