Аҧсны Аҳәынҭқарра Ахада

 

Ахада Алеко Гәарамиа Имшира идиныҳәалеит

07.09.2017

Цәыббрамза 7 рзы Аҧсны Аҳәынҭқарра Ахада Рауль Ҳаџьымба Аҧснытәи аҳәынҭқарратә университет аректор Алеко Гәарамиа имшира идиныҳәалеит.

***

Ҳаҭыр зқәу Алеко Алеқсеи-иҧа!

Гәык-ҧсыкла ишәыдысныҳәалоит Шәымшира!

Шәара ҳара ҳтәылаҟны шәеицырдыруеит ҳазҭагылоу аамҭазтәи алгебра аҟәшаҟны зусумҭақәеи аматематикатә ҭҵаарадырраҟны злагаламҭеи адунеи зегьы аҟны ахә ҳаракны иршьахьоу иналукааша ҵарауаҩык, иара убас ауаажәларратә, аполитикатә усзуҩык, Аҧсны Ареспублика Иреиҳаӡоу асовет – Аҧсны Ареспублика Апарламент адепутатк иаҳасабала (1991-1996 шш.). Хшыҩзышьҭра зуҭаша акоуп Шәара Москватәи аҳәынҭқарратә университет ҳаҭыр зқәу профессорс, Европа Аректорцәа рыклуб шәахьылахәу (oxford-2009).

Шәара жәларбжьаратәи ахьӡ ишәымоу, ааҧсарада шәусура, шәентузиазм, нҵәара зқәым шәгәамч ирыбзоураны Аҧсназы иуадаҩыз аибашьра аамҭазтәии уи ашьҭахьтәии аамҭақәа рзы Аҧснытәи аҳәынҭқарратә университет иалшеит Урыстәылеиҧш егьырҭ атәылақәа рҟынгьы иреиҳау аҵараиурҭақәеи иареи аимадарақәа рышьақәыргылареи реиқәырхареи. Шәара иҟашәҵаз рацәоуп аҵараиура атрадициа бзиақәа реиқәырхаразы, урҭ иахьатәи аҧсҭазаара анырнааларазы.

1989ш. инаркны Аԥснытәи аҳәынҭқарратә университет аректорс шәыҟоуижьҭеи Шәара ишәылшеит зыҩаӡара ҳараку арҵаратә процесс аиҿкаара. Арҭ ашықәсқәа ирылагӡаны ААУ иалгеит еиуеиҧшым аҟәшақәа рыҟны азнааҭ зыҟаҵара бзиа змоу акымкәа абиԥарақәа. Иахьа ҳуниверситет аушьҭымҭацәа аҭакҧхықәра зцу амаҵзура ааныркылоит еиуеиԥшым ахырхарҭақәа рыҟны.

Ҳара ҳаҭыр ду ақәаҳҵоит гәыкала шәыззыҟоу ауниверситет хамеигӡарак ҟамҵакәа иадышәҵо аџьабаа. Ишәзеиӷьаҳшьоит агәамч ӷәӷәа, шәнапы злаку аус аҿы аихьӡара ҿыцқәа, шәыгәҭакқәа рынагӡара!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT