Аҧсны Аҳәынҭқарра Ахада

 

Аԥсны Жәлар Рџьынџьтәылатә еибашьра алагеижьҭеи 25 шықәса аҵра инамаданы Ахада иҟаиҵаз ааҧхьара

14.08.2017

Нанҳәамза 14 рзы Аԥсны Аҳәынҭқарра Ахада Рауль Ҳаџьымба аԥсуа жәлар рахь ихы нарханы Аԥсны Аџьынџьтәылатә еибашьра алагеижьҭеи 25 шықәса аҵра инамаданы ааҧхьара ҟаиҵеит.

***

Ҳаҭыр зқәу сыуаажәлар! Ҳаҭыр зқәу ҳветеранцәа!

Есышықәса, Аԥсны Жәлар Рџьынџьтәылатә еибашьра аналагаз амш аҽны ҳара иаҳгәалаҳаршәоит ҳаԥсадгьыл ахақәиҭразы зхы иамеигӡаз ҳфырхацәа, иҭахаз рбаҟа аҿаԥхьа ашәҭшьыҵәрақәа шьҭаҳҵоит.

25 шықәса раԥхьа ҳаԥсадгьыл аҭоурых аҿы ишьаарҵәырахаз даҽа даҟьак ацлеит. Уи ахьчаразы хамеигӡарала игылеит Аԥсни уи анҭыҵи инхоз згәы былуаз милаҭрацәала иеилаз ауаа. Абас ҳаидгыланы, ҳажәҩахыр еибыҭаны аӷа хәымга ҳахьиҿагылаз иабзоураны ақырҭуа мпыҵахалаҩцәа ҳаԥсадгьыл рықәцара ҳалшеит.

1992-1993шш. Аԥсны Аџьынџьтәылатә еибашьра аветеранцәа иаадырԥшыз афырхаҵара наунагӡа ҳгәаҵаҿы иаанхоит. Ҳара уалԥшьаны иҳадуп иаҳхаҳгаз ашьаарҵәыратә хҭысқәа рҭоурых еицакрада иеиҵагыло абиԥарақәа рымадара. Ҳара ҳаԥсадгьыл ахьчара ҳалшеит ҳаибашьцәа гәымшәақәа рфырхаҵареи рхамеигӡареи ирыбзоураны. Абри зегьы ҳхаҳмыршҭыроуп, убасҟан ауп иӷәӷәоу, иҭышәынтәалоу, ишәарҭадоу аҳәынҭқарра аргылара анҳалшо.

Ари амш азы иара убас ҳаҭыр дула ихьӡ ҳгәалаҳаршәоит Аԥсны Раԥхьатәи Ахада, Адҵаҟаҵаҩ Хада Владислав Григори-иԥа Арӡынба. Уи иҩныҵҟатәи идоуҳамч иабзоураны ҳажәлар аӡәк иеиԥш иеидгылеит, иагьрылшеит аибашьраҟны аиааира агара.

Иҟазааит Аҧсуа дгьыл аҟны аҭынчра, аизҳазыҕьара. Рыхьӡ кашәара ақәымзааит зыҧсадгьыл зхы ақәызҵаз!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT