Аҧсны Аҳәынҭқарра Ахада

 

Рауль Ҳаџьымба Руслан Қьышьмариа иԥсҭазаара иалҵра инамаданы иуацәеи иҭынхацәеи дрыдышшылеит

31.08.2017

Нанҳәамза 31 рзы Аԥсны Аҳәынҭқарра Ахада Рауль Ҳаџьымба ауаажәларратә усзуҩ, 1992-1993шш. рызтәи Аԥсны жәлар рџьынџьтәылатә еибашьра аветеран, Леон иорден занашьоу Руслан Қьышьмариа иԥсҭазаара иалҵра инамаданы иуацәеи иҭынхацәеи гәалсра дула дрыдышшылеит 

Адышшылара атекст аҟны, ҷыдала, иҳәоуп:

«Ауаажәларратә усзуҩ, 1992-1993шш. Аԥсны жәлар рџьынџьтәылатә еибашьра аветеран, Леон иорден занашьоу Руслан Қьышьмариа иԥсҭазаара иалҵра гәалсра дула исыдыскылеит.

Руслан Ражден-иԥа дыздыруаз ргәалашәараҿы даанхоит зыхдырра ҳаракыз, зыԥсадгьыл азы патриот иашаны иҟаз уаҩык иаҳасабала.  Аԥсны жәлар рџьынџьтәылатә еибашьраан иааирԥшыз афырхаҵареи ахамеигӡареи рзы ианашьан иҳараку аҳәынҭқарратә ҳамҭа – Леон иорден. Руслан Ражден-иԥа аибашьра ашьҭахь ҳҳәынҭқарра аргылареи арҿиареи рзы иҟаиҵаз алагала ахә ҳаракны иаҳшьоит, ҷыдала иуҳәозар, Гал араион Ахадара напхгара анаиҭоз, уи араион аҟны азинмчи аҭынч ԥсҭазаареи рышьақәыргылараҟны, анаҩсан Аԥсны Аҳәынҭқарра Ахада иҷыдоу ихаҭарнакс даныҟази иибаз аџьабаа.

Руслан Ражден-иԥа иԥсҭазаара иалҵра аԥсуа жәлар зегь ҳзы ицәыӡ дууп. Иуацәеи иҭынхацәеи ргәырҩа рыцеиҩаҳшоит. Иԥсаҭа бзиахааит».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT