Аҧсны Аҳәынҭқарра Ахада

 

Рауль Ҳаџьымба хатәгәаҧхарала иеибашьуаз рымш иазкыз амитинг аҟны иқәгылара

15.08.2017

Рауль Ҳаџьымба хатәгәаҧхарала иеибашьуаз рымш иазкыз амитинг аҟны иқәгылара

Нанҳәамза 15 рзы Аҧсны Аҳәынқарра Ахада Рауль Ҳаџьымба Гәдоуҭа ақалақь аҿы Хатәгәаҧхарала иеибашьуаз рбаҟа амҵан ашәҭқәа шьҭеиҵеит, Хатәгәаҧхарала иеибашьуаз рымш иазку амитинг аҿы дықәгылеит.

***

Ҳаҭыр зқәу ҳауаажәлар!

Акыр иаҧсоу аветеранцәа!

Гәык-ҧсыкала ишәыдысныҳәалоит Хатәгәаҧхарала иеибашьуаз рымш!

25 шықәса раҧхьа Аҧсны арыцҳара ду ҟалеит – Қырҭтәыла Аҳәынҭсовет архәҭақәа Ҳаҧсадгьыл иақәлеит, аибашьра ду хацдыркит? аҧсуа жәлар, ҳҭоурых, ҳкультура ақәхра хықәкыс иҟаҵаны. Абри аибашьраҿы 2700-ҩыуаак инареиҳаны иҭахеит, урҭ рыҩныҵҟа иҟоуп Аҩадатәи Кавказ, Аладатәи Урыстәыла, аҧсуа-адыга диаспора ахьықәынхо наскьа иҟоу атәылақәа, Алада Уаҧстәыла, Приднестровие уҳәа рыҟнытә 290-ҩык рҟынӡа хатәгәаҧхарала еибашьра иааз.

Ахатәы ҩны ахьчара – дарбанзаалак ахаҵа иуалуп, аха аиаша иадгыланы даҽаӡәы иҧсадгьыл ахьчаразы игылаз зегьы – ауаҩра дуӡӡа, агәымшәара аарҧшра зылшаз роуп.

Шәара иҟашәҵаз адгылара иабзоураны аҕа иаанкылара алыршахеит, Аҧсны ахақәиҭреи ахьыҧшымреи рырхынҳәра, аиаша аиҭашьақәыргылара ҳалшеит. Аибашьра аҧхьатәи амшқәа инадыркны Сулҭан Сосналиев напхгара зиҭоз Аҩадатәи Кавказынтә, Урыстәылантә хатәгәаҧхарала иааны иҳадгылаз ҳашьцәа аибашьра ааилгаанӡа милаҭ рацәала иеилоу Аҧсны жәлар ирывагылан Ҳаҧсадгьыл ахақәиҭра ахьчаразы.

Аҧсны жәлар ацхыраара рырҭарц азы хатәгәаҧхарала иааз ҳашьцәа ҳаибашьцәа ргәы шьҭырхит, аиааира агаразы агәрагара рыларҵеит. Аибашьра ианалага аҩбатәи амш азы Сулҭан Сосналиев дызхагылаз агәыҧ хатәгәаҧхарала Аҧсны аҳәаа иахыҵны ҳаибашьцәа инарылагылеит.

Хатәгәаҧхарала иааны иеибашьуаз, агрессор иҿагыланы Аҧсны ахьчаразы игылаз рыҩныҵҟа шәҩыла Аҧсны Аҳәынҭқарратә ҳамҭақәа ранашьоуп.

Аҧсны жәлар ахаан ирхашҭраны иҟаӡам еиҳа ианшәарҭаз ацхырааразы ихыҵны иааз арҭ арҧарцәа рфырхаҵара, ргәымшәара. Урҭ рфырхаҵарақәа ртәы абиҧара ҿыцқәа рҟынӡа инаӡартә иҟаҳҵароуп. Гәык-ҧсыкала иҭабуп ҳәа расҳәарц сҭахуп аҵеицәа гәымшәақәа зааӡаз анацәеи абацәеи.

Иахьа Аҧсны Аҳәынҭқарра Урыстәылатәи Афедерациеи егьырҭ атәылақәеи иазхарҵаз ихьыҧшым, зхы иақәиҭу ҳәынҭқарроуп. Хатәгәаҧхарала иеибашьуаз рхаҭарнакцәа иҳарҭо адгылара иабзоураны имариам, ҭакҧхықәра дуӡӡа змоу ихьыҧшым аҳәынҭқарра аргылара амҩа ҳануп. Хатәгәаҧхарала иеибашьуаз рхаҭарнакцәа атәыла анапхгараҟны аус руеит, акрызҵазкуа аҳәынҭқарратә маҵзурақәа рнапы иануп, атәыла аекономика арҿиара, ашәарҭадара арҕәҕәараҿы ацхыраара ҳарҭоит.

Акыр иаҧсоу ҳашьцәа-ҳаҳәшьцәа! Аҧсны жәлар зегьы рыхьӡала иҭабуп ҳәа шәасҳәоит иаашәырҧшыз афырхаҵаразы. Агәра ганы сыҟоуп ҳаимадара есааира ишыҕәҕәахало.

Ишәзеиҕьасшьоит аҭынчра, аизҳазыҕьара!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT