Аҧсны Аҳәынҭқарра Ахада

 

Аҧсны Ахада Иу. Воронов ихьӡ зху Аҟәатәи абжьаратә школ №3 аартраҟны иқәгылара

04.09.2017

Цәыббрамза 4 рзы Аҧсны Аҳәынҭқарра Рауль Ҳаџьымба Иу. Воронов ихьӡ зху Аҟәатәи абжьаратәи азеиҧшдырратә школ №3 шьаҭанкылатәи арҽеиратә усурақәа рышьҭахь аартра иазкыз ацеремониа далахәын.

***

Ҳаҭыр зқәу Аҧсны Аҳәынҭқарра арҵаҩцәеи аҵаҩцәеи! Ишәыдысныҳәалоит иахьатәи аныҳәа - аҵарашықәс ҿыц алагара амш!

Ашкол – аҵаҩы ҧхьаҟатәи иҧсҭазаараҿы ихәо адырра ҿыцқәа изҭо, идунеихәаҧшра зырҭбаауа, дуаҩ иашаны дзааӡо ҵараиурҭоуп. Иеиҵагыло ҳҵеира адырра беиақәеи ааӡара бзиеи анроуа ауп ҳаҧсадгьылгьы аҧеиҧш лаша анаиуа. Аҵарадырра ҳарак змоу ауаажәларроуп иҕәҕәоу, ишәарҭадоу, иҭышәынтәалоу аҳәынҭқарра аргылара зылшо. Уи азы аҿаргьы рырҵаҩцәа ирыдырбало аџьабаа ҳаҭыр ақәҵаны, изнырҵо амҩа иаша иацәхьамҵроуп.

Аҵарашықәс раҧхьатәи амш азы аҵаҩцәеи арҵаҩцәеи зегьы, ҳәарада, ргәы хыҭхыҭуеит. Аха иахьа зашҭа ҳҭагылоу ашкол азы ари амш еиҳагьы аҵак ду амоуп. Избанзар иахьа инаркны уи ашколхәыҷқәеи арҵаҩцәеи рзы ҿыц ашәқәа аанартуеит иеиҭашьақәыргылаз ари аҭоурыхтә ҵараиурҭа. Иеиуеиҧшым аамҭақәа рзы ара аус руан, аҵарагьы рҵон Аҧсны иеицырдыруаз ауаа. Урҭ рахьтә, раҧхьаӡа иргыланы, рыӡбахә ҳәатәуп ари ашкол зыхьӡ аху ауаажәларратә усзуҩ, аҭоурыхҭҵааҩ, Аҧсны апатриот иаша Иури Воронови ҧсра зқәым зҩымҭа ссирқәа рыла ҳаҧсадгьыл ахьӡ ҭызгаз Фазиль Искандери, иеицырдыруа ауаажәларратә-политикатә усзуҩи, арҵаҩи Андреи Ҷоҷуеи.

Иахьазы арҵаратә процесс ишақәнагоу имҩаҧысларазы ара ҳаамҭа иақәшәо аҭагылазаашьақәа зегь аҧҵоуп.

Гәык-ҧсыкала ишәзеиҕьасшьоит агәамч, аманшәалара. Ахәыҷқәа аҵарамш рҵо, арҵаҩцәа рџьабаа мыӡуа, аҭаацәа рхәыҷқәа рааӡаразы аҭагылазаашьа бзиақәа рыманы!

Шәаҧхьаҟа ақәҿиара дуқәа шәзыҧшызааит!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT