Аҧсны Аҳәынҭқарра Ахада

 

Ахада аӡбаратә система ахаҭарнакцәа дырԥылеит

04.09.2017

Цәыббрамза 4 рзы Аԥсны Аҳәынҭқарра Ахада Рауль Ҳаџьымба аӡбаратә мчра ахаҭарнакцәа дырԥылеит. Уи иалахәын Иреиҳаӡоу Аӡбарҭа Ахантәаҩы Зураб Агәмаа, Абжьаҟазаратә ӡбарҭа Ахантәаҩы Фатима Кәыҵниа, Иреиҳаӡоуи Арратәи ӡбарҭақәа рхантәаҩцәа, араионтәи ақалақьтәи ӡбарҭақәа рхантәаҩцәа.

Ахада инаҵшьны иазгәеиҭеит аӡбаратә мчра аусбарҭақәа ирыдыркыло аӡбамҭақәа аҳәынҭқарра аҭахрақәа ирықәшәозар шакәу.

«Аӡбаратә мчра аусбарҭақәа рҟны иҟоу аҭагылазаашьақәа агщынамӡара ҳнаҭоит. Аҳәынҭқарра ахьӡала ирыдыркыло аӡбамҭақәа уи аҭахрақәа ирықәшәаӡом. Азакәан ауааҧсыра рзы мацара акәӡам изыҟоу, уи хаз игоу ачынуаа рымацарагьы ракәӡам, уи иқәныҟәароуп, неиҩымсрада аӡбаҩцәа рхаҭақәагьы. Шәара аҳәынҭқарра аусбарҭаны шәыҟоуп, имҩаԥысуа ахҭысқәа зегьы рзы аҭакԥхықәра шәаргьы ишәыдуп. Аҳәынҭқарраҟны иӡбахо азҵаарақәа зегьы хаз игоу ауаа рзы мацара акәымкәа, аҳәынҭқарра иахәарҭахартә иҟалароуп. Ҳәынҭқарра аҭахрақәа ирҿагылаз аӡбамҭақәа шрыдыркылазгьы,

аӡбаҩцәа рахьтә аӡәгьы ашьауӷа дақәыршәамызт.

Аҟәатәи ашколқәа руак ахыбра уаанӡа арендала ирырҭахьаз даҽа хырхарҭак ала ахархәара иалагеит. Аҳәынҭқарра аиқәшаҳаҭра аԥыхразы азҵаара анықәнаргыла, арендадкылаҩ аӡбарҭаҿы ари аобиект иара изынхарц азы аус иаиҭеит, аӡбамҭахь даннеи, иара идгылеит.

Иахьа даҽа ускгьы убас еиԥш ихыркәшахеит – Пицундатәи ахәыҷбаҳча азҵаара инамаданы. Ари ахәыҷбаҳча иаҵанакуа адгьыл ахәҭак арендала акоммерциатә еилазаара иаҭан. Азин рызҭада ашкол, ахәыҷбаҳча ирыҵаркуа ахыбрақәа арендала рыҭара? Ари азҵаара абри шәнықәныҟәаны ҳасаб азыжәмуӡои?» - иҳәеит Рауль Ҳаџьымба.

Ахада Иусбарҭа актәи ихаҭыԥуаҩ, Аӡбаҩцәа Рыквалификациатә еилазаара иалахәу Дмитри Шамба иажәақәа рыла, аҵыхәтәантәи ашықәсқәа рзы аӡбарҭақәа рхантәаҩцәа рыҟнытә Иреиҳаӡоу Аӡбарҭа зыӡбамҭақәа ааннакылаз аӡбаҩцәа аџьалеишәатә ҭакԥхықәра иақәдыршәаз дыҟаӡам.

Аҳәынҭқарра Ахада Иусбарҭа аҿаҧхьа уснагӡатәны иқәиргылеит аӡбарҭатә мчразы азакәанԥҵарахь аиҭакрақәа ралагаларазы азакәан апроект аиқәыршәара.

АИХ рзы Ахада Ипресс-маӡаныҟәгаҩ лдырраҭара 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT