Аҧсны Аҳәынҭқарра Ахада

 

Ахада Лышәба Адгәыр Аҧсны Аҳәынҭқарратә ҳазалхратә еилакы аколлектив дыдирдырит

25.08.2017

Нанҳәамза 25 рзы Аҧсны Аҳәынҭқарра Ахада Ҳаџьымба Рауль Аҧсны Аҳәынҭқарратә ҳазалхратә еилакы аколлектив ахантәаҩ ҿыц Лышәба Адгәыр дыдирдырит.

Аҳәынҭқарра Ахада иқәгылараҿы иазгәеиҭеит аҳазалхырҭа – атәыла абиуџьет шьақәзыргыло еилазаараны ишыҟоу.

«Ари аилазаара аҳәынҭқарра иаҭаху еилазаароуп. Иара, атәыла абиуџьет шьақәзыргыло еилазаарак аҳасабала, аибашьра ашьҭахьтәи ашықәсқәа раан иалшаз маҷӡам. Абри инадкыланы иҳәатәуп, ара аус зуаз арҧарцәа аӡәырҩы ҳҳәынҭқарра ашьақәгылара аус рхы шақәырҵаз. Сара ара аус зуан, ибзианы издыруеит аҳазалхырҭа аус ҭакҧхықәрала уаназнеиуа лҵшәақәас иаиуа», - иҳәеит Рауль Ҳаџьымба.

Ахада иазгәеиҭеит аилак ҧасатәи анапхгаҩы аҳазалхратә еилазаара аҿиареи ашьақәгылареи рзы иҟаиҵаз шмаҷым.

«Иахьанӡа аилак напхгара азҭоз илшаз маҷӡам. Аибашьра иалахәыз, аибашьра ашьҭахь абри аилазаара ашьақәгыларазы акыр аус зухьаз. Аха иахьа иҧсахтәу рацәоуп, зҵаарақәак рыӡбара даҽакала рызнеира аҭахуп. Аилазаара аусура аганхьала азҵаара рацәоуп, иара убас апостқәа рахь, аформа зшәу иақәнагам аусқәа знапы алаку ауаа рганахьала. Анапхгараҟны имҩаҧысуа аиҭакрақәа аҭагылазаашьа аиҕьтәра иацхраауеит ҳәа ҳгәы иаанагоит», - иҳәеит Ахада.

Аҳәынҭқарра Ахада иаҵшьны иҳәеит, ҳбиуџьет ахатә хархәагақәа рыла ашьақәгылара алшартә еиҧш аҭагылазаашьа шаҧҵатәу.

«Еиҳа аамҭақәа аныуадаҩыз Владислав Григори-иҧа аӡбамҭа идикылахьан аидарақәа, еиҳаракгьы, ҳтәыла иалгахо ацитрустәқәа, ара аихамҩатә вокзалқәа рыҟны ишьҭырхларц, аҳазалхратә документқәа рыла реиқәыршәара аҳазалхыҩцәеи Урыстәылатәи Афедерациа аҳәаахьчаҩцәеи рыла имҩаҧгазарц азы. Сара ара сшәыдгылан, ибзианы исгәалашәоит ари. Ари ҳаидарақәа аҳәааҿы ишьақәымхарц азы алшара ҟанаҵон. Абас иахьагьы иаҭахны иҟоуп. Ари аамҭалатәи уснагӡатәуп. Уаҵәы ари азҵаара аныӡбаха, ааҧсарак ҟамҵакәа аусура шәалагароуп, атәыла абиуџьет азы. Даҽа знеишьак ҟамлароуп», - иациҵеит Аҳәынҭқарра.

Рауль Ҳаџьымба иазгәеиҭеит агәра шиго ахантәаҩ ҿыц инапхгарала аилак аусураҟны аихьӡарақәа шыҟало азы.

«Анапхгаҩ ҿыц итәы ҳҳәозар, ара иара дыззымдыруа дыҟаӡам. Аҧышәа бзиа имоуп, афинансқәа, аекономика рус бзианы идыруеит. Аусуразы аҭагылазаашьа бзиа шьақәгылоит ҳәа сгәы иаанагоит», - иҳәеит Ахада.

Аҧыза-министр Беслан Барцыц Лышәба Адгәыр профессионалк иаҳасабала дихцәжәеит.

«Ҳара Адгәыр Нурбеи-иҧа, аҧышәа змоу анапхгаҩы, аибашьрашьҭахьтәи ашықәс хьанҭақәа раан ҳтәыла аилазаара хадақәа - Аекономика аминистрра, Ашәахтәқәеи аизгақәеи рминистрра напхгара рызҭоз ауаҩы иаҭарала, иахьа напхгара зиҭо шәколлектив зегьы еидгыланы русеицурала алҵшәа бзиақәа ҳарзыҧшуп», - иҳәеит Аҧыза-министр.

Аҧсны Аҳәынҭқарратә ҳазалхратә еилакы аколлектив ахантәаҩ ҿыц Лышәба Адгәыр Аҧсны Аҳәынҭқарратә ҳазалхратә еилакы аколлектив аҧсшәа реиҳәеит, Ахада иҭабуп ҳәа иеиҳәеит акрызҵазкуа абри аусбарҭа ахагыларазы агәрагара ииҭаз азы.

«Аҳәынҭқарратә ҳазалхратә еилакы здыруеижьҭеи акыр ҵуеит. Ашәахтәқәеи аизгақәеи рминистрраҟны аус анызуаз ҳаизааигәаӡаны аус еицаҳуан, издыруеит аколлектив аидгылашьа аусураҟны, уи алшарақәа. Издыруеит иҟоу ауадаҩрақәа рытәгьы, урҭ ҳаидгыланы ҳариаароуп ари аусбарҭа аҳәынҭқарра иаҭаху аҩаӡараҟынӡа ашьҭыхразы, Ахада иқәиргыло ауснагӡатәқәа рынагӡаразы», - иҳәеит Лышәба Адгәыр.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT