Аҧсны Аҳәынҭқарра Ахада

 

Аҵарашықәс ҿыц алагамҭа адныҳәалара

04.09.2017

Цәыббрамза 4 рзы Аҧсны Аҳәынҭқарра Ахада Рауль Ҳаџьымба Аҧсны Аҳәынҭқарра арҵаҩцәеи аҵаҩцәеи аҵарашықәс ҿыц алагамҭа рыдиныҳәалеит.

Адныҳәалара атекст аҟны, ҷыдала, иҳәоуп:

«Акыр иаҧсоу ашколхәыҷқәа, арҵаҩцәа, аҭаацәа!

Гәык-ҧсыкала ишәыдысныҳәалоит аҵарашықәс ҿыц алагамҭа!

Ари амш ҳтәылаҟны аҵара зҵо ашколхәыҷқәа, астудентцәа, урҭ рҭаацәа, арҵаҩратә уаажәларра зегьы рзы ргәы хыҭхыҭуа иззыҧшу ныҳәак иаҩызоуп.

Ари ныҳәамш аҵак ду амоуп ҳтәыла абиҧарақәа зегьы рзы. Ҳара иага еихьӡара ҳамазаргьы, урҭ рышҟа амҩа ахы акуеит ашкол аҟнытә, избан акәзар иарбан усзаалак аҟны аҵараиура зегьы ирыцкуп. Ашколтә ҧсҭазаара, астуденттә шықәсқәа, бзиа иаҳбо ҳарҵаҩцәа ахааназы ҳгәы иҭнымҵәо инхоит, гәалашәара лашақәаны иҳацзаауеит.

Иахьа ауаажәларраҿы ҷыдала зҿлымҳара ду рымоуп аҵараиура, адыррақәа, аҧышәа. Убри аҟнытә аҿар ибзианы аҵара рҵалароуп, адыррақәа рырҳара, рыгәҭакқәа рынагӡара иашьҭазароуп.

Ари амш зықьҩыла аҵаҩцәа, астудентцәа иазгәарҭоит. Раҧхьатәи аҵәҵәа иаанартуеит адыррақәа рдунеи ашҟа амҩа. Раҧхьаҟа ирзыҧшуп аамҭа ссир.

Иреиҕьу адныҳәаларақәа рыдыркылоит ҳаҭыр зқәаҳҵо, бзиа иаҳбо ҳарҵаҩцәа. Урҭ ахәыҷқәа, аҿар аҵара дырҵара, рааӡара аус рыҧсҭазаара ҵакыс иамоу ауп. Ишәзеиҕьасшьоит аҟәыҕара, ачҳара, аҵаҩцәа рганахьала агәрагара, абзиабара.

Адыррақәа рышҟа ихоу амҩа насыҧла иҭәызааит, иманшәалазааит! Агәабзиара, аихьӡарақәа шәзыҧшызааит шәҿаҧхьа иқәгылоу ауснагӡатәқәа рыҟны!»


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT